Levítico
21 Ayatakalaka naashajaain Jehová nümaa Moisés sümaa nümüin nümüin: «Anuu tü püküjainjatkat namüin na sacerdote nüchonniikana Aarón: ‹Nnojoishi eeinjachin wanee sacerdote eekai yarüttüin sükajee nipettüin wanee wayuu eekai outuin naʼakajee na israelitakana. 2 Eepejeʼe süpüla nipettüin wanee nüpüshi eekai nünaajaain maʼaka saaʼin nii, nüshi, nüchon, wanee nüchon eekai jierüin jee müshia nuwala, 3 eesiaʼaya süpüla nipettüin wanee niiyetse eekai sünaajaain nnojoyürüle toolomaain shia, eekai kasairüin nünain sümaa nnojoluin kasaalüin shia. 4 Nnojoishi nia yarüttüinjachin sükajee nipettüin wanee wayuu eekai kaʼwayuusein naʼakajee na israelitakana. 5 Nnojoishii naya amoijüinjanain nekii, nnojotsü naüjainjatüin tü sotpünaakat naʼliima jee nnojotsü nakashajüinjatüin nata. 6 Wuleinjatü nakuwaʼipa toʼupala tayakai chi Namaleiwasekai jee nnojoishi mojutuinjachin maʼin taya namüin saaʼu Namaleiwasein taya* süka nayain na aapakana tamüin tayakai Jehová tü kasa asülajuushi aʼajünakat tamüin, shiajaʼa tü eküülü aapünakat tamüin tayakai chi Namaleiwasekai. Wuleinjatkalaka tü nakuwaʼipakat. 7 Nnojoishii kasaalüinjanain na sacerdotekana sümaa jierü eekai maaʼin, sümaa wanee wayuu eekai mojutuin atumawaa jee sümaa wanee wayuu eekai suuʼulaain nuulia suʼwayuuse süka nakataluushin na sacerdotekana tamüin tayakai Maleiwa. 8 Wuleinjatü nukuwaʼipa chi sacerdotekai jutuma süka niain chi aapakai tü eküülü asülajuushi tamüinjatkat tayakai chi Jümaleiwasekai. Wuleinjatü nukuwaʼipa jümüin süka wulein takuwaʼipa tayakai Jehová chi wulekai atuma jukuwaʼipa.
9 »›Yarütteerü nukuwaʼipa wanee sacerdote yarüttüle sukuwaʼipa wanee nüchon saaʼujee wayuuin maaʼinsat shia, oʼutunajatü aaʼin shia sümaa saʼajünüin soʼu siki.
10 »›Nnojotsü nuuʼulaainjatüin chi laülaashikai napüleerua na sacerdotekana* miyoʼu nuʼwala sümaa shokuleraain shia jee nnojotsü nüchatajaainjatüin nüsheʼin, süka nüneekünüin sükajee shiʼyotunüin seita saaʼu nikii jee aneekünüshi nia süpüla naʼatüinjatüin nünain tü nüsheʼinkat wanee sacerdote. 11 Nnojoishi arütkaainjachin nia nünainmüin wanee wayuu eekai outuin. Jaʼitashi niain outuin chi nüshikai jee tü niikat, nnojoishi yarüttüinjachin nia sükajee nipettüin naya. 12 Nnojoishi nia ojuʼitajachin suluʼujee tü miichi aʼwaajüleekat jee nnojotsü mojutuinjatüin nümüin tü miichi eere taʼwaajünüin tayakai Maleiwa, süka saaʼuin nikii shiyaawase tü aneekünakalü akajee nia tü seita oʼyotinnakat saaʼu nikii tatuma tayakai Maleiwa, tayasa Jehová.
13 »›Kasaalüinjachi chi laülaashikai napüleerua na sacerdotekana sümaa wanee wayuu eekai nnojoyülüin toolomaain. 14 Nnojoishi kasaalüinjachin nia sümaa wanee wayuu outaka aʼwayuuse, wanee wayuu eekai suuʼulaajiraain nümaa suʼwayuuse, wanee eekai mojutuin atumawaa jee shiale wayuu maaʼinsat, kasaalüinjachin nia sümaa wanee wayuu israelita eekai nnojoyülüin toolomaain. 15 Nnojotsü yarüttüinjatüin nukuwaʼipa wanee nülüin nutuma naʼakajee na israelitakana süka tayain Jehová chi wulekai atuma nukuwaʼipa›».
16 Ayatakalakaʼaya naashajaain Jehová nümaa Moisés sümaa nümüin nümüin: 17 «Anuu tü püküjainjatkat nümüin Aarón: ‹Nnojotsü naapajatüin tamüin tayakai Maleiwa tü eküülü asülajuushikat wanee pülüin eekai kamojulain, müinjatü sukuwaʼipa tia natuma na püikeyuu eejeenakana püchikumüin. 18 Nnojoishi arütkaainjachin wanee wayuu eekai kamojulain maʼaka naaʼin chi eekai moʼupaʼain, chi eekai shalüʼütüin, chi eekai kamojulain niʼichi, chi eekai miyoʼuwaʼatain asaʼa jee shiale miyoʼuwaʼatain nütüna, 19 akaʼaya chi wayuu eekai yülüin najapü jee shiale yülüin nuuʼui, 20 jokotüle nüsapü, motsochonle nia, kamojulale noʼu, yooire nüta, sukumajaale süta nülioʼu jee seewaale nüshüʼü. 21 Nnojoishi arütkaainjachin wanee nülüin chi sacerdotekai Aarón eekai kamojulain süpüla naapajatüin tamüin tayakai Jehová tü asülajünakat tamüin sümaa saʼajünüin soʼu siki. Nnojoikalaka süpüla nürütkaainjachin süpüla naapüin tamüin tayakai chi Nümaleiwasekai tü eküülü asülajuushikat tamüin. 22 Eepejeʼe süpüla niküin tü eküülü akataluushikat süpüla saapünajatüin tamüin tayakai Maleiwa. 23 Shiajaʼa neʼe nnojolinjachin nürütkaain eekai tü kuluulu soʼulujunakat tü miichikat jee nnojoishi nia arütkaainjachi eekai tü aʼajüleekat, jama kamojulain nia. Nnojotsü mojutuinjatüin nümüin tü miichi eere taʼwaajünüin süka tayain Jehová chi wulekai atuma jukuwaʼipa›».
24 Naashajaaka Moisés nümaa Aarón, namaa na nüchonniikana Aarón jee namaa napüshuaʼa na israelitakana.