Palajatka karaloʼuta Samuel
30 Nüntakalaka David namaa na wayuu nümaajanakana suluʼumüin tü mmakat Ziclag soʼu tü apünüinkat kaʼi, ashutuna aaʼu nachikiruʼu tü mmakat Négueb* sümaa tü mmakat Ziclag, shiapejeʼe naʼajüin na amalequitakana tü mmakat Ziclag. 2 Amaanüshii napüshuaʼa naya wayuu sulujunakana tia mmakat natuma na amalequitakana, amaanüshii na jieyuukana, amaanüshi chira eekai miyoʼuin jee chira eekai joʼuuin, nnojoliipejeʼe naya oʼutunuin aaʼin. 3 Nüntapa David namaa na wayuu nümaajanakana suluʼumüin tü mmakat Ziclag, neʼrüin saʼajünüin tü pueulokot natuma na amalequitakana jee sümaanüin naʼwayuuse namaʼaleeya nachonnii. 4 Aʼyalajüshi maʼin David namaa na wayuu nümaajanakana sutuma tü kasa alatakat namüin, ajaʼlajüsü naaʼin sünain aʼyalajaa. 5 Sümaanaka natuma na amalequitakana tü piamasükat nuʼwayuuse David, Ahinoam tü chejeʼewatkat Jezreel otta Abigaíl, Nabal nünülia chi suʼwayuusepuʼukai, outushi nia, chejeʼewai nia suluʼujee tü mmakat Carmelo. 6 Shapaasü maʼin naaʼin David süka nüʼinnaʼaneein süka ipa natuma na wayuu nümaajanakana. Üttüsü maʼin naaʼin naya wayuukana naalinjee nachonnii. Akatsüinnapejeʼe naaʼin David nutuma Jehová, chi Nümaleiwasekai.
7 Anuukalaka nünüiki David nümüin chi sacerdote kanüliakai Abiatar, chi nüchonkai Ahimélec: «Püsaaja maa tamüin tü kuluulu kanüliakat efod». Nüntirakalaka Abiatar tia kuluutkat. 8 Asakinnüshijeseʼe Jehová nutuma David sünain maa: «¿Oushikajaashiche paala taya nachiirua na kaʼruwaraliikana? ¿Tasaʼwajeenache naya?». Anuujeseʼe nünüiki Maleiwa nümüin: «Anashi puushikajaale nachiirua, püsaʼwajeena naya otta püsüteerü süpüshuaʼa tü kasa nalüʼüjakat puulia».
9 Nuʼunamaataka David namaa 600 wayuu nümaajana sünain oushikajawaa nachiirua na amalequitakana jee nantaka suluʼu tü luwopu chakat Besor. Makatakalaka waneinnua wayuu nümaajana David suluʼu tia mmakat. 10 Nuʼunakalaka David namaa 400 wayuu, napütüükalaka 200. Mapüsajüshii maʼin naya süpüla nalatüinjatüin tü luwopu chakat Besor.
11 Nayasaʼa na wayuu nümaajanakana David, nanta anainchi wanee wayuu chejeʼewai Egipto, namaaka nia nümaʼanamüin David, nekirüin nia jee nasiʼrüin wüin. 12 Nekirüinña nia piamasü saʼatachein uva pasa achuwerajuushi otta wanee saʼatachon higo achuwerajuushi. Akatsüinraasü naaʼin chia wayuukai nikapa, jama meküin nia jee masüin nia wüin soʼu apünüin kaʼi jee soʼu apünüin ai. 13 Anuujeseʼe nünüiki David nümüin chia wayuukai: «¿Jalejeʼewai pia?¿Jara kachepchiaka pia?». Anuukalaka nünüiki chi achepchieekai nümüin David: «Chejeʼewai taya Egipto, nüchepchia taya wanee amalequita. Nüpünaain taya chi talaamainkai saalinjee ayuulin taya, apünüinchi taya kaʼi ayuulin. 14 Ashutushii waya uuchimüin saaʼu noumain na keretitakana, uuchimüin saaʼu noumain na chajanakana Judá otta uuchimüin saaʼu nuumain Caleb, shiaka waʼajüin tü mmakat Ziclag». 15 Anuukalaka nünüiki David naapaiwaʼaya nünüiki chia achepchieekai: «Anashi piʼikajaale taya eere jutkatüin na kaʼruwaraliikana». Anuujeseʼe nünüiki chi achepchieekai nümüin: «Teʼikajaweechi pia eere jutkatüin naya wayuukana püküjale tamüin nuʼupala Maleiwa nnojoleechin puʼutuin taaʼin jee nnojoleerüin paapüin tekii nümüin chi talaamainkai».
16 Ni’ikajaanakalaka David nutuma chia achepchieekai. Niʼrüinjeseʼe David naya wayuukana süpaʼapünaa tia mmakat, ekaashii jee asaashii naya. Talatüshii maʼin naya saaʼujee wattain saalii tü kasa nasütakat noulia na filisteokana otta noulia na wayuu chajanakana Judá. 17 Nushutaka David naaʼu naya wayuukana. Oʼttatüjüi nia sünain ashutaa naaʼu maaliajee sünainmüinreʼeya aipaʼa.* 400 neʼe na wayuu isajakana süka napantajeʼerüin kameeya. 18 Nülejüin David süpüshuaʼa tü kasa asütünakat nuulia natuma na amalequitakana jee nülejüinña tü piamasükat nuʼwayuuse. 19 Kottusü süpüshuaʼa tü kasa asütünakat noulia, kottushii nachonnii jee kottusü tü kasa namaʼanajatkat. Nülejüin David süpüshuaʼa tü kasa asütünakat paala nuulia. 20 Nümaasü David süpüshuaʼa tü anneerü jee tü paaʼa namüʼlüinkat na amalequitakana. Suʼuninnaka natuma na wayuu nümaajanakana David, palajanasü shia natuma süpüleerua tü namüʼlüinkat. «Nukorolo David süpüshuaʼa tü makat», müshii na wayuu nümaajanakana David.
21 Nüleʼejakalaka David eejanale na 200 wayuu makatakana suluʼu tü luwopu chakat Besor sutuma mapüsajüin maʼin naya. Napanapajaka David namaa na wayuu nümaajanakana. Nasakinnakalaka naya wayuukana nutuma David anale naya. 22 Eejana waneinnua wayuu mojulaashii jee nnojoliikana kasain anain apüla naʼaka na wayuu oʼunakana nümaa David sünain atkawaa, anuukalaka nanüiki: «Nnojotsü kasainjatüin waapüin namüin nala wayuukana. ¿Joujanasa oʼunuin naya wamaa? Shieerü neʼe weiteʼeraka namüin naʼwayuuse jee nachonnii, noʼunamaataiwa». 23 Anuujeseʼe nünüiki David namüin: «Tawalayuwaa, nnojotsüsa anain tü jaainjeekalü amüin, nnojoishii icheinjanain jia saaʼu tü kasa naapakat wamüin Jehová. Naaʼinmajüin waya noulia na wayuu ashutakana waaʼu otta naapa ekiichii naya wamüin. 24 Nnojoleechi jaralin wanaawain aaʼin jümaa müle sukuwaʼipa tia jutuma. Wanaawainjatü tü aapünakat nümüin wanee wayuu, jaʼitashi chajachire nia sünain atkawaa jee yaajachire nia sünain anajaa saaʼu tü kasa eekat wamaʼana». 25 Nüʼikaleʼera ekiirü tia David süpüla müinjatüin sukuwaʼipa atumawaa, ayatayülia oonoonüin amaa tia natuma na israelitakana.
26 Nüleʼejapa David suluʼumüin tü mmakat Ziclag nuluwataain süpüshi tü kasa nüsütakat noulia na amalequitakana. Nuluwataain shia namüin na laülaashii chajanakana Judá, naʼaleewainyuu na makana. Anuu nünüiki namüin: «Anuu taluwataain jümüin tü kasa wasütakat noulia na nüʼünüükana Jehová». 27 Nuluwataain shia namüin na chajanakana Betel, namüin na chajanakana Ramot, tü chakat Négueb, namüin na chajanakana Jatir, 28 namüin na chajanakana Aroer, namüin na chajanakana Sifmot, namüin na chajanakana Estemoa. 29 Nuluwataainña shia namüin na chajanakana Racal, namüin na chajanakana suluʼu noumain na jerahmeelitakana, namüin na chajanakana suluʼu noumain na quenitakana, 30 namüin na chajanakana Hormá, namüin na chajanakana Borasán, namüin na chajanakana Atac, 31 namüin na wayuu chajanakana Hebrón otta namüin napüshuaʼa na wayuu nüntapünaakana amaʼana David namaa na wayuu nümaajanakana.