Palajatka karaloʼuta Samuel
31 Natkaaka na filisteokana namaa na israelitakana, napantajaaka na israelitakana napüleerua na filisteokana. Watta naalii na israelita outakana soʼu tia saaʼu tü namüna kanüliakat Guilboa. 2 Nalüʼülaaka na filisteokana nüchiirua Saúl jee nachiirua na nüchooinkana, nuʼutunaka aaʼin Jonatán natuma na filisteokana, oʼutuna aaʼinchi Abinadab otta Malki-Súa, na nüchonniikana Saúl. 3 Nüpüleeruaanaka maʼin aaʼin Saúl natuma na filisteokana. Niʼnnaka Saúl natuma na surulaat jatümaajanakana, neʼitaka nia, pansaasü maʼin nülioʼu natuma. 4 Anuujeseʼe nünüiki Saúl nümüin chi wayuu alüʼüjawaikai tü kasa nütkaayakat: «Piyuʼla tü chajaruuta pümaʼanakat jee anashi piale asotuin taya süka nnojoluiwaʼaya nasotuin taya na wayuu nnojoliikana anoujain nünain Maleiwa jee suulia teʼrüin tamüliala natuma». Niyouta achikit tia chi wayuu alüʼüjawaikai tü kasa nütkaayakat Saúl süka mmoluin maʼin nia. Naapaainjeseʼe Saúl tü chajaruutakat, nünaataka shia nooʼomüin jee nujuttaka saaʼu. 5 Outapa Saúl niʼrüin chi wayuu alüʼüjawaikai tü kasa nütkaayakat, nünaataka tü chajaruutakat nooʼomüin jee nujuttaka saaʼu, outaka nia wanaa nümaa Saúl. 6 Outushi Saúl soʼu kaʼikat tia namaʼaleeya na apünüinshiikana nüchooin. Outushi chi wayuu alüʼüjawaikai tü kasa nütkaayakat Saúl jee müshiʼiya na wayuu nümaajanakana Saúl. 7 Napantajaayaa namaka na israelita chajanakana eekai tü nasapüshiikat jee na kepiakana suluʼu tü mma pejekat sünain tü süchikat Jordán naapaiwaʼaya süchiki napantajaayaa namüin na surulaat israelitakana jee naapapa süchiki outuin Saúl namaʼaleeya na nüchooinkana. Napütüin na israelitakana tü pueulo kalujunakana naya, nantaka na filisteokana nachikiruʼu jee kepiaka naya suluʼu tia pueulokot.
8 Shiasaʼa waneemüin kaʼi, noʼunakalaka na filisteokana sünain asaijaa tü kasa eejatkat namaʼana na outushiikana, neʼraka outuin Saúl namaʼaleeya na apünüinshiikana nüchooin. Outushii naya saaʼu tü namüna kanüliakat Guilboa. 9 Nachotooko nikii Saúl, naakataka nuulia tü nüsheʼin nütkaayakat. Naküjitkalaka suluʼupünaa noumain na filisteokana süchiki nakanajüin jee naküjirüinña tia suluʼupünaa tü miichi eere naʼwaajüin namaleiwase. 10 Neʼitaakalaka tia nüsheʼinkat Saúl suluʼu tü miichi eere suʼwaajünüin shiyaakua Astoret jee nakacheraka Saúl sünain süsepü tü pueulokot Bet-San. 11 Natüjaapa saaʼu na wayuu chajanakana suluʼu tü mmakat Jabés-Galaad tü naainjakat na filisteokana nümüin Saúl, 12 noʼunakalaka napüshuaʼa na surulaat chejeʼewaliikana suluʼujee tia mmakat sünain asaajaa Saúl namaa na nüchonniikana, eejanale nakachennüin sünain süsepü tü pueulokot Bet-San, siraasü aikat naaʼu sünain noʼunuin chamüin. Naleʼejakalaka suluʼumüin tü mmakat Jabés, naʼajakalaka naya chamüin. 13 Nojoitüin tü neipüsekat suupünaa tü wunuʼu kanüliakat tamarisco, tü chakat Jabés, naamajaka soʼu akaratshi kaʼi.