Jueces
3 Nütüjawee aaʼu Jehová noonoojeenale na israelitakana nümaa, na israelita nnojoyüliikana atkaain namaa na cananeokana, müshiijeseʼe eein na wayuu nnojoliikana niyuʼluin suluʼujee tü mmakat Canaán. 2 Naaʼinrüin tia süpüla noʼunuinjanain naikeyuu na israelitakana sünain atkawaa, na nnojoyüliikana atkaain. 3 Anaa na wayuu nnojoliikana niyuʼluin Maleiwa: na jaʼraishii wayuu aluwataakana naaʼu na cananeokana, na sidoniokana otta müshiʼiya na heveo kepiapuʼukana saaʼu tü uuchikat Líbano, chejeejatü oʼttuin tü noumainkat saaʼu tü uuchikat Baal-Hermón antaleesia shia chamüin Lebó-Hamat. 4 Nuuʼulaain Jehová makatüinjanain naya wayuukana suluʼu tia mmakat süpüla nütüjaainjatüin saaʼu noonoojeenale na israelitakana sümaa tü pütchi aapünakat namüin na natuushinuukana nükajee Moisés. 5 Kottiraashiijeseʼe na israelitakana namaa na cananeokana, namaa na hititakana, namaa na amorreokana, namaa na perizitakana, namaa na heveokana otta namaa na jebuseokana. 6 Naʼwayuusesü na israelitakana nachonnii naya wayuukana otta nachonnii na israelitakana naapüin shia namüin naya wayuukana süpüla naʼwayuuseinjanain naya, naʼwaajakalaka na israelitakana namaleiwase naya wayuukana.
7 Naaʼinrakalaka na israelitakana tü kasa mojukat nümüin Jehová. Nnojoishi sotuin naaʼin Jehová, chi Namaleiwasekai, naʼwaajaka niyaakuairua chi maleiwayaashi kanüliakai Baal otta naʼwaajüin tü wunuʼuirua shiyaawasekat tü maleiwayaasü kanüliakat Aserá.* 8 Jashichikalaka Jehová namüin na israelitakana sünainjee tia otta naapa ekiichii naya nümüin Cusán-Risataim, chi aluwataakai naaʼu na wayuu chajanakana Mesopotamia. Naʼyataakalaka na israelitakana soʼu mekiisat juya nümüin Cusán-Risataim. 9 Nachuntakalaka na israelitakana kaalinwaa nümüin Jehová, nüneekaka Jehová Otniel süpüla nuʼtteʼerüinjanain naya, nüchon nia Quenaz, chi nimüliakai Caleb. 10 Naapakalaka Jehová tü nüpülainkat nümüin Otniel, nekiipüʼükalaka nia na israelitakana. Nütkaakalaka Otniel nümaa Cusán-Risataim, chi aluwataakai naaʼu na wayuu chajanakana Mesopotamia, akanajuushi Cusán-Risataim nutuma süka nükaalinjain nia Jehová. 11 Süchikijee tia, nnojotsü eein atkawaa chaa Israel soʼu pienchi shikii juya. Nünaajaakalaka mapa Otniel, chi nüchonkai Quenaz.
12 Naaʼinrakalaka süchikuaʼa na israelitakana tü kasa mojukat nümüin Jehová. Nuuʼulaainjeseʼe Jehová nakanajuuin na israelitakana nutuma Eglón, chi aluwataakai naaʼu na chajanakana Moab, jama naainjain kasa mojusü noʼuluʼu Jehová. 13 Paaʼinwashi Eglón namaa na ammonitakana otta namaa na amalequitakana süpüla nashutuinjanain naaʼu na israelitakana, nakanajuuka natuma na wayuu chajanakana Jericó. 14 Naʼyataakalaka na israelitakana soʼu poloo mekiisat juya nümüin Eglón, chi aluwataakai naaʼu na wayuu chajanakana Moab. 15 Nachuntakalaka maʼin na israelitakana kaalinwaa nümüin Jehová, nüneekaka Jehová Ehúd süpüla nuʼtteʼerüinjanain naya. Nüchon nia Guerá, nülüin nia Benjamín, wayuu kepeʼeshi Ehúd. Nuluwataanaka mapa Ehúd natuma na israelitakana süpüla niʼikajaainjatüin tü nneerü nuchuntakat Eglón, chi aluwataakai naaʼu na wayuu chajanakana Moab. 16 Nukumajakalaka Ehúd wanee puñaat, piamasü süsa nutuma, eetaasü maʼaka pienchi shikii centímetro sajaʼapüin, nijittaaka shia sünain tü nüpüʼü nikialujutkat, suupünaa nüsheʼin. 17 Naapaka Ehúd tü nneetkat nümüin Eglón, chi aluwataakai naaʼu na wayuu chajanakana Moab, wayuu kaüsüshi maʼin Eglón.
18 Süchikijee naapüin Ehúd tia, nüjütakalaka na wayuu alüʼüjakana paala tia nneetkat. 19 Nüleʼejaakalaka nüchikuaʼa Ehúd nüntapa eemüin shiyaakua tü maleiwayaasü akumajünakat süka ipa, tü chajatkat Guilgal. Anuujeseʼe nünüiki Ehúd nümüin Eglón: «Aluwataashikalee, eesü wanee pütchi taküjainjatka pümüin nnojotka süpüla sütüjaainjatüin aaʼu wayuu süpüshuaʼa». «Anashii jüpütüle waya wamüiwaʼa», nümakalaka chi aluwataashikai namüin na nüchepchiakana, nojuʼitakalaka napüshuaʼa. 20 Chajachikalaka joyotuin chi aluwataashikai nümüiwaʼa suluʼu tü kuatta iipünaakat, saamatuuisü tia kuattakat. Nürütkaakalaka Ehúd nünainmüin chi aluwataashikai sümaa nümüin nümüin: «Taküjainjatü pümüin wanee pütchi niʼikajeʼeraka Maleiwa pümüin». Nüshaʼwalaaka chi aluwataashikai saaʼujee niinase naapaiwaʼaya tia. 21 Niyuʼlakalaka Ehúd süka tü nipeʼekat tü puñaat nijittaakat paala sünain tü nüpüʼü nikialuʼukat, nusotokoloko Eglón nüleʼenain süka. 22 Kettataleeka tü puñaatkat nüleʼeruʼumüin Eglón, nnojotkalaka jaʼyain tü puñaatkat sutuma naüsü, jama nnojoluin niyuʼluin shia Ehúd, shiweenaaka nüchaʼa Eglón. 23 Nütürankajaaka Ehúd tü kuattakat jee nuʼluwataakalaka suluʼupünaa tü wentaanakat. 24 Süchikijee nuʼluwataain Ehúd, antüshii nachikuaʼa na nüchepchiakana Eglón sümaa süttüin tü kuattakat napüla. «Ounaʼapajüshi eera nia suluʼu nukuattase», namakalaka. 25 Süshapalaaka naaʼin na achepchieekana süka nnojoluin neʼrayaain nujutalüin chi aluwataashikai tü kuattakat. Nojutatkalaka tü kuattakat, neʼraka palasütüin chi aluwataashikai sümaa outuin nia.
26 Sümaʼinruʼu yootuin na achepchieekana süchiki tü naaʼinrajatkat, wattashi Ehúd isajüin, alatapünaashi nia eepünaa shiyaakua tü maleiwayaasü akumajuushikat süka ipa. Nüntakalaka suluʼumüin tü mmakat Seirá sümaa nnojoluin jamajüin nia atumawaa. 27 Niʼyalajitkalaka Ehúd suʼuwa anneerü nüntaiwaʼaya saaʼumüin tü uuchikat eejanale kepiain na nüikeyuukana Efraín. Nashakataka na israelitakana uuchoʼujee sümaa palajanain Ehúd napüleerua. 28 Anuukalaka nünüiki Ehúd namüin na israelitakana: «Anashii tamaale jia, jama naapüitpain Jehová wamüin nekii na moabitakana, na waʼünüükana». Noʼunakalaka nümaa Ehúd, noutkajakalaka napüla na moabitakana eere epetüin tü süchikat Jordán. Nnojotkalaka jaralüin alatüin tü süchikat natuma. 29 Katchinjashii maʼin na moabitakana sümaa yalayalain naaʼin, nnojoipejeʼe jaralin isajüin naʼakajee, outushii maʼaka 10.000 soʼu kaʼikat tia. 30 Nakanajuukalaka na moabitakana natuma na israelitakana soʼu kaʼikat tia. Nnojotkalaka eein atkawaa chaa Israel soʼu mekiisat shikii juya.
31 Eejachikalaka wanee wayuu nüchikumüin Ehúd, Samgar nünülia, nüchon Anat, nuʼuta aaʼinchii 600 filisteo süka wanee wunuʼu keʼichika kachueera, asaʼijia paaʼa tia makat. Oʼttaashiijeseʼe na israelitakana nutuma Samgar.