Levítico

16 Naashajaakalaka Jehová nümaa Moisés süchikijee nanaajaain na piamashiikana nüchonnii Aarón, na anaajaakana sükajee narütkaain nünainmüin Jehová sümaa mojutuin nia namüin. 2 Anuukalaka nünüiki Jehová nümüin Moisés: «Püma nümüin Aarón chi puwalakai nnojolinjachin nikeroluin eepünaweere neʼe suluʼu tü Kuatta Wulekat Maʼin, tü süpüchoʼujeekat tü kuluulu soʼulujunakat, süʼütpaʼa tü shiʼrousekat tü Kojonkot suulia outajüin neʼe nia, jama teeʼiyalaajeechin saʼaka wanee siruma saaʼu shiʼrouse tü Kojonkot.

3 »Anuu tü nülüʼüjainjatkalü Aarón nikerotuinjachipa suluʼu tü Kuatta Wulekat Maʼin: wanee paaʼachon süpüla naapüinjachin nia saaʼu naainjala jee müshia wanee anneerü süpüla nuʼutajachin naaʼin jee naʼajüinjachin nia. 4 Naʼatüinjatü nünain tü kuluulu anakat maʼin aainjuushika süka lino, tü nüiche aainjuushikat süka lino suulia jaʼyajüin nia, tü kuluulu niyatapünaajanainjatkalü aainjuushika süka lino jee naʼatüinjatü tü nikiaalaja aainjuushikat süka lino. Kojutusü maʼin tia kuluutkalüirua. Oʼoojüinjachi nia jee naʼateetkalaka shia nünain.

5 »Naapaajeetka piamashii kaaʼulacheein namaʼanajee na israelitakana süpüla naapüin shia saaʼu naainjala jee naapaajeechi wanee anneerü süpüla nuʼutuin naaʼin sümaa naʼajüin nia.

6 »Naapeechikalaka Aarón chi paaʼakai saaʼu tü naainjalakat jee nuchunteechika süpüla sülatinnüin naainjala jee sülatinnüin naainjala na nipialujunakana.

7 »Naapaajeetka Aarón tü piamasükat kaaʼulacheein jee nümaajeetkalaka shia tamülatuʼu tayakai Jehová soʼuluʼu tü miichi aʼwaajüleekat. 8 Nüshantanajiraweechika Aarón saaʼu tü piamasükat kaaʼulacheein, naapeechi wanee tamüin tayakai Jehová jee chi wane naapeechi nümüin Azazel.* 9 Naapeechikalaka Aarón tamüin tayakai Jehová chi kaaʼulachon ashantanajiraanakai aaʼu tamüinjachikai, naapeechi nia saaʼu naainjala na israelitakana. 10 Eekajasaʼa chi kaaʼulachon ashantanajiraanakai aaʼu nümüinjachikai Azazel, nümaainjachin nia tamülatuʼu tayakai Jehová sümaa katüin noʼu süpüla sülatinnüinjatüin naainjala na israelitakana, nüjütüneechikalaka eemüin Azazel isashiipaʼamüin.

11 »Nüntireechikalaka Aarón chi paaʼakai süpüla naapüinjachin nia tamüin tayakai Maleiwa saaʼu tü naainjalakat, nuchunteechikalaka süpüla sülatinnajatüin naainjala jee naainjala na nipialujunakana. Süchikijee tia, nuʼuteechi aaʼin chi paaʼakai süpüla naapüinjachin nia tamüin saaʼu tü naainjalakat.

12 »Naapaajeechikalaka süchikijee tia tü süpülajanakat sikemechi sümaa piratüin shia sikemechi eekai chuwatüin suluʼujee tü aʼajülee tamülatuʼukat tayakai Jehová, najapateetka piamasü najapü tü wunuʼu jemetakalü eejuu suluʼu shiyüüjaaushin, niʼikajaajeetkalaka shia süchiiruajee tü kuluulu soʼulujunakat tü kuattakat. 13 Nijiteetkalaka tamülatuʼu tayakai Jehová soʼu siki tü wunuʼu jemetakalü eejuu, kaitteetkalaka sümüsain tü wunuʼu jemetakalü eejuu sooʼopünaa shiʼrouse tü Kojon kaluʼukat tü Pütchi Taluwataakalü Anain, nnojoleechikalaka nia outuin suluʼujee tia.

14 »Nütülüittireerü akaratshitua süka tü najapirakat süpüshi nüsha chi paaʼakai sümülatuʼu shiʼrouse tü Kojonkot wüinpüjeeruʼu sünain.

15 »Nuʼuteechikalaka naaʼin chi kaaʼulachonkai süchikijee tia süpüla naapüin nia saaʼu naainjala na israelitakana. Nülüʼüjeerü tü nüshakat chi kaaʼulachonkai süchiiruajee tü kuluulu soʼulujunakat tü kuattakat, naaʼinreetkalaka süka tü nüshakat chi kaaʼulachonkai tü naaʼinrakat paala süka nüsha chi paaʼakai. Nütülüittireerü shia wanaa maʼin sümaa shiʼrouse tü Kojonkot.

16 »Wuleinjatü nutuma Aarón tü Kuatta Wulekat Maʼin nnojoleetka shia yarüttüin sutuma tü kasa yarüttüsü naaʼinrakat na israelitakana, sutuma tü kasa mojusü naaʼinrakat jee sutuma tü naainjalakat. Wuleinjatiaʼaya nutuma tü miichi aʼwaajülee pasanainkat nanain naya wayuu aaʼinrakana kasa yarüttüsü.

17 »Sümaʼainruʼu nikerotüin Aarón suluʼu tü Kuatta Wulekat Maʼin süpüla nuchuntajachin sülatinnüin saainjala wayuu jee nujuʼitaleepaʼaya suluʼujee tü kuattakat, nnojoishi eeinjachin wanee wayuu suluʼu tü miichi aʼwaajüleekat. Achuntajachi Aarón sülatinnajatüin naainjala jee naainjala na nipialujunakana. Achunteechiaʼaya nia süpüla sülatinnüin naainjala napüshuaʼa na israelitakana.

18 »Nujuʼiteechikalaka eemüin tü aʼajüleekat, tü tamülatuʼukat tayakai Jehová jee wuleetkalaka shia nutuma, nüchütteetkalaka süka süpüshi nüsha chi paaʼakai jee süka süpüshi nüsha chi kaaʼulachonkai süpüshuaʼa tü shiyaakuakat suʼuwa mürüt sünainka tü aʼajüleekat. 19 Nütülüittireetkalaka süka tü najapirakat süpüshi tü ishakat saaʼu tü aʼajüleekat, wuleetkalaka shia nutuma suulia tü kasa yarüttüsü naaʼinrakat na israelitakana.

20 »Nüntireechikalaka chi kaaʼulachon katakai oʼu wulepa nutuma tü Kuatta Wulekat Maʼin, tü miichi aʼwaajüleekat jee müsia tü aʼajüleekat. 21 Niʼitaajeetka Aarón tü piamasükat najapü saaʼu nikii chi kaaʼulachon katakai oʼu, nüküjeetkalaka saaʼu nikii chi kaaʼulachonkai süpüshuaʼa tü kasa mojukat natuma na israelitakana sümaʼaleeya tü naainjalakat, meerü niʼitaakai saaʼin tia saaʼu nikii chi kaaʼulachonkai, nüjüteechika wanee wayuu aneekünakai paala süpüla niʼikajaainjachin chi kaaʼulachonkai isashiipaʼamüin. 22 Meetkalaka nülüʼüjakai saaʼin chi kaaʼulachonkai süpüshuaʼa tü kasa mojukat natuma na israelitakana, meerü nülüʼüjakai saaʼin tia isashiipaʼamüin, nüjütüneechikalaka chi kaaʼulachonkai isashiipaʼamüin.

23 »Nikeroteechikalaka Aarón suluʼu tü miichi aʼwaajüleekat, naakateetkalaka tü nüsheʼin aainjuushikat süka lino naʼataka paala nikerotoiwaʼaya suluʼumüin tü Kuatta Wulekat Maʼin, nüpüteetkalaka shia yalaʼaya. 24 Noʼoojeechikalaka Aarón eekai süpaatiase tü miichi aʼwaajüleekat* jee naʼateechikalaka nüsheʼin. Nujuʼiteechikalaka süchikijee tia, naʼajeechikalaka tamüin tayakai Maleiwa tü nüsülajüinjatkat tamüin jee naʼajeerü tü nasülajüinjatkat na israelitakana. Nuchunteechikalaka süpüla sülatinnüin naainjala niakai jee naainjala na israelitakana. 25 Kaitteetkalaka nutuma saaʼu tü aʼajüleekat saüsü tü mürüt nuʼutakalü aaʼin saaʼu saainjala wayuu.

26 »Eekajasaʼa chi wayuu ajütakai chi kaaʼulachonkai eemüin Azazel nüshijaainjatü nüsheʼin jee oʼoojüinjachi nia, nikeroteechikalaka süchikijee tia eere kepiain na israelitakana.

27 »Eekajasaʼa chi paaʼa aapünakai saaʼu naainjala Aarón jee müshia chi kaaʼulachon aapünakai saaʼu naainjala na israelitakana, na alüʼüjünakana asha suluʼumüin tü Kuatta Wulekat Maʼin süpüla sülatinnüin naainjala Aarón namaa na israelitakana, amaanajana wattamüin suulia nepia na israelitakana, saʼajüneetkalaka soʼu siki nata, neʼiruku sümaʼaleeya nachaʼa. 28 Nüshijaainjatü nüsheʼin chi wayuu aʼajakai tia jee oʼoojüinjachi nia, nikeroteechikalaka eere kepiain na israelitakana süchikijee tia.

29 »Tüü shia wanee kasa jaaʼinrüinjatkat süpüla kaʼikat süpüshuaʼa: soʼu polooin sükalia tü akaratshikat kashi jaʼyainjatü jaaʼu mojuin jaaʼin saalinjee tü jaainjalakat,* nnojoishii jia aʼyataainjanain, nnojoishi aʼyataainjachin chi wayuu israelitakai nümaʼaleeya chi wayuu nnojoikai israelitain. 30 Alatinneerü jaainjala soʼu kaʼikat tia süpüla süküjünüin jümüin wuleinnapain jia. Wuleenakalaka jia toʼupala tayakai Jehová suulia tü jaainjalakat. 31 Tia shia tü kaʼi jeemeraainjanakalü oʼu, jaʼyainjatü jaaʼu mojuin jaaʼin saaʼujee tü jaainjalakat. Tüü shia wanee kasa jaaʼinrajatkat süpüla kaʼikat süpüshuaʼa.

32 »Chi sacerdote eekai aneekünüin jee aikaleʼennakai süpüla sacerdotein nia nüchikumüin chi nüshikai, oʼutajachi nia saaʼin mürüt süpüla sülatinnüin wanee aainjalaa, naʼatüinjatü nünain tü kuluulu anakat maʼin aainjuushika süka lino. 33 Oʼutajachiaʼaya nia saaʼin mürüt süpüleerua tü Kuatta Wulekat Maʼin, tü miichi aʼwaajüleekat, tü aʼajüleekat jee süpüla sülatinnüin naainjala na sacerdotekana namaʼaleeya napüshuaʼa na israelitakana. 34 Tüü shia wanee kasa jaaʼinrajatkat süpüla kaʼikat süpüshuaʼa, juchunteenaka süpüla sülatinnajatüin naainjala na israelitakana uwatua süpüla juyakat».

Naainjakalakaʼaya Aarón süpüshuaʼa tü aluwataanakalü anain Moisés nutuma Jehová.