Chiiruaajatka karaloʼuta Samuel
15 Süchikijee nukumajiraka Absalón wanee kareeta neʼejenainjatkat, nüsaajiraka ama otta nüneekaka jaʼrai nekii wayuu süpüla nawanaajüinjanain nüpüleerua. 2 Atamaʼawaishi wattaʼa maalü Absalón jee ashaʼwalaʼawaishi nia sotpaʼa tü wopu chaʼwatkat sünainmüin soʼu tü pueulokot. Nuʼunawaipa wanee wayuu nümaʼanamüin chi aluwataashikai süpüla nunoutajatüin tü kasa alatakat nümüin chia wayuukai, nuunejawalin nia Absalón sümaa nüsakirawalin nia sünain maa: «¿Jalejeʼewai pia?». Anuukalaka nünüiki chi wayuukai nümüin: «Napüshi taya na israelitakana». 3 Anuu tü nüküjawaikat Absalón sümüin wayuu: «Anasü tü kasa puchuntakat jee pansaasü shia, nnojoipejeʼe eein wanee wayuu nüneekakai chi aluwataashikai süpüla nunoutuinjatüin sukuwaʼipa tü kasa alatakat pümüin». 4 Anuu tü nüküjawaikat Absalónyaa: «Kasataalejeseʼe taneekünüin süpüla tanoutajatüin sukuwaʼipa wanee kasa suluʼu mmakat tüü. Anteerüje wayuu tamaʼanamüin eekai sülatüin amüin wanee kasa otta eekai mojujiraain saaʼujee wanee kasa, tanouteetkalaka sukuwaʼipa tia namüin».
5 Nürütkaʼawaipa wanee wayuu sünain ejepülawaa nümülatuʼu Absalón, niyurulawalin nütüna Absalón süpüla nütameʼerüinjachin nia jee nutuʼlawalin nuwalapaʼa. 6 Naaʼinrawalin tia Absalón napüleerua napüshuaʼa na israelita oʼunawaikana nümaʼanamüin chi aluwataashikai süpüla nunoutuinjatüin sukuwaʼipa tü alatakat namüin. Maʼwaisia sukuwaʼipa tia nutuma Absalón süpüla paaʼinwainjanain na israelitakana nümaa.
7 Anuujeseʼe nünüiki Absalón nümüin David sülatapa pienchi juya: «Anashi puuʼulaale toʼunuin suluʼumüin tü mmakat Hebrón, tekeraajaiwa tü tanüiki tapansaajatüjütkalia nümüin Jehová. 8 Anuu tü pütchi tapansaajakat nümüin Maleiwa chaiwaʼaya taya suluʼu tü mmakat Guesur, tü chakat Siria: ‹Piiteʼerüle taya tachikuaʼa Jehová suluʼumüin tü mmakat Jerusalén, tasülajeerü wanee kasa pümüin Jehová›, shia taküjaka achiki tia nümüin». 9 Anuujeseʼe nünüiki David nümüin: «Kasataalejeseʼe anain pukuwaʼipa». Oʼunushijeseʼe Absalón suluʼumüin tü mmakat Hebrón.
10 Nüjütakalaka Absalón waneinnua wayuu ojuunaa namaʼanamüin napüshuaʼa na israelitakana, anuu nünüiki namüin: «‹Niaichipa aneekünaka Absalón süpüla aluwatawaa naaʼu na wayuu suluʼukana tü mmakat Hebrón›, meerü jünüiki jaapapa shiʼyalajinnüin tü suʼuwakat anneerü». 11 Nantaka Hebrónmüin 200 wayuu nümaajana Absalón Jerusalénjee. Ounejaanüshii naya, nnojotpejeʼe natüjaain aaʼu kasain noʼunuin anain. 12 Keraapa Absalón süchikijee asülajaa kasa nümüin Maleiwa, nuunejirüin Ahitofel, chi chejeʼewaikai suluʼujee tü mmakat Guiló. Nia aküjawaikai Ahitofel nümüin David tü anakat süpüla naaʼinrüin. Nakooʼomüinraaka na wayuu aashajaakana nikiira chi aluwataashikai.
13 Shiasaʼa mapa nüntaka wanee wayuu sünain aapiraa David sünain maa: «Paaʼinwashii nümaa Absalón na wayuu chejeʼewaliikana Israel». 14 Anuukalaka nünüiki David namüin napüshuaʼa na nüchepchia chajanakana kepiain nümaa suluʼu tü mmakat Jerusalén: «Anashii waʼluwataale, nnojoleechi jaralin isajüin nuulia Absalón makatüle waya. Anashii juuntaale, nünteenasa aaʼu waya Absalón, eʼra müshiijaʼaya waya wamüliala nutuma jee nuʼuteena aaʼin süka chajaruuta napüshuaʼa na wayuu yaakana suluʼu pueulokot tüü». 15 Anuukalaka nanüiki nüchepchia chi aluwataashikai: «Waaʼinreeriaʼaya süpüshuaʼa tü kasa puluwataakalü anain waya». 16 Nuʼunakalaka chi aluwataashikai, oʼunushiʼiya nümaa na wayuu nipialujunakana. Nüpütapejeʼe poloosü suwalaʼata nuʼwayuuse miichaajuna. 17 Nuʼunakalaka chi aluwataashikai suluʼujee tü pueulokot namaʼaleeya na nüchepchiakana, nantakalaka suluʼumüin tü mmakat Bet-Merhac.
18 Niyaawajakalaka chi aluwataashikai napüshuaʼa na nüchepchiakana, niyaawajüin na keretitakana, na peletitakana otta na guititakana, 600 naya napüshuaʼaleʼeya, nümaajana naya suluʼujee tü mmakat Gat. 19 Anuukalaka nünüiki chi aluwataashikai nümüin Ittái, chi guititakai: «Anashi nnojoire puʼunuin wamaa. Püleʼeja püchikuaʼa, makateechikalaka pia nümaa chi jekechikai aneekünüin süpüla aluwatawaa, jama nnojolin israelitain pia jee amaanüshi pia puumainpaʼajee. 20 Mataashi püntakai aliikainka. Nnojotsü süpüla tachuntuinjatüin pümüin puʼunuinjachin tamaa soʼukai, jama nnojoluin tatüjaain saaʼu jalainjachin toʼunuin. Anashi püleʼejüle püchikuaʼa namaa na puwalayuukana. Kasataalejeseʼe nümülialaain Jehová paalin jee waneepiain nia pümaa». 21 Anuukalaka nünüiki Ittái nümüin chi aluwataashikai: «Laülaashikalee, shiimain maʼin tü tamakat pümüin nuʼupala Jehová, chi Maleiwa matüjainkai outaa. Oʼuneechi taya pümaa eepünaale puʼunuin, jaʼitashi toʼutunuin aaʼin wanaa pümaa». 22 Anuukalaka nünüiki David nümüin Ittái: «Anakajaʼa, anashijaʼamata puʼunule tamaa». Nuʼunakalaka Ittái namaa napüshuaʼa na wayuu nümaajanakana namaʼaleeya na nüchooinkana.
23 Naʼyalajakalaka maʼin na wayuu chejeʼewaliikana Jerusalén sümaa emetuluin maʼin nekiisa jee aʼyalajüshiʼiya na wayuu kepiakana süʼütpünaa tia pueulokot soʼunnaa neʼrüin nalatüin naya wayuukana. Shaʼwatakalaka chi aluwataashikai sotpaʼa tü luwopu chajatkat Cedrón jee nalataka naya wayuukana suluʼupünaa tia luwopukat. Oʼunushii naya suluʼupünaa tü wopu chaʼwatkat isashiipaʼamüin. 24 Eejachiaʼaya Sadoc naʼaka naya wayuukana jee eejanaʼaya napüshuaʼa na nüikeyuukana Leví, na alüʼüjakana tü kojon shiyaawasekat süpansaajünüin pütchi nümaa chi shiimainshikai suluʼu Maleiwain. Nashaʼwalaakalaka sümaa neʼitaain mmoluʼu tü Kojonkot. Antüshijeseʼe Abiatar soʼunnaa nalatüin napüshuaʼa naya wayuukana suluʼupünaa tü luwopukat. 25 Anuukalaka nünüiki David nümüin Sadoc: «Püleʼeja püchikuaʼa pueulopaʼamüin sümaa tü Kojonkot. Talatüle naaʼin Jehová tamaa nüleʼejireechi taya tachikuaʼa pueulopaʼamüin, teʼreetkalaka tü Kojonkot jee teʼreeriaʼaya tü miichi eere nuʼwaajünüin. 26 ‹Nnojotsü talatüin taaʼin pümaa›, nümüle tamüin Maleiwa, anasü naaʼinrüle taka tü naaʼinreekalü amüin». 27 Anuukalaka nünüiki chi aluwataashikai nümüin Sadoc: «¿Aashin piʼrüin kasa nutuma Maleiwa? Anashii juʼunule jüchikuaʼa pueulopaʼamüin. Kasataalejeseʼe anain jukuwaʼipa. Pümaa Ahimáaz, chi püchonkai otta Abiatar anashi nümaale Jonatán, chi nüchonkai. 28 Taʼatapajeena na wayuu juluwataakana eere epetüin tü süchikat, jaapiramaateechika taya jaapüle süchiki wanee eekai sülatüin». 29 Nüleʼejaakalaka Sadoc nümaa Abiatar Jerusalénmüin sünain alüʼüjaa tü Kojonkot, makatakalaka naya chayaa.
30 Niʼyalajakalaka maʼin David soʼu nuʼunuin saaʼumüin tü wutai kanüliakat Olivos. Masapaatsesai nia jee koʼoyoosü nikii, koʼoyoosiaʼaya nekii na wayuu oʼunakana nümaa jee aʼyalajüshii maʼin naya. 31 Anuukalaka nünüiki wanee wayuu nümüin David: «Aashajaajiraashi pikiira Ahitofel nümaa Absalón». Anuujeseʼe nünüiki David: «Jehovákalee, kasataalejeseʼe müin nünüiki Ahitofel maʼaka nünüiki wanee wayuu eekai malain».
32 Nüntapa David süraloʼumüin tü wutaikat eere nuʼwaajünapuʼuin Maleiwa sutuma wayuu, chajachikalaka Husái, chi arkitakai sünain aʼatapajaa nia. Nüchatajaakalaka Husái saajuna nüsheʼin jee mmasuakalaka nikiuuta. 33 Anuukalaka nünüiki David nümüin: «Puʼunule tamaa nnojoleechi jaloulin pia tamüin. 34 Jalouijeechipejeʼe pia tamüin puʼunule Jerusalénmüin sünain pümalajeʼerüin tü naainjeekat tamüin Ahitofel. Anuujeetkalaka pünüiki nümüin Absalón: ‹Püchepchia taya laülaashikalee, aʼyataainjachi taya pümüin mayaainjeʼe taʼyataapuʼuin nümüin chi püshikai›. 35 Cheechi pümaa Sadoc otta Abiatar, na sacerdotekana. Püküjawaijeerü namüin tü aküjünakat nipialuʼu chi aluwataashikai. 36 Cheechiaʼaya namaa Ahimáaz, chi nüchonkai Sadoc otta Jonatán, chi nüchonkai Abiatar. Nayeena juluwataaka süpüla naküjain tamüin wanee kasa eekai jaapüin achiki». 37 Aleewashi maʼin Husái nümaa David, antüshi nia Jerusalénmüin wanaa maʼin sümaa nüntüin Absalón suluʼumüin tia pueulokot.