Palajatka karaloʼuta Samuel
3 Ayatüshia aʼyataain Samuel nümüin Jehová sümaa jülüjain nia naaʼin Elí. Soʼunnaa kaʼikat tia palitpuʼu na wayuu yootokana amaa Jehová otta palitpuʼu na wayuu eʼrakana wanee kasa nutuma Maleiwa.
2 Soʼu wanee kaʼi juʼlee müshi Elí suluʼu tü nutunkulekat, moʼupaʼasai nia. 3 Yalajachikalaka Samuel juʼletüin suluʼu tü miichi aʼwaajüleekat Jehová nnojoluiwaʼaya shiyokojoonuin tü ranpara sulujutkat nipia Maleiwa. Eejatü suluʼu miichikat tia, tü kojon shiyaawasekat süpansaajünüin pütchi nümaa Maleiwa. 4 Neenajünakalaka Samuel nutuma Jehová, «¿aa?», nümakalaka Samuel niʼipajee. 5 Nuwataakalaka Samuel nünainmüin Elí sümaa nümüin nümüin: «Anii taya taatchee». Anuujeseʼe nünüiki Elí nümüin: «Nnojoishi teenajüin pia, anashi piisalaale püchikuaʼa». Nisalaaka Samuel. 6 «Samuel», nümakalaka Jehová nüchikuaʼa nümüin Samuel. Awataashijeseʼe Samuel nüchikuaʼa nünainmüin Elí sümaa nümüin nümüin: «Anii taya taatchee». «Nnojoishi teenajüin pia tachonchee, piisalaa püchikuaʼa», nümakalaka Elí nümüin. 7 Nnojoishi eʼraajünüin maʼin Jehová nutuma Samuel soʼu tia otta nnojoishi yootuin Jehová nümaa. 8 Apünüintuaka neenajünüin Samuel nutuma Jehová sümaa nümüin: «Samuel», awataashijeseʼe Samuel nünainmüin Elí sümaa nümüin nümüin: «Anii taya taatchee».
Niyaawatakalaka saaʼu Elí niain Jehová eenajüin chi jintüikai. 9 Anuujeseʼe nünüiki Elí nümüin Samuel: «Piisalaa püchikuaʼa, anuu tü püküjainjatkat nümüin neenajüle pia püchikuaʼa: ‹¿Aa Jehová? Püküja maa tamüin, taapajüin pünüiki, püchepchia taya›, pümeechikaʼa nümüin». Niisalaaka Samuel nüchikuaʼa.
10 «¡Samuel, Samuel!», nümakalaka Jehová nüchikuaʼa nümüin Samuel. «Taapajüin pünüiki, püchepchia taya», nümakalaka Samuel nümüin. 11 Anuujeseʼe nünüiki Jehová nümüin Samuel: «Taaʼinrüinjatü yaa Israel wanee kasa keemaka maʼin, ainkuujeerü saaʼin wayuu saapapa süchiki tia. 12 Soʼu kaʼikat tia tekeraajeerü süpüshuaʼa tü kasa alatüinjatkat nümüin Elí otta tü alatüinjatkat sümüin nüpüshi. 13 Püküja maa nümüin Elí süsalainjanain naainjala na nüpüshikana süpüla kaʼikat süpüshuaʼa saalinjee mojutuin* taya namüin na nüchonniikana otta saalinjee nnojoliin nüchiaain naya. Nütüjaa aaʼulu Elí kasanainjeein tia makat. 14 Shiimain tü tamakat namüin na nüpüshikana Elí, nnojoleerü motuin taaʼin naainjala jaʼitairü noʼutuin saaʼin mürüt tamüin jee nasülajüle wanee kasa tamüin».
15 Nüchijiraakalaka Samuel waneemüin kaʼi. Nujutatkalaka supuettoʼuse tü miichi eere nuʼwaajünüin Jehová. Mmotshi nia seema aküjaa nümüin Elí tü kasa niʼrakat nutuma Maleiwa. 16 Anuujeseʼe nünüiki Elí nümüin Samuel: «Samuel, ¿jalashi pia tachonchee?». «Anii taya taatchee», nümakalaka Samuel nümüin. 17 Anuukalaka nünüiki Elí nümüin Samuel: «Püküja maa tamüin tü aküjünakat pümüin. Nnojo puunjulajüin süchiki tia toulia, ¿jaman? Süsaleechi pia nutuma Maleiwa nnojorüle püküjain süpüshuaʼa tü münakat pümüin». 18 Nüküjakalaka Samuel süpüshuaʼa tü münakat nümüin. «Aleinjatia tia nutuma Jehová. Anasü naaʼinrüle tü anakat saaʼin nümüin», nümakalaka Elí nümüin Samuel.
19 Najaʼapülaakalaka Samuel, anakuwaʼipaishi nia nutuma Jehová otta ekeraajüsü nutuma Maleiwa süpüshuaʼa tü nüküjakalü achiki Samuel. 20 Nayaawata aaʼu napüshuaʼa na israelitakana nüneekünüin Samuel nutuma Jehová süpüla nünüikimaainjachin nia. Nayaawata aaʼu tia napüshuaʼa na israelita chajanakana kepiain suluʼu tü mmakat Dan sünainmüinreʼeya Beer-Seba. 21 Ayatüsia shiʼrüin wayuu wanee kasa nutuma Jehová chaa Siló, jama chajatüin nüküjain Jehová nümüin Samuel tü nüchekakalü achiki. Müsü sukuwaʼipa tia nutuma Jehová süka chajatüin nüküjain nümüin Samuel tü naaʼinrajatkat.