Jueces

17 Eejachikalaka wanee wayuu kanüliashi Miqueas, kepiashi chia wayuukai saaʼu tü uuchi eejanale kepiain na nüikeyuukana Efraín. 2 Anuukalaka nünüiki sümüin tü niikat: «¿Sotusü paaʼin tü 1.100 nneerü aainjuushika süka pülaata aʼluwajünakat puulia jee tü puchuntakalü aaʼujee sülatajatüin kasa mojusü sümüin wayuu? Anuusa tamaʼana tia nneetkat, taya aapaaka». Anuujeseʼe sünüiki tü niikat saapaiwaʼaya tia nümakat: «Kasataalejeseʼe anakuwaʼipalin chi tachonkai nutuma Jehová». 3 Niiteʼerakalaka tü nneetkat sümüin tü niikat. «Takatalüinjatü tü tanneetsekat nümüin Jehová. Anasü paainjale süka tü nneetkat shiyaakua maleiwayaasü, pünneetseipa tü nneetkat», sümakalaka tü niikat nümüin.

4 Niiteʼerapa tü nneetkat sümüin tü niikat, sükatalaka 200 nneerü aainjuushika süka pülaata, saapakalaka shia nümüin chi wayuu akumajawaikai wanee kasa süka pülaata. Naainjakalaka süka piamasü shiyaakua maleiwayaasü, shiʼitaanakalaka tia suluʼu nipia Miqueas. 5 Eejatkalaka wanee aʼwaajülee suluʼu nipia Miqueas. Naainjainjeseʼe wanee kuluulu kanüliasü efod* sümaʼaleeya waneirua shiyaakua maleiwayaasü,* nüneekakalaka wanee nüchon süpüla niainjachin sacerdotein. 6 Nnojoishi jaralin aluwataain naaʼu na israelitakana soʼunnaa tia, shia neʼe naaʼinraka tü anakat saaʼin namüin.

7 Eejachikalaka wanee jimaʼai nülüin Judá, napüshi na nüikeyuukana Leví, kepiapuʼukai suluʼu tü mmakat Belén, tü chakat Judá. 8 Nuʼunakalaka chia wayuukai suluʼujee tü mmakat Belén, tü chakat Judá sünain achajawaa eeinjachire kepiain nia. Noʼotokoloko nipialuʼu Miqueas, saaʼu tü uuchi eejanale kepiain na nüikeyuukana Efraín. 9 «¿Jalejeʼewaisaʼa pia?», nümakalaka Miqueas nümüin. «Napüshi taya na nüikeyuukana Leví, chejeʼewai taya suluʼujee tü mmakat Belén, tü chakat Judá. Achajaashi taya süchiki eeinjachire kepiain taya», nümakalaka chi jimaʼaikai nümüin. 10 Anuujeseʼe nünüiki Miqueas nümüin: «Anashi yaale pia wamaa süpüla püküjain wamüin tü waaʼinrajatkat* otta süpüla sacerdoteinjachin pia. Taapeetkalaka pümüin juyawai poloo nneerü aainjuushika süka pülaata, kasheʼinjeechi pia tatuma otta ekeechi pia tamaa». Makatakalaka chia jimaʼaikai nipialuʼu Miqueas. 11 Anashiikalaka nümüin chi jimaʼaikai makatajachin nia nipialuʼu Miqueas, makaʼa nia maʼaka naaʼin wanee nüchon nümüin. 12 Nüneekünakalaka nutuma Miqueas chi jimaʼai napüshikai na nüikeyuukana Leví süpüla sacerdoteinjachin nia. Yalaichikalaka nia kepiain nümaʼana Miqueas. 13 «Aluʼu kamaneejeechin Jehová tamüin, jama niain sacerdotein tatuma wanee wayuu napüshikai na nüikeyuukana Leví», nümakalaka Miqueas.