Palajatka karaloʼuta Samuel
27 «Nuʼuteechi aaʼin taya Saúl soʼu wanee kaʼi, anakajaʼa toʼunule noumainpaʼamüin na filisteokana nnojoleechika nüchajaain tachiki Saúl sainküinpünaa tü mmakat Israel jee nnojoleechika taya jamajüin nutuma», nümakalaka David suluʼu naaʼin. 2 Nüntakalaka David namaa na 600 wayuu nümaajanakana nümaʼanamüin Akís, chi nüchonkai Maoc, aluwataashi Akís saaʼu tü mmakat Gat. 3 Makataka David namaa na wayuu nümaajanakana suluʼu tü mmakat Gat, makatüshii naya sümaa napüshi. Eejatiaʼaya nümaa David tü piamasükat nuʼwayuuse, Ahinoam, tü chejeʼewatkat Jezreel otta Abigaíl, tü chejeʼewatkat suluʼujee tü mmakat Carmelo, Nabal nünülia chi suʼwayuusepuʼukai, outushi nia. 4 Nuuʼulaaka Saúl suulia nüchajaain nüchiki David nütüjaapa saaʼu nuʼluwataain suluʼumüin tü mmakat Gat.
5 Anuukalaka nünüiki David nümüin Akís: «Analejeʼeya saaʼin pümüin, anashi puuʼulaale kepiain taya suluʼu wanee pueulo eekai joʼuuchoin. Nnojoishi taya keraain süpüla kepiainjachin taya pümaa eere puluwataain». 6 Soʼu kaʼikat tia naapaka Akís nümüin David tü mmakat Ziclag. Ayatayülia noumain maaʼulu yaa na aluwataashiikana saaʼu tü mmakat Judá.
7 Wanee juya sünainmüin pienchi kashi chajachika kepiain oʼu David noumainpaʼa na filisteokana. 8 Ashutawaishi David namaa na wayuu nümaajanakana naaʼu na guesuritakana, naaʼu na guirzitakana otta naaʼu na amalequitakana. Kepiapuʼushii naya wayuukana suluʼupünaa tü mmakat Telam sünainmüinreʼeya tü mmakat Sur jee sünainmüinreʼeya tü mmakat Egipto. 9 Nushutawaipa David saaʼu tia mmakat, nuʼuta aaʼinrü wayuu süpüshuaʼa, nuʼuta aaʼinchi chira eekai tooloin jee türa eekai jierüin. Nümaasü namüʼlüin naya wayuukana, tü napaaʼasekat, tü napüliiküsekat, tü kameeya eejatkat namaʼana jee nasheʼin naya wayuukana. Nüleʼejawaika David nüchikuaʼa nümaʼanamüin Akís süchikijee tia. 10 Anuukalaka tü asakinnawaikalü anain David nutuma Akís: «¿Jaralii na wayuu pushutakana aaʼu soʼukai?». «Ashutushi taya naaʼu na wayuu chakana uuchimüin saaʼu Judá», eeshi nümüle David. «Ashutushi taya naaʼu na wayuu chakana uuchimüin saaʼu noumain na jerahmeelitakana», eeshi nümüle. «Ashutushi taya naaʼu na wayuu chakana uuchimüin saaʼu noumain na quenitakana», eeshi nümüleya. 11 Nuʼuta aaʼinchii David napüshuaʼa naya wayuukana süpüla nnojoliinjanain nümaain naya suluʼumüin tü mmakat Gat. «‹Müsüsa maʼin naainjala David›, namaleere», maʼwaishi David. Shiawai naaʼinraka David tia wanaa sümaa chajachin nia suluʼu noumain na filisteokana. 12 Nunoujain Akís nünüiki David jee maʼwaishi nia suluʼu naaʼin: «Aʼürülaanüichipa anain David natuma na israelitakana sünainjee tü naaʼinrakat, tachepchieechi nia waneepia».