Palajatka karaloʼuta Samuel
29 Noutkaje’erakalaka na filisteokana napüshuaʼa na nasurulaatsekana chaa suluʼu tü mmakat Afec, eekajasaʼa na surulaat israelitakana chajana oʼonooin süʼütpaʼa wanee wüin aparatka mmapüjee chaa suluʼu tü mmakat Jezreel. 2 Oʼunushii sünain atkawaa na aluwataakana naaʼu na filisteokana namaʼaleeya na nasurulaatsekana. Eeshii na katatakana suluʼu polooin nekii jee eeshii na katatakana suluʼu 1.000 nekii. Eekajasaʼa David namaa na nusurulaatsekana nüchiiruajeeshii Akís. 3 Anuukalaka nanüiki naʼlaülajana na filisteokana: «¿Jamüshii yaakaʼa waʼaka na hebreokana?». Anuujeseʼe nünüiki Akís namüin: «David nünülia wayuukai chii, nüchepchia nia Saúl chi aluwataakai naaʼu israelitakana. Alatüirü suulia wanee juya yaain nia tamaa, nnojotyülia teʼrüin naaʼinrüin wanee kasa eekai mojuin soʼujeʼereeya tü kaʼi nükatalaakalü oʼu nuulia Saúl süpüla yaainjachin nia tamaa». 4 Jashichikalaka maʼin naʼlaülajana na filisteokana nümüin Akís, anuu nanüiki nümüin: «Püma nümüin chira wayuukai nüleʼejaiwa suluʼumüin tü mma paapakat nümüin. Nnojo pümaain nia sünain atkawaa, jama nuʼutaleere waaʼin. Talateerü maʼin naaʼin Saúl nümaa David noʼutunule aaʼin nutuma David na wasurulaatsekana. 5 ‹Miit na wayuu nuʼutakana aaʼin Saúl,
eekajasaʼa David diez miit na wayuu nuʼutakana aaʼin›,
mataasü sümapuʼukai wayuu nüchiki David sümaa shiyonnojüin jee shiiʼirajüin».
6 Eenajünüshijeseʼe David nutuma Akís. Anuu nünüiki nümüin: «Shiimain maʼin tanüiki pümüin nuʼupala Jehová, chi matüjainkai outaa. Wayuu loto akuwaʼipachi pia jee talatüsü maʼin taaʼin süka puʼunuin namaa na tasurulaatsekana sünain atkawaa. Nnojotyülia teʼrüin paaʼinrüin wanee kasa eekai mojuin soʼujeʼereeya tü kaʼi püntakalü oʼu tamaʼanamüin, naliʼratapejeʼe pia na aluwataakana naaʼu na filisteokana. 7 Kasataalejeseʼe anain pukuwaʼipa wopuluʼu. Nnojo paaʼinrüin wanee kasa jashicheenaka anainjee na aluwataakana naaʼu na filisteokana». 8 Anuujeseʼe nünüiki David nümüin Akís: «¿Kasakai maʼin taainjalaka? Pütüjaa aaʼulu nnojoluin taaʼinrüin wanee kasa eekai mojuin soʼujeʼereeya tü kaʼi tantakalü oʼu pümaʼanamüin. Laülaashikalee, ¿jamüshi nnojoikaʼa tamaaneein sünain atkawaa namaa na püʼünüükana?». 9 Anuujeseʼe nünüiki Akís nümüin David: «Anamia maʼin pia maʼaka anamiain maʼin wanee aapiee nümaʼanajeejachi Maleiwa. ‹Nnojo pümaain nia sünain atkawaa›, münapejeʼe taya natuma naʼlaülajana na filisteokana. 10 Anashi pütamaale wattaʼa wattaʼa maalü namaʼaleeya na wayuu pümaajanakana, juʼuneenaka jaʼyuuweematapa».
11 Niitaakalaka David wattaʼa maalü namaʼaleeya na wayuu nümaajanakana noumainpaʼamüin na filisteokana, eekajasaʼa na filisteokana oʼunushii suluʼumüin tü mmakat Jezreel.