Chiiruaajatka karaloʼuta Samuel

11 Aluwataanüshi Joab nutuma David süpüla najaʼttirüinjanain na ammonitakana, nuluwataainña David na nüchepchiakana nümaa Joab jee napüshuaʼa na surulaat israelitakana. Naaʼinrüin tia suʼttiajee tü juyakat,* soʼunnaa noʼunawalin na aluwataashiikana sünain atkawaa. Noutkajaka tü pueulokot Rabá, makatapejeʼe David Jerusalén.

2 Soʼu wanee kaʼi, shipiyuʼulaapa tü mmapaʼakat atamaashi David saaʼujee tü nücamainkat jee waraittaka nia saaʼu tü miichi eere kepiain nia. Niʼrüinjeseʼe wanee jiet oʼoojusü, anachonsü maʼin tia jietkat. 3 Nuluwataainjeseʼe David wanee wayuu süpüla nüsakirüinjachin süchiirua tia wayuukat, anuukalaka pütchi nümüin: «Bat-Seba sünülia tia wayuukat, nüchon Eliam jee nuʼwayuuse shia Urías, chi hititakai». 4 Nüsaajirüinjeseʼe shia David, shikerotokoloko Bat-Seba eejachire David, nüinkaakalaka sümaa. Alatüsü tia soʼunnaa nnojoluin wulein sukuwaʼipa,* suʼunakalaka shipialuʼumüin süchikijee tia.

5 Ipuotkalaka tia wayuukat jee suluwataakalaka sünüiki nümüin David sünain maa: «Ipuotsü taya». 6 Anuujeseʼe nünüiki David nümüin Joab nütüjaapa saaʼu ipuoluin Bat-Seba: «Püjüta tamüin Urías, chi hititakai». Ajütünüshijeseʼe Urías nutuma Joab nümaʼanamüin David. 7 Nüntapa Urías nüsakinnakalaka nutuma David anale Joab, anale na surulaatkana jee jamüirüin saaʼin tü atkawaakat. 8 Anuukalaka nünüiki David nümüin Urías: «Puʼuna pipialuʼumüin peemeraaiwa». Nujuʼitapa Urías nipialuʼujee chi aluwataashikai, suʼunamaatakala wayuu nüchiirua sünain aapaa nümüin tü nüsülajalaka chi aluwataashikai. 9 Nnojoipejeʼe oʼunuin Urías nipialuʼumüin, makatüshi nia sünain atunkaa soʼuluʼu nipia chi laülaashikai namaʼaleeya na nüchepchiakana chi laülaashikai. 10 Naapinnakalaka David sünain maa: «Nnojoishi oʼunuin Urías nipialuʼumüin». Anuukalaka nünüiki David nümüin Urías: «Wattajeejachi pia, ¿jamüshi nnojoikaʼa puʼunuin pipialuʼumüin?». 11 Anuukalaka nünüiki Urías nümüin David: «Suluʼusü wanee miichi aainjuushi süka loona tü Kojon shiyaawasekat nüpansaajüin nünüiki Maleiwa, kepiayaashii atumawaa loona na israelitakana jee na nüikeyuukana Judá. Ichaa Joab, chi taseñotsekai namaa na nüchepchiakana jutkatüin süpaʼa tü patajatshiikat. Nnojoireejaʼa süpüla toʼunajachin tepialuʼumüin sünain ekaa, asaa jee tainkaainjachin sümaa taʼwayuuse. Shiimain maʼin tü tamakat pümüin, nnojorüleejaʼa süpüla taaʼinrajatüin tia».

12 Anuukalaka nünüiki David nümüin Urías: «Anashi makatüle pia püchikuaʼa soʼukai, tajüteechikalaka pia wattaʼa». Makatakalaka Urías chaa Jerusalén soʼu kaʼikat tia jee makatüshia nia waneemüin kaʼi. 13 Neenajinnakalaka Urías nutuma David süpüla nikaainjachin nümaa jee nüsaainjachin. Nüsajinnakalaka wiino Urías nutuma David, nipeʼrakalaka. Nnojoishi oʼunuin Urías nipialuʼumüin shipiʼyuulaapa tü mmapaʼakat, makatüshi nia sünain atunkaa namaa na nüchepchiakana chi laülaashikai. 14 Nüshajakalaka David wanee karaloʼuta nümüin Joab wattaʼa maalü, nuluwataakalaka shia nümaa Urías. 15 Anuukalaka tü pütchi nüshajakat David suluʼu tia karaloʼutakat: «Puluwataa Urías naʼakamüin na surulaat atkaainjanakana palajana, eere jashichin maʼin tü atkawaakat. Jüpüteechikalaka nia nümüiwaʼa süpüla nuʼutunuin aaʼin».

16 Nünanajakalaka Joab saaʼu tü pueulo nushutuinjatkalü aaʼu. Nuluwataainjeseʼe Urías süpüla nütkaainjachin namaa na nüʼünüü yalayalakana aaʼin sünain atkawaa. 17 Nojuʼitapa na wayuu sulujunakana tü pueulokot sünain atkawaa namaa na nusurulaatsekana Joab, oʼutuna aaʼinchii waneinnua nusurulaatse David, oʼutuna aaʼinchiaʼaya Urías wanaa namaa naya wayuukana. 18 Nüküjirakalaka Joab nümüin David süpüshuaʼa tü kasa alatakat sünain tü atkawaakat. 19 Anuukalaka nünüiki Joab nümüin chi wayuu eʼikajaainjachikai tü pütchikat nümüin David: «Püküjapa nümüin chi laülaashikai süpüshuaʼa tü kasa alatakat sünain tü atkawaakat, 20 eeshijaʼa naashichijaajeechire jee nümeechire pümüin: ‹¿Jamüshii jürütkaʼaleeka maʼin sünainmüin tü pueulokot sünain atkawaa? ¿Aashin jütüjaain saaʼu jüʼitüneenain süka jatü saaʼujee süsepü tü pueulokot? 21 ¿Aashin jütüjaain saaʼu nuʼutunuin aaʼin Abimélec, chi nüchonkai Jerubéset sutuma wanee wayuu? Sujutuin wanee ipa asirujia saaʼu nikii, sujutuin shia saaʼujee süsepü wanee pueulo, outakalaka nia suluʼu tü mmakat Tebez. ¿Jamüshii jürütkaakaʼa maʼin sünainmüin süsepü tü pueulokot?›. ‹Oʼutuna aaʼinchi Urías›, pümeechikalaka nümüin müle nünüiki pümüin».

22 Nuʼunakalaka chi wayuu pütchimaajachikai nümaʼanamüin David, nüküjakalaka nümüin süpüshuaʼa tü pütchi nüküjirakat Joab nümüin. 23 Anuukalaka nünüiki chi wayuu eʼikajaakai tü pütchikat nümüin David: «Katchinreeshiʼiya woulia na wayuu atkaakana wamaa, ojuʼitushii naya anooipaʼamüin sünain tü pueulokot sünain atkawaa wamaa, wapüleerua aaʼinchii naya, wantiraleeinjeseʼe naya soʼuluʼumüin tü pueulokot. 24 Waʼinnaʼanakalaka süka jatü natuma na surulaatkana saaʼujee süsepü tü pueulokot, outakalaka napüshi na püchepchiakana. Outushiaʼaya Urías, chi hititakai». 25 Anuukalaka nünüiki David nümüin chi wayuu pütchimaajachikai naapapa tia pütchikat: «Anuu tü püküjainjatkat nümüin Joab: ‹Nnojo mojuin paaʼin sutuma tia, outawaisia wayuu sünain atkawaa. Pushutaʼaya naaʼu na wayuu suluʼukana tia pueulokot süpüla pükanajüinjanain naya›. Pükatchinrai naaʼin Joab».

26 Aʼyalajüsü maʼin tü nuʼwayuusekat Urías sütüjaapa saaʼu outuin nia. 27 Nüsaajirakalaka David Bat-Seba nütüjaapa saaʼu sülatüin tü kaʼi shiʼyalajakalü oʼu naalinjee chi suʼwayuusekai. Nuʼwayuusekalaka shia jee kachonkalaka shia nutuma. Mojupejeʼe maʼin nümüin Jehová tü naainjakat David.