Jueces

18 Soʼunnaa kaʼikat tia nnojoishi jaralin aluwataain naaʼu na israelitakana. Nachajaakalaka na nüikeyuukana Dan jalainjanain kepiain naya, nayaʼala neʼe nnojoliikana apaajaanüin apüla mma saʼakajee tü eʼirukuukat Israel.

2 Nayasaʼa na nüikeyuukana Dan, naneeküin jaʼraishii wayuu süpüla nanaʼlaainjanain sümüin tü mma eere kepiain na nüikeyuukana Efraín. Yalayala aaʼinchii naya wayuukana jee chejeʼewalii naya suluʼujee tü mmakat Zorá otta Estaol. Anuujeseʼe pütchi namüin: «Juʼuna sünain anaʼlawaa sümüin tia mmakat». Natunkaapünaaka nipialuʼu Miqueas nantapa saaʼumüin tü uuchi eere kepiain na nüikeyuukana Efraín. 3 Pejepa naya sünain nipia Miqueas nayaawatakalaka nümüraluʼu chi jimaʼai napüshikai na nüikeyuukana Leví. Oʼunushiijeseʼe naya eejachire nia sümaa namüin nümüin: «¿Jamakuwaʼipaisaʼa pia yaamüin? ¿Kasa paainjaka yaʼayaa? ¿Kasa yaaka ayaaluʼu pia?». 4 Nüküjainjeseʼe chi jimaʼaikai namüin tü naaʼinrakat Miqueas nüpüleerua jee nümakalaka namüin: «Nüsakajüin taya Miqueas süpüla sacerdoteinjachin taya». 5 Nüsakinnaka chi jimaʼaikai natuma sünain maa: «Püsakira maa chi Maleiwakai aneerüle wakuwaʼipa sünain tü waaʼinrajatkat». 6 «Aneeriaʼaya jukuwaʼipa, juʼuna jümaala, eeshi Jehová jümaa», nümakalaka chi sacerdotekai namüin.

7 Oʼunushiijeseʼe na jaʼraishiikana wayuu jee nantaka suluʼumüin tü mmakat Lais. Neʼrakalaka laülaain saaʼu nakuwaʼipa naya wayuukana maʼaka naaʼin na sidoniokana. Nnojotsü kasain ekeʼejüin naaʼin jee nnojotsü eein wanee kasa shapaaka atuma naaʼin, jama nnojolin eein wanee wayuu eʼrakai wayumüin namüin. Wattasü nepia noulia na sidoniokana jee nnojoishii naya paaʼinwain sümaa wayuu suluʼujeejatkat wanee pueulo.

8 «¿Jamakaʼa jukuwaʼipa chejee?», namünaka natuma na nawalayuukana nantapa suluʼumüin tü mmakat Zorá otta Estaol. 9 Anuukalaka nanüiki naya wayuukana: «Jooʼuya washutai naaʼu naya wayuukana, anasü maʼin tia noumainkat. Nnojo wainmajüin jaaʼin, jooʼuya washutamaatai naaʼu, wasüteetkalaka tü noumainkat. 10 Wantapeena chamüin jiʼreerü nnojoluin eein wanee kasa shapaaka atuma naaʼin naya wayuukana jee miyoʼu noumain. Naapüitpa wamüin Maleiwa wanee mma eeka aluʼu kasa süpüshuaʼa».

11 Noʼunakalaka 600 wayuu suluʼujee tü mmakat Zorá otta Estaol. Napüshi naya na nüikeyuukana Dan, kaʼapülayaa müshii naya süpüla tü atkawaakat. 12 Nantakalaka suluʼumüin tü mmakat Judá jee noʼotokoloko süʼütpaʼa tü mmakat Quiryat-Jearim, «Mahané-Dan», müsüjeseʼe sümünüin tia mmakat maaʼulu yaa. Chasü shia wopumüin saaʼu tü mmakat Quiryat-Jearim. 13 Noʼunaka yalejee saaʼumüin tü uuchi eere kepiain na nüikeyuukana Efraín jee nantakalaka nipialuʼumüin Miqueas.

14 Nayasaʼa na jaʼraishiikana wayuu oʼunakana sünain anaʼlawaa sümüin tü mmakat Lais, nasakirüin na nawalayuukana sünain maa: «¿Jütüjaa aaʼu eein suluʼu miichikalüirua tüü, piamasü shiyaakua maleiwayaasü, wanee kuluulu kanüliasü efod jee shiyaakua maleiwayaasü? Jüneeka tü jaaʼinrajatkat süka tia». 15 Nashaʼwalaapünaaka naya wayuukana eere tia miichikat. Nayaka oʼunuin na jaʼraishiikana wayuu nipialuʼumüin chi jimaʼai napüshikai na nüikeyuukana Leví, kepiashi nia nüʼütpaʼa Miqueas. «¿Jaman waʼle? ¿Anayaashijeʼe pia?», namakalaka nümüin. 16 Nayakalaka makatüin soʼuluʼu tü miichikat na 600 wayuu nüikeyuukana Dan, kaʼapülajüshii naya süpüla tü atkawaakat. 17 Nekeroloko suluʼumüin tü miichikat na jaʼraishiikana wayuu süpüla nalüʼüjainjatüin tü piamasükat shiyaakua maleiwayaasü, tü kuluulu kanüliakat efod jee shiyaakua maleiwayaasü. Yalajachikalaka shaʼwatüin soʼuluʼu tü miichikat chi sacerdotekai namaʼaleeya na 600 wayuu kaʼapülajakana. 18 Nekerotokoloko suluʼu nipia Miqueas jee nalüʼüjakalaka tü piamasükat shiyaakua maleiwayaasü, tü kuluulu kanüliakat efod jee shiyaakua maleiwayaasü. «¿Jamüinjatkai türa jümüin?», nümakalaka chi sacerdotekai namüin. 19 Anuukalaka nanüiki naya wayuukana niʼipamüin chi jimaʼaikai: «¡Kaseesün! Koʼuta neʼe pia. Anashi puʼunule wamaa süpüla püküjainjatüin wamüin tü waaʼinrajatkat* jee sacerdoteinjachin pia. ¿Kasache anaka saaʼin pümüin? ¿Shiache anaka sacerdotere neʼe pia nümüin waneeshia wayuu? ¿Shiataapa anain aluʼu sacerdotere pia sümüin wanee eʼirukuu wattaka alii apüshi yaa Israel?». 20 Anashiikalaka tia nümüin chi sacerdotekai. Nuʼunakalaka namaa sümaa nülüʼüjaleeinña tü piamasükat shiyaakua maleiwayaasü, tü kuluulu kanüliakat efod jee shiyaakua maleiwayaasü.

21 Naleʼejakalaka naya wayuukana noumainpaʼamüin, palajanakalaka natuma na tepichicheinkana, tü namüʼlüinkat jee waneirua korolo kojutuka maʼin. 22 Wattapa na nüikeyuukana Dan suulia tü nipiakat Miqueas, noutkajaakalaka na wayuu kepiakana nüʼütpünaa Miqueas jee noushikajaakalaka nachiirua naya wayuukana, nasaʼwajakalaka naya. 23 Naʼwaatakalaka nachiirua na nüikeyuukana Dan, eirakaashiijeseʼe naya jee namakalaka nümüin Miqueas: «¿Kasaʼireeshikai pia? ¿Jamüshii puutkajeʼerakaʼa wayuukana naainnua?». 24 Anuujeseʼe nünüiki Miqueas namüin: «¿Jamüsü jülüʼüjakaʼa toulia tü maleiwa takumajakat jee jümaashi chi sacerdote tasakalakai? Eeyaai neʼe kasain jüpütüin tapüla. ‹¿Kasaʼireeshikai pia?›, jümataalainnapaka neʼe tamüin». 25 Anuujeseʼe nanüiki na nüikeyuukana Dan nümüin Miqueas: «Piyaawata pünüiki waʼle. Aʼürülajaashiitaa pooʼomüin noʼutku wayuukana naainnua, noʼuta aaʼinchitaa pia namaʼaleeya na wayuu kepiakana pümaa». 26 Ayatüshiijaʼaya aleʼejaain na nüikeyuukana Dan noumainpaʼamüin. Nüleʼejaakalaka Miqueas nipialuʼumüin niʼrapa wattain maʼin naalii na nüikeyuukana Dan noulialeʼeya na wayuu nümaajanakana.

27 Noʼunakalaka na nüikeyuukana Dan suluʼumüin tü mmakat Lais süchikijee nalüʼüjüin tü kasa nukumajirakat Miqueas jee süchikijee namaain chi sacerdote nüsakalakai paala. Nnojotsü eein wanee kasa ekeʼejaka naaʼin naya wayuukana suluʼu tia mmakat jee nnojotsü eein wanee kasa shapaaka atuma naaʼin. Noʼutakalaka naaʼin süka chajaruuta naya wayuukana jee naʼajüin tü pueulo eejanale naya kepiain. 28 Nnojotkalaka jaralüin akaalinjain naya wayuukana, jama wattajanain na sidoniokana noulia jee nnojoishii paaʼinwain naya sümaa wayuu kepiaka suluʼu wanee pueulo. Tü mmakat Lais chajatü shia eere tü patajatshii kanüliakat Bet-Rehob. Nakumajakalaka süchikuaʼa na nüikeyuukana Dan tia pueulokot jee kepiakalaka naya suluʼu. 29 «Dan», namakalaka sümüin tia pueulokot nünülialuʼu chi natuushikai, chi nüchonkai Israel. «Lais», münapuʼusü tia pueulokot. 30 Süchikijee tia, neʼitaakalaka shiyaakua tia maleiwayaasükat suluʼu tia pueulokot. Niakalaka naneeküin Jonatán, nülüin nia Guersom, chi nüchonkai Moisés. Naneeküin nia namaʼaleeya na nüikeyuukana süpüla sacerdoteinjanain naya namaanaleepaʼaya suluʼumüin wanee mma. 31 Ayatüsüjaʼaya chajatüin tia shiyaakuakat maleiwayaasü soʼunnaa chajatüin Siló tü miichi eere nuʼwaajünüin chi shiimainshikai suluʼu Maleiwain.