Jueces

14 Nuʼunakalaka Sansón suluʼumüin tü mmakat Timná, niʼrakalaka yala wanee wayuu napüshi na filisteokana. 2 Nüntakalaka mapa namaʼanamüin na wayuu kachooinkana nia. «Teʼrüin wanee wayuu chaa Timná, napüshi na filisteokana. Müliashi taya shiiʼiree tia wayuukat, anataasü juchuntule shia tapüleerua süpüla kasaalüinjachin taya sümaa», nümakalaka namüin. 3 Anuujeseʼe nanüiki na wayuu kachooinkana nia: «¿Nnojotsükai eein wanee wayuu naʼaka na wapüshikana jee yaʼaya woumainpaʼa anaka süpüla puʼwayuusein? ¿Jamüshi püchajaainjachikaʼa puʼwayuuse naʼaka na filisteokana? Nnojoishii anoujain naya wayuukana nünain Maleiwa». Anuupejeʼe nünüiki Sansón nümüin chi nüshikai: «Puchuntaʼaya wayuukat tapüleerua, jama shiain anain süpüla taʼwayuusein». 4 Nnojotpejeʼe nayaawatüin saaʼu na wayuu kachooinkana Sansón aleinjatüinña tia nutuma Jehová. Naainjain tia süpüla kasalajanainjatüin nutuma tü kasa mojusü naaʼinrakat na filisteokana namüin na israelitakana, jama müliain maʼin naya natuma soʼunnaa tia.

5 Nuʼunakalaka Sansón suluʼumüin tü mmakat Timná namaa na wayuu kachooinkana nia. Shiasaʼa nüntapa chaa Timnámüin eere süpünajünüin uuwa, nujuʼitaakalaka niʼipomüin Sansón wanee león jashichika maʼin. 6 Shiasaʼa wanaa maʼin sümaa tia, süntakalaka tü nüpülainkat Jehová naaʼumüin Sansón. Nuwaʼlaka chi leónkai süka najapü, piama naʼata nutuma. Nuwaʼlüin nia maʼaka naaʼin wanee kaaʼulachon eekai piamain nüʼülia atumawaa. Nnojotpejeʼe nüküjain süchiki tia namüin na wayuu kachooinkana nia. 7 Nüntakalaka suluʼumüin tü mmakat Timná jee naashajaaka sümaa tü wayuukat. Ayatüshia müliain Sansón shiiʼiree tia wayuukat.

8 Shiasaʼa nüsaajüinjatpa Sansón tü wayuu nuʼwayuuseinjatkat süpüla nümaainjatüin shia chaa nipialuʼumüin, nujuntapünaaka eejachire nuʼutuin aaʼin chi leónkai. Sukumajakalaka shipia joʼoma nüleʼeruʼu chi leónkai. 9 Naapaakalaka Sansón tü mapakat süka najapü, nikaaka shia wopuluʼu. Shiasaʼa nüntapa chaa eejanale na wayuu kachooinkana nia, nikiraka naya. Nnojotpejeʼe nüküjain niyuʼluin tia mapakat nüleʼeruʼujee wanee león outushi.

10 Nüntakalaka chi nüshikai Sansón sümaʼanamüin tü wayuu müliakalü eeʼiree chi nüchonkai. Eekalaka ekawaa nutuma Sansón maʼaka naaʼinrapuʼuin shia na jimaʼalii kaʼwayuuseinjanakana. 11 Saapünapa achiki tia sutuma wayuu, nantinnaka apünüin nekii wayuu süpüla yalainjanain naya nümaa. 12 Anuukalaka nünüiki Sansón namüin: «Taküjainjatü jümüin wanee kasa. Jüküjale tamüin jamaluʼuluin tia soʼunnaa tü akaratshikat kaʼi wekaainjanakalü oʼu, taapeerü jümüin apünüin shikii kuluulu aainjuushikat süka lino jee apünüin shikii kuluulu anaka maʼin. 13 Eekajasaʼa nnojorüle jüküjain tamüin jamaluʼuluin tia, jieena aapaka tamüin apünüin shikii kuluulu aainjuushika süka lino jee apünüin shikii kuluulu anaka maʼin». Anuujeseʼe nanüiki nümüin Sansón: «Püküja maa tü püküjainjatkat wamüin, waapajeein tü pümakat». 14 «Ojuʼitüsü eküülü sünainjee tü kasa ekakat wanee kasa

otta ojuʼitüsü kasa püsiasü sünainjee wanee kasa katchinkat maʼin», nümakalaka Sansón namüin.

Alatapejeʼe apünüin kaʼi sümaa nnojoluin naküjain jamaluʼuluin maʼin tia. 15 Anuukalaka nanüiki naya wayuukana soʼu tü pienchikat kaʼi sümüin tü nuʼwayuusekat Sansón: «Anashi pimeejüle chi puʼwayuusekai, nüküjeetkalaka wamüin jamaluʼuluin maʼin tü nüsakirakalü anain waya. Nnojorüle paaʼinrüin tia waʼajeerü pia namaʼaleeya nüpüshi chi püshikai. ¿Puunejaataapa neʼe waya shiiʼiree püsüteein wanee kasa eeka wamaʼana?». 16 Aʼyalajawaisü tü nuʼwayuusekat Sansón nümüin jee maʼwaisü shia nümüin: «Maalinsat taya püpüla, püʼürülasü taya, püküjain süchiki wanee kasa kapüleesü namüin na tapüshikana, nnojotpejeʼe püküjain tamüin jamaluʼuluin tia püsakirakalü anain». Anuujeseʼe nünüiki Sansón sümüin: «Eetaayaai taküjain tia namüin na wayuu kachooinkana taya, ¿piainjatkaʼa joo taküjain amüin shia?». 17 Aʼyalajawaisü shia nümüin shikeraajaleepaʼaya tü akaratshikat kaʼi nikeʼerakalü oʼu Sansón. Sukulajaaka naaʼin Sansón sümaa, nüküjainjeseʼe sümüin jamaluʼuluin tia. Nüküjain tia soʼu tü akaratshikat kaʼi, süküjainjeseʼe jamaluʼuluin tia namüin na süpüshikana. 18 Anuujeseʼe nanüiki na wayuukana nümüin Sansón soʼu tü akaratshikat kaʼi, süpülapünaa nikeroluin chi kaʼikai:

Anuukalaka nünüiki Sansón neʼipajee:

19 Süntakalaka tü nüpülainkat Jehová naaʼumüin Sansón, katchinkalaka maʼin nia sutuma. Oʼunushijeseʼe nia suluʼumüin tü mmakat Asquelón, nuʼutaka naaʼin apünüin nekii wayuu, naakataka tü nasheʼinkat jee naapaka shia namüin na wayuu aküjakana jamaluʼuluin tü nüsakirakalü anain. Jashichikalaka maʼin Sansón sünain oʼunaa nipialuʼumüin chi nüshikai.

20 Saapünaka tü nuʼwayuusekat Sansón nümüin wanee wayuu eejachikai naʼaka na jimaʼalii ekaakana paala nümaa Sansón.