Palajatka karaloʼuta Samuel
8 Laülaapa maʼin Samuel, naya nüneekaka na nüchonniikana süpüla nayainjanain anoutuin sukuwaʼipa wanee kasa namüin na israelitakana. 2 Joel nünülia chi nüchon miyoʼushikai otta Abías nünülia chi wane. Naya anoutawaika sukuwaʼipa wanee kasa suluʼu tü mmakat Beer-Seba. 3 Naatapejeʼe maʼin nakuwaʼipa na nüchonniikana Samuel, nnojotsü müin nakuwaʼipa maʼaka naaʼin chi nashikai. Suchuntaain naaʼin washirüü, naapaʼawalin wanee kasa eekai saapünüin namüin shiiʼiree nnojoluinjatüin lotuin sukuwaʼipa wanee kasa natuma otta nnojotsü lotuin sukuwaʼipa wanee kasa natuma nanoutajatpa shia.
4 Noutkajaakalaka mapa napüshuaʼa na laülaashiikana napüleerua na israelitakana, noʼunakalaka suluʼumüin tü mmakat Ramá, chaa nipialuʼumüin Samuel. 5 Anuujeseʼe nanüiki nümüin Samuel: «Laülaaichisaʼa pia otta naata maʼin nakuwaʼipa na püchonniikana puulia. Shiakalaka anain aluʼu püneeküle wanee wayuu aluwataainjachikai waaʼu jee anoutajachikai sukuwaʼipa wanee kasa wamüin, waluwataaneenaka aaʼu maʼaka suluwataanüin aaʼu wayuu sainküin mmakat». 6 Jashichikalaka Samuel wanaa sümaa namüin na israelitakana: «Püneeka wanee wayuu aluwataainjachikai waaʼu, nieechikalaka anoutuin sukuwaʼipa wanee kasa wamüin». Nuʼuraajakalaka Samuel nümüin Jehová. 7 Anuujeseʼe nünüiki Jehová nümüin Samuel: «Anasü paaʼinrüle tü nachuntakat pümüin na israelitakana, nnojoishi piain nayoutuin achiki süpüla puluwataainjachin naaʼu, taya nayoutaka achiki. 8 Shiaʼaya neʼe naaʼinraka tamüin maaʼulu tü naaʼinrakat tamüin soʼujeʼereeya tü kaʼi tasaajakalü oʼu naya Egiptojee. Akayalaʼawaishii naya toulia jee aʼwaajüshii maleiwayaasü, müshiijeseʼe nakayalaain puulia maaʼulu. 9 Paaʼinra tü nachuntakat pümüin, püküjainjatpejeʼe namüin tü kasa eejeetkat sünainjee tü keeʼireekat naaʼin. Püküja namüin tü achuntuneetkat namüin nutuma chi aluwataainjachikai naaʼu».
10 Yootokoloko Samuel namaa na israelita achuntakana wanee wayuu aluwataainjachikai naaʼu jee nüküjakalaka namüin süpüshuaʼa tü nümakat Jehová. 11 Anuujeseʼe nünüiki Samuel namüin: «Anuu tü naaʼinrajatkat jümüin chi wayuu aluwataainjachikai jaaʼu: nümaajeena na jüchooinkana süpüla nayainjanain chupeerüin nümüin suluʼu tü neʼejena nütkaayakat, nüneekeena waneinnua süpüla amoʼuinjanain naya otta eejeena na nüneekakana süpüla nawanaajüin süpüleerua neʼejena. 12 Eejeena na nüneekakana süpüla shikiipüʼüinjanain naya nusurulaatse, eejeena na nekiipüʼükana 1.000 surulaat otta na nekiipüʼükana jaʼrai nekii surulaat. Eejeenapejeʼe na nüneekakana süpüla najaralüin tü niyüüjainkat jee nakotchojüin süchon nüʼttia. Eejeena na nüneekakana süpüla nakumajüin naʼapüla süpüla atkawaa otta eejeena na akumajakana sukorolo tü neʼejenakat. 13 Nümaajeena na jüchooin jieyuukana süpüla naainjainjanain koloonia,* süpüla naʼlakajaalinjanain jee naainjülinjanain pan. 14 Nüsüteerü juulia wanee yüüja eekai anain maʼin, nüsüteerü juulia wanee yüüja eere süpünajünüin uuwa otta eere süpünajünüin olivo, naapeetkalaka shia namüin na nüchepchiakana. 15 Saʼakajee poloosü* toleeka trigo naapaʼawaleerü waneesia juulia chi aluwataainjachikai jaaʼu jee saʼakajee poloosü kanaasüta uuwa naapaʼawaleerü waneesia juulia, naapeetkalaka shia namüin na wayuu aʼyataakana niʼipajee. 16 Amaaneena na jüchepchiakana nutuma, nülüʼüjeerü tü saʼanainkat jüsachirat, nülüʼüjeerü jüpüliiküse süpüla niʼyateʼerüin shia. 17 Naapaajeerü süpüshi tü jürüleejüinkat* jee nüchepchieenakalaka jia. 18 Eejeerü tü kaʼi ‹aluʼutaʼaleeshiijaʼa waya wachuntaka wanee wayuu makai akuwaʼipa süpüla niainjachin aluwataain waaʼu›, jümeenakalü oʼu, nnojoleetpejeʼe kasajatüin jünüiki nümüin Jehová juchuntapa kaalinwaa nümüin».
19 Nnojotpejeʼe kasajatüin namüin na israelitakana tü nümakat Samuel namüin jee namakalaka nümüin: «Jaʼitasü, choʼujaashiaʼaya wamüin wanee wayuu aluwataainjachikai waaʼu. 20 Wanaaweetkalaka wakuwaʼipa sümaa tü wayuu eekat sainküin mmakat, nieechi anoutaka sukuwaʼipa wanee kasa wamüin chi wayuu waneeküinjachikai süpüla aluwatawaa waaʼu, nieechi oʼuniraka wakuwaʼipa otta nieechi atkaaka namaa na waʼünüükana». 21 Nüküjakalaka Samuel nümüin Jehová süpüshuaʼa tü namakat na israelitakana. 22 Anuujeseʼe nünüiki Jehová nümüin Samuel: «Paaʼinra tü namakat, püneeka namüin wanee wayuu aluwataainjachikai naaʼu». «Anashii jüleʼejüle waneʼewai jukua chaa juumainpaʼamüin», nümakalaka Samuel namüin na laülaashiikana naaʼu na israelitakana.