Levítico
25 Naashajaakalaka Jehová nüchikuaʼa nümaa Moisés eekai tü uuchikat Sinaí sümaa nümüin nümüin: 2 «Anuu tü püküjainjatkat namüin na israelitakana: ‹Jikerotapa suluʼu tü mma taapajatkat jümüin, nnojotsü jiʼyateʼerajatüin tü mmakat soʼu sükalia eemerawaa süka juʼwaajüinjachin tayakai Jehová soʼu tia. 3 Apünajüinjana jia soʼu aipirua juya suluʼu tü jiyüüjasekat jee jushoʼttüinjatü sütüna tü uuwoʼulia jüpünajakat sümaa jükotchojüinjatüin süchon jüʼttia. 4 Eekajasaʼa soʼu tü akaratshikat juya, nnojotsü jiʼyateʼerajatüin tü juumainkat. Siraainjatü juyakat saaʼu sümaa nnojoluin shiʼyateʼennüin süka sükaliain shia eemerawaa süpüla aʼwaajaa tayakai Jehová. Nnojotsü jüpünajüinjatüin aluʼu tü jiyüüjasekat jee nnojotsü jüshoʼttüinjatüin sütüna tü uuwoʼulia jüpünajakat. 5 Nnojotsü jükotchojüinjatüin süchon tü aʼttiee asotokot neʼe sümüiwaʼa sünainjee tü süchon aʼttiee ojutuusükat paala jee nnojotsü jükotchojüinjatüin süchon tü uuwoʼulia jüpünajakat nnojotka ashoʼttünüin atüna. Siraainjatü juyakat sümaa nnojoluin shiʼyateʼennüin tü mmakat. 6 Eepejeʼe süpüla jiküin süchon tü aʼttiee eekai iyotuin süpaʼa tü mmakat soʼu tü sükaliakalü eemerawaa. Eesü süpüla jiküin shia namaa na jüchepchiakana, nümaa chi wayuu aʼyataakai jümüin sümaa juwalaajüin niʼyataain jee nümaa chi nnojoikai israelitain kepiakai jaʼaka. 7 Eesü süpüla shiküin shia jümüʼlüin jee shiküin shia tü wüchii wünaʼapüjatü eekat süpaʼa tü mmakat. Eesü süpüla shikünüin süpüshuaʼa tü iyotokot süpaʼa tü mmakat.
8 »›Ayaawajeechi pia akaratshitua akaratshi juya, piencheetka shikii mekietsatmüin shia süpüshuaʼa, soʼu tia nnojotsü aʼyateʼennajatüin tü mmakat soʼu akaratshi juya. 9 Soʼu polooin sükalia tü akaratshikat kashi, jiʼyalajirüinjatü emetut tü suʼuwakalü anneerü. Soʼu tü miʼiraa kanüliakat tü Kaʼi Alatinnakalü oʼu Naainjala na Israelitakana, jiʼyalajirüinjatü emetut tü suʼuwakalü anneerü süpüla saapünüin sainküin mmakat. 10 Kojutuinjatü jümüin tü jaʼraikat shikii juya, jüküjainjatü taashinjatüin süpüshuaʼa wayuu süpaʼa tü mmakat soʼu tia. Taashinjana jia soʼu juyakat tia, eiteʼenneerü jümüin tü juumainkat waneʼewai jukua jee aleʼejeena jia namaʼanamüin jüpüshi. 11 Taashinjana jia soʼu tü jaʼraikat shikii juya, nnojoishii jia apünajüinjanain jee nnojotsü jükotchojüinjatüin süchon tü aʼttiee asotokot neʼe sümüiwaʼa sünainjee tü süchon aʼttiee ojutuusükat paala jee nnojotsü jükotchojüinjatüin süchon tü uuwoʼulia jüpünajakat nnojotka ashoʼttünüin atüna. 12 Süka jamüin, taasheena jia soʼu juyakat tia, kojutuinjatü maʼin shia jümüin. Shia jiküinjatka achon tü asotokot sümüiwaʼa süpaʼa tü mmakat.
13 »›Eiteʼenneerü jümüin tü juumainkat waneʼewai jukua soʼu tü Juya Taashinjatkalü Oʼu Wayuu. 14 Nnojoishii jia emeejiraainjanain joʼu juiküinjanale wanee kasa sümüin wayuu jee jiyaʼlajüinjanale wanee kasa suulia wayuu. 15 Chi eekai ayaʼlajüin wanee kasa suulia wayuu jülüjainjatü naaʼin jeʼrairüin juya alataka süchikijee tü Juya Taashinjatkalü Oʼu Wayuu, akaʼaya chi eekai oiküin wanee kasa sümüin wayuu, jülüjainjatü naaʼin tü juya choʼujaakat süpüla sükotchojünüin süchon aʼttiee. 16 Nukooʼomüinrüinjatü sülia tü ayaʼlajünüinjatkat choʼujaayürüle wainma juya süpüla sükotchojünüin süchon aʼttiee, eekajasaʼa paliʼirüle juya apütaaka, nüshakatirüinjatü sülia tü ayaʼlajünüinjatkat süka suʼunuin sülia tü ayaʼlajünüinjatkat süchiirua süchon tü pünajüt eejeetkat süpülapünaa tü Juya Taashinjatkalü Oʼu Wayuu. 17 Nnojotsü jimeʼeraainjatüin aaʼu kasa suulia wayuu, kojutuinjachi tayakai jümüin süka tayain Jehová chi Jümaleiwasekai. 18 Jaaʼinrüle tü taluwataakalü anain jee joonoole sümaa tü tamakat jümüin, jimateerü jaaʼin suluʼu tü mmakat. 19 Kachonjeerü jüʼttia süpaʼa tü mmakat, ekeena jia süchon tü jüʼttiakalü emiraleepaʼaya jia, jimateerü jaaʼin suluʼu tia mmakat.
20 »›«¿Kaseerü wekaka soʼu tü akaratshikat juya nnojoliire wapünajüin jee wakotchojüin süchon waʼttia?», jümataarüle, 21 jütüjaa saaʼu jiʼreenain anaa tatuma soʼu tü aipiruakat juya, eejeetkalaka süpüla apünüin juya süchon tü jüʼttiakat. 22 Apünajeena jia soʼu tü mekiisatkat juya, sujuunaluʼu tia jikeerü süchon tü jüʼttia jünaajaakat paala, ojoloojeena jia suulia jiküin tia soʼu tü mekietsatkat juya. Shieerü jikaka süchon tü jüʼttia jünaajaakat paala kachonleepaʼaya tü jüʼttia jeketükat jüpünajüin.
23 »›Nnojotsü oikünajatüin tü mmakat süpüla makataleeinjatüin wanee wayuu sümaa süka tayain koumain tü mmakat. Wayuu ooʼonooshii neʼe jia, naatajatü juumain. 24 Juitkajatü wanee mma süchikuaʼa nümüin chi koumainkai paala shia chaa juumainpaʼa.
25 »›Eere wanee wayuu maʼletsekai, nuikataale shiʼipa nuumain, nia antajachika wanee eekai nüpüshicheʼechoin sünain ayaʼlajaa tia mma nuikakat. 26 Mapüshire chi wayuu oikakai wanee mma, washittaale nia mapa jee eere nümaʼana sülia süpüla niyaʼlajüin süchikuaʼa tü mma nuikakat paala, 27 niyaawajüinjatü tü süliakat wanaapünaa sümaa tü juya alatakat sünainjee nuiküin shia, naapa nümeeria nümüin chi wayuu nuikakai amüin tia mmakat sülia tü süchon aʼttiee eejeetkat süntaleepaʼaya tü Juya Taashinjatkalü Oʼu Wayuu, nuumainjeetkalaka tü mmakat süchikuaʼa.
28 »›Nnojorüle nümaʼana süpüla niyaʼlajüin süchikuaʼa tü nuumainkat, nuuʼulaainjatü shia nüpüla chi ayaʼlajüshikai shia waneʼereeya süntapa tü Juya Taashinjatkalü Oʼu Wayuu. Süleʼejineetka süchikuaʼa nümüin tü nuumainkat soʼu tü Juya Taashinjatkalü Oʼu Wayuu.
29 »›Eesü süpüla niyaʼlajüin süchikuaʼa wanee wayuu tü nipia suluʼukat wanee pueulo kasepüka, niyaʼlajüle shia süchikuaʼa süpülapünaa waneein juya süchikijee nuiküin shia. Nnojoleerü süpüla niyaʼlajüin shia süchikuaʼa sülatüle wanee juya süchikijee nuiküin shia. 30 Nnojorüle shiyaʼlajünüin süchikuaʼa wanee miichi suluʼuka wanee pueulo kasepüka süpülapünaa waneein shia juya süchikijee suikünüin, nipialeeinjatia chi ayaʼlajakai shia, nepiainjatü shia na nüikeyuu eejeenakana nüchikumüin, nnojoleerü aleʼejinnüin tü miichikat süchikuaʼa soʼu tü Juya Taashinjatkalü Oʼu Wayuu. 31 Eekajasaʼa wanee miichi nnojotka suluʼuin wanee pueulo eekai kasepüin, süpüshireeya shia tü mma taashikat. Eesü süpüla shiyaʼlajünüin süchikuaʼa jee eiteʼennajatü soʼu tü Juya Taashinjatkalü Oʼu Wayuu.
32 »›Eekajasaʼa na levitakana eesü süpüla nayaʼlajüin süchikuaʼa tü nepia noikakat suluʼu tü pueulo kepiakalü aluʼu naya, müinjatü sukuwaʼipa tia süpüla kaʼikat süpüshuaʼa. 33 Nnojorüle shiyaʼlajünüin süchikuaʼa nipia wanee levita, tü nuikakat suluʼu tü pueulo kepiakalü aluʼu nia, aapünajatü shia nümüin süchikuaʼa soʼu tü Juya Taashinjatkalü Oʼu Wayuu süka nepiainña na levitakana tü miichi suluʼukat tü pueulo aapünakat namüin suluʼu noumain na israelitakana. 34 Nnojotsü oikünajatüin tü mma kapaʼakalü alama süʼütpaʼaka tü pueulo eere kepiain na levitakana süka saapünüin namüin süpüla noumainjatüin shia süpüla kaʼikat süpüshuaʼa.
35 »›Maʼletsere wanee juwala kepiakai jüʼütpaʼa, nnojorüle nümaʼana tü niküinjatkat, asülajüinjana jia nümüin tü niküinjatkat, nipijaajeechika wanaa jümaa. Jaaʼinrajatü tia maʼaka jaaʼinrüin shia nümüin wanee wayuu ooʼonookai jümaʼanamüin jee chi wayuu naatakai oumain. 36 Nnojotsü jüchekajüinjatüin süchon wanee kasa jaapaka nümüin chi juwalakai, nnojotsü jimeʼeraainjatüin aaʼu wanee kasa nuulia. Kojutuinjachi taya jümüin süka tayain chi Jümaleiwasekai, nipijaajeechika chi juwalakai wanaa jümaa. 37 Nnojotsü kachoinjatüin jutuma tü nneerü jaʼanapajirakat nia, nnojotsü jaapajatüin jiküin nümüin süpüla jimeraain kasa nuulia. 38 Tayasa Jehová chi Jümaleiwasekai, chi ayuʼlakai jia suluʼujee tü mmakalü Egipto süpüla taapajatüin jümüin tü mmakat Canaán, tayainjachikalaka Jümaleiwasein.
39 »›Eere wanee juwala maʼletsekai kepiakai jüʼütpaʼa, nuikiraale jümüin, nnojotsü jüpüleeruaainjatüin naaʼin süpüla niʼyataain maʼin maʼaka niʼyateʼennüin wanee achepchiee. 40 Müinjachi nia jümüin maʼaka naaʼin wanee wayuu aʼyataakai saaʼu nneerü, maʼaka naaʼin wanee wayuu naatakai oumain. Waneʼereeya nuuʼulaain suulia aʼyatawaa jümüin soʼu tü Juya Taashinjatkalü Oʼu Wayuu. 41 Nuʼuneechikalaka jümaʼanajee, eitaajeechi nia namaa na nüchonniikana sümaʼanamüin nüpüshi, nuumainjeetkalaka süchikuaʼa tü noumainkat na nutuushinuukana. 42 Süka jamüin, tachepchia na israelitakana, na tayuʼlakana suluʼujee tü mmakalü Egipto. Nnojoishii oikünajanain naya maʼaka naaʼin wanee achepchiee. 43 Nnojoishii müliainjanain naya jutuma, kojutuinjachi taya jümüin süka tayain Jümaleiwasekai. 44 Naya eeka süpüla jüchepchiain na wayuu nnojoliikana israelitain kepiakana süʼütpünaa Israel, naya eeka süpüla jiyaʼlajüin süpüla jüchepchiain. 45 Eeshiʼiya süpüla jiyaʼlajüin jüchepchia naʼakajee nachonnii na naatakana oumain kepiakana jümaa jee müsia saʼakajee napüshi joʼuuka juumainpaʼa, nalaamainjeenaka jia. 46 Jiʼipünaajeenaka naya napüla na jüchonnii eejeenakana jüchikumüin, nachepchieenakalaka naya waneepia. Aʼyataajeena naya jümüin, nnojoliipejeʼe müliainjanain jutuma na juwalayuu israelitakana.
47 »›Eere wanee wayuu ooʼonookai jee niale wanee wayuu naatakai oumain kepiakai püʼütpaʼa jee nüwashirüjaale, niasaʼa eere wanee puwala kepiakai nüʼütpaʼa eekai maʼletsejaain, nuikiraweere nümüin chi wayuu ooʼonooshikai jee niale nümüin chi naatakai oumain kepiakai püʼütpaʼa jee shiale nuikiraweein nümüin wanee nüpüshi chia wayuu ooʼonooshikai, 48 eejeechia süpüla niyaʼlajünüin nüchikuaʼa süchikijee nuikiraain, nieechi ayaʼlajaka nia nüchikuaʼa wanee nuwala. 49 Eeshia süpüla niyaʼlajünüin nüchikuaʼa nutuma wanee nüʼlaüla, niale nüchon chi nüʼlaülakai jee niale wanee eekai nüpüshicheʼechoin.
»›Eeshia süpüla niyaʼlajiraain nüchikuaʼa nüwashirüjaale. 50 Niyaawajüinjatü nümaa chi ayaʼlajakai nia jeʼrain tü juya alatakat soʼujee nuikiraain sünainmüinreʼeya tü Juya Taashinjatkalü Oʼu Wayuu. Oʼuneerü tü nneerü nüliakat süchiirua jeʼrain juya niyaawajaka. Oʼuneerü sülia tü kaʼi niʼyataakalü oʼu wanaapünaa sümaa nükanain wanee wayuu aʼyataakai saaʼu nneerü. 51 Isayürüle wainma juya süpüla tü Juya Taashinjatkalü Oʼu Wayuu, nuwalaajüinjatü tü nüliainjatkat süpüla taashin nia nüchikuaʼa wanaapünaa sümaa tü juya choʼujaayütkalia. 52 Paliʼirüle tü juya apütaakat süpüla tü Juya Taashinjatkalü Oʼu Wayuu, niyaawajüinjatü tü nüliainjatkat süpüla taashin nia nüchikuaʼa wanaapünaa sümaa tü juya apütaakat, nuwalaajeetka shia. 53 Chaiwaʼaya nia nümaa chi nülaamainkai, awalaajünajachi nia maʼaka naaʼin wanee wayuu aʼyataakai saaʼu nneerü, nnojoishi müliainjachin nia atumawaa. 54 Isalejeʼeya nüchiki niyaʼlajiraain nüchikuaʼa süpüla taashinjachin nia wanaapünaa sümaa tü aküjünüitpakat, taashireejeechia nia namaa na nüchonniikana soʼu tü Juya Taashinjatkalü Oʼu Wayuu.
55 »›Tachepchiasa na israelitakana, naya na tachepchia tayuʼlakana suluʼujee tü mmakalü Egipto. Tayasa Jehová chi Jümaleiwasekai.