Chiiruaajatka karaloʼuta Samuel
6 Nuutkajeʼerakalaka David nachikuaʼa 30.000 surulaat atüjakana maʼin atkawaa naʼakajee na surulaat chajanakana Israel. 2 Nuʼunakalaka David namaʼaleeya na wayuu nümaajanakana suluʼumüin tü mmakat Baale-Judá sünain asaajaa tü Kojon shiyaawasekat süpansaajünüin pütchi nümaa chi shiimainshikai suluʼu Maleiwain. Palajanashii na wayuukana süpüleerua tü Kojonkot sünain aʼwaajaa Jehová, chi laülaashikai naaʼu na aapiee chakana iipünaa, chi makai joyotokoi naaʼin naaʼu na querubínkana. 3 Süsaajünakalaka tü Kojon shiyaawasekat süpansaajünüin pütchi nümaa chi shiimainshikai suluʼu Maleiwain nipialuʼujee Abinadab, kepiashi nia saaʼu wanee namüna. Sülüʼüjünaka suluʼu wanee kareeta jeketü, nia alüʼüjaka shia Uzá otta Ahió, nüchonnii naya Abinadab.
4 Sülüʼüjünaka tü Kojon shiyaawasekat süpansaajünüin pütchi nümaa chi shiimainshikai suluʼu Maleiwain nipialuʼujee Abinadab, kepiashi nia saaʼu wanee namüna. Niakaʼa oʼunuin süpüleerua tü Kojonkot Ahió. 5 Ayonnajüshi David otta eeʼirajüshi nia wanaa namaa napüshuaʼa na israelitakana nümüin Jehová. Atalejünüsü soʼu tia tü kanüliakat arpa, pandereta, sistro, címbalo jee aʼyalajinnüsiaʼaya tü kasa akumajuushikat süka tü wunuʼu kanüliakat enebro jee atalejünüsü tü kanüliakat ‹instrumentos de cuerda›. 6 Shiasaʼa wanaa maʼin sümaa eere suwaajünüin tü süchonkat nuʼttia Nacón, naapaapünaain Uzá tü Kojonkot, jama sujutuutaairüinje sutuma tü paaʼa tooloyuu alüʼüjakat shia. 7 Naashichijaakalaka Jehová nooʼomüin Uzá. Nuʼutunaka aaʼin Uzá nutuma chi shiimainshikai suluʼu Maleiwain saaʼujee mojutuin nümüin tü nuluwataakalü anain. Outaka Uzá süʼütpaʼa tü Kojon shiyaawasekat süpansaajünüin pütchi nümaa chi shiimainshikai suluʼu Maleiwain. 8 Jashichikalaka David saalinjee naashichijaain Jehová nooʼomüin Uzá. «Pérez-Uzá», ayatayütkalaka sümünüin amüin tia mmakat. 9 Niimolojooko David neema Jehová noʼu kaʼikai chia jee nümakalaka: «¿Jamataalainjatka tatuma sukuwaʼipa süpüla talüʼüjain tü Kojon shiyaawasekat süpansaajünüin pütchi nümaa Jehová?». 10 Nnojotkalaka nüntireein David tü Kojon shiyaawasekat süpansaajünüin pütchi nümaa Jehová eejachire kepiain David. Nülüʼüjirüinjeseʼe shia nipialuʼumüin Obed-Edom, chi chejeʼewaikai Gat.*
11 Apünüin kashi chajatka oʼu tü Kojon shiyaawasekat süpansaajünüin pütchi nümaa Jehová nipialuʼu Obed-Edom. Wainma kasa anasü niʼraka nutuma Jehová Obed-Edom otta na wayuu nipialujunakana. 12 «Watta saalii kasa anasü niʼraka Obed-Edom namaʼaleeya na nipialujunakana. Anakuwaʼipatsiaʼaya tü kasa eekat nümaʼana nutuma Jehová sutuma chain nipialuʼu tü Kojon shiyaawasekat süpansaajünüin pütchi nümaa chi shiimainshikai suluʼu Maleiwain», süküjünakalaka tia nümüin David. Talatüsü maʼin naaʼin David sünain asaajaa tü Kojonkot nipialuʼujee Obed-Edom süpüla nülüʼüjain shia suluʼumüin tü «Nupueuloinkot David», sümaka amüin wayuu. 13 Nakoyotpa mamüin aka saaʼin tüsa na wayuu alüʼüjakana tü Kojon shiyaawasekat süpansaajünüin pütchi nümaa Jehová, nuʼutakalaka David naaʼin wanee paaʼa toolo otta wanee paaʼachon akaüsijuushi.
14 Talatüsü maʼin naaʼin David, leeyatüshi neʼe nia sünain ayonnajaa nümüin Jehová. Eejatü nünain wanee kuluulu kanüliaka efod aainjuushi süka lino. 15 Aʼwaatüshi David namaʼaleeya na israelitakana, talatüshii maʼin naya jee aʼyalajinnüsü tü suʼuwakat mürüt sülüʼüjünapa tü Kojon shiyaawasekat süpansaajünüin pütchi nümaa Jehová. 16 Süntinnapa tü Kojon shiyaawasekat süpansaajünüin pütchi nümaa Jehová suluʼumüin tü Nupueuloinkot David, shiirakaakalaka Mical suluʼupünaa tü wentaanakat, eirakaasü shia wünapümüin, shiʼrakalaka David sünain ayonnajaa nümüin Jehová sümaa leeyatüin nia. Üttakalaka saaʼin Mical nünain David. 17 Yapatüjülia nutuma David wanee miichi eeinjatüle shiʼitaanüin tü Kojon shiyaawasekat süpansaajünüin pütchi nümaa Jehová, shiʼitaanaka tia Kojonkot suluʼu tü miichikat. Nuʼutakalaka David saaʼin mürüt sümaa naʼajüin shia nümüin Jehová jee nüsülajüinña nümüin wanee kasa anajiraainjatka aaʼujee wayuu nümaa Maleiwa. 18 Nuʼutapa David saaʼin mürüt sümaa naʼajüin shia nümüin Maleiwa jee nüsülajapa nümüin Maleiwa tü kasa anajiraainjachikalü aaʼujee nia nümaa, oʼuraajüshi nia nünülialuʼu Jehová süpüla anakuwaʼipaliinjanain na israelitakana. 19 Naapüinña David namüin napüshuaʼa na israelitakana wanee pan koʼoyoochonsü, wanee saʼatachon «dátil» achuwerajuushi otta wanee saʼatachon uuwa jososü achuwerajuushi, naapüin tia nümüin chira eekai tooloin jee sümüin türa eekai jierüin. Noʼunayaa namaka na wayuukana nepialuʼumüin.
20 Nüntakalaka David nipialuʼumüin sünain oʼuraajaa nümüin Maleiwa süpüla anakuwaʼipaliinjanain na nüpüshikana, süpanapajüinjeseʼe nia Mical, tü nüchonkat Saúl jee sümakalaka nümüin: «Eetaayaai japülin pia, piapejeʼe laülaain naaʼu na israelitakana, paakatüin tü saajunakat püsheʼin noʼupala na jieyuu nachepchiakana na aʼyataashiikana pümüin. Malasaʼatakatche maʼin pia». 21 Anuujeseʼe nünüiki David sümüin Mical: «Talatüsü maʼin taaʼin nutuma Jehová. Nüneeküin taya süpüla aluwatawaa nuulia chi püshikai jee noulia nüpüshi chi püshikai, nüneeküin taya süpüla tayainjachin nekiipüʼüin na nüpüshikana Jehová, na israelitakana. Ayateetkalaka talatüin taaʼin nutuma Jehová. 22 Maapülinrejeechia taya jee taaʼinreerü waneirua kasa atüjaaneetka anainjee nnojoluin tountuin wanee kasa sükajee takuwaʼipa tamüiwaʼa. Kojuteechipejeʼe taya natuma na achepchiee püküjakana achiki». 23 Outusü Mical sümaa machooin shia, nüchon Saúl Mical.