Palajatka karaloʼuta Samuel

28 Noutkajaakalaka na filisteokana süpüla natkaainjanain namaa na israelitakana. «Oʼunajaisa pia tamaa sünain tü atkawaakat namaʼaleeya na wayuu pümaajanakana», nümakalaka Akís nümüin David. 2 «Pütüjaa aaʼu tü taaʼinrajatkat», nümakalaka David nümüin Akís. «Tatüjaa aaʼu, müshijeseʼe taneeküinjachin pia süpüla tawaariasein pia waneepia», nümakalaka Akís nümüin David.

3 Mojusü maʼin naaʼin na israelitakana outapa Samuel, niʼikünaka Samuel suluʼumüin tü mmakat Ramá, chaa nuumainpaʼa. Najaʼttirüin Saúl napüshuaʼa na ouutshiikana jee na ooʼulakülii eejanakana suluʼu tü mmakat Israel.

4 Noutkajaaka na filisteokana, noʼonooka suluʼumüin tü mmakat Sunem. Nuutkajeʼerüinjeseʼe Saúl na surulaat israelitakana jee noʼonooka saaʼumüin tü namüna kanüliakat Guilboa. 5 Niimolojooko Saúl niʼraiwaʼaya na filisteokana, kakuwajaaka naaʼin sutuma tia. 6 Mayaainjeʼe nuchuntawalin kaalinwaa Saúl nümüin Jehová, nnojoishi asoutuin Jehová nümüin sükajee lapü, sükajee tü kanüliakat «Urim» jee nakajee na nünüikimaajanakana. 7 «Anashii jüchajaale tamüin wanee ouutsü, tooʼulakirajatü süchiirua wanee kasa», nümakalaka Saúl namüin na nüchepchiakana. «Ichaasa wanee ouutsü suluʼu tü mmakat En-Dor», namakalaka na nüchepchiakana nümüin.

8 Naʼanaakalaka Saúl wanee kuluulu naata suulia tü nüsheʼinpalakat jee nuʼunakalaka saʼwai namaa piamashii wayuu shipialuʼumüin tü ouutsükat jee nümakalaka sümüin. «Anasü püsakirüle tamüin tü püseyuukat, tatüjaajeetka saaʼu tü alatajatkat mapeena. Puuneejeechika tamüin chi wayuu tachunteechikai anülia pümüin». 9 Anuujeseʼe sünüiki tia wayuukot nümüin: «¿Aashin pütüjaayaain saaʼu najaʼttiralein Saúl suluʼujee mmakat tüü, na ouutshiikana jee na ooʼulaküliikana? ¿Jamakaʼa puchuntaka tamüin makat aka saaʼin tüü? Pimeejeeinjaʼa neʼe taya süpüla toʼutünajatüin aaʼin». 10 Nüpansaajakalaka nünüiki Saúl sümüin nünülialuʼu Jehová sünain maa: «Shiimain maʼin tanüiki pümüin nuʼupala Jehová, chi Maleiwa matüjainkai outaa. Nnojoleerü süsalain pia atumawaa sünainjee tia», nümakalaka Saúl sümüin. 11 «¿Jaraikaʼa tounejüinjachin pümüin?», sümakalaka tü wayuukat nümüin. «Anashi puunejüle tamüin Samuel», nümakalaka Saúl sümüin. 12 Suʼwaataka tü wayuukot shiʼraiwaʼaya chi wayuu meematakai aka naaʼin Samuel* jee sümakalaka nümüin Saúl: «¿Jamüsü paʼalainpalaka taya, nnojotkalaka püküjain tamüin piain Saúluin?». 13 Anuujeseʼe nünüiki Saúl sümüin: «Nnojo mmoluin pia, püküja tamüin kasain piʼrüin». «Nia teʼraka wanee wayuu ayaleraakai iipünaamüin, müsü niyolojo maʼaka naaʼin wanee maleiwa», sümakalaka tü wayuukot nümüin Saúl. 14 «¿Jamüsü maʼin niyolojo chi wayuu piʼrakai?», nümakalaka Saúl sümüin. «Nia teʼraka wanee laülaa matünasat saajuna nüsheʼin», sümakalaka tü wayuukat nümüin. Niayaaka Samuel nüküjainruʼu Saúl chi shiʼrakai tü wayuukat, müshijeseʼe nüsapainkain nia mmoluʼu sümaa nejepülaain.

15 «¿Jamüshi pikeʼejakuʼu pümaka taaʼin?», nümakalaka Samuel* nümüin Saúl. Anuujeseʼe nünüiki Saúl nümüin: «Shapaasü maʼin taaʼin, ashutushii waaʼu na filisteokana. Akayalaashi Maleiwa toulia jee nnojoishi nia asoutuin tamüin. Nnojoishi nia asoutuin tamüin nakajee na nünüikimaajanakana jee sükajee lapü, müshijeseʼe tounejirüin pia süpüla püküjainjachin tamüin tü taaʼinrajatkat».

16 Anuujeseʼe nünüiki Samuel* nümüin Saúl: «¿Jamakaʼa puchuntaka kaalinwaa tamüin sümaa nükayalaaichipain Jehová puulia otta püʼünüüichipain nia? 17 Nikeraajeerü Jehová tü nümakat takajee. Nuuʼuleereechi pia Jehová suulia aluwatawaa, nieechikalaka nüneeküin David piiʼirakaluʼu. 18 Nnojoishi pia oonooin sümaa tü nümakat Jehová, nnojoishii pajaʼttirüin na amalequitakana, aashichijaashi Maleiwa natuma naya wayuukana, müsüjeseʼe shiain nukuwaʼipain Jehová tia pümüin maaʼulu. 19 Aapüneena ekii na israelitakana namüin na filisteokana nutuma Jehová jee aapüneeriaʼaya pikii namüin na filisteokana. Noʼuteechi aaʼin pia wattaʼa namaʼaleeya na püchonniikana, kotteenaka jia tamaa. Naapeerü Jehová nekii na surulaat israelitakana namüin na filisteokana».

20 Nujuttakalaka Saúl sümaa woyotoleeinña nia naapaiwaʼaya tia pütchikat. Mmotshi maʼin nia sutuma tü nümakat Samuel* nümüin. Matsüinsat naaʼin, jama siraain kaʼi naaʼu sümaa meküin nia jee siraasiaʼaya aikat naaʼu. 21 Anuukalaka sünüiki tü wayuukat sürütkaapa nünainmüin Saúl jee shiʼrapa shapaain maʼin naaʼin: «Laülaashikalee, taaʼinrüitpa tü puluwataakalü anain taya, outataairüjeʼe taya sünainjee tia. 22 Laülaashikalee, anasü paapaale sümaa tü taküjainjatkat pümüin. Tasaajüin paala piyaaluʼu wanee saʼata pan süpüla sükatchinraainjatüin paaʼin, puʼuneechikalaka süchikijee ekaa». 23 «Nnojoishi taya eküinjachin», nümakalaka Saúl sümüin. Nikakalaka Saúl mapa sutuma nachuntuin maʼin na nüchepchiakana naaʼinrajatüin tia jee sutuma suchuntuin maʼin shia nümüin tü wayuukat. Atamaashijeseʼe Saúl mmoluʼujee jee nüikalaakalaka saaʼu tü camakat. 24 Eejachikalaka wanee paaʼachon akaüsijuushi sümaʼana tia wayuukat, suʼutamaatakalaka naaʼin, sümaasajaka ariina jee saainjaka pan maʼakasat soolojia. 25 Shikiraka Saúl namaa na wayuu nümaajanakana, nekaka, natamaajaayaa namaka süchikijee ekawaa jee noʼunakalaka saʼwai.