Chiiruaajatka karaloʼuta Samuel
19 Naapinnakalaka Joab sünain maa: «Aʼyalajüshi maʼin David sutuma outuin Absalón». 2 Mayaainjeʼe nakanajüin na surulaatkana, mojusü naaʼin sutuma naapüin süchiki mojuin naaʼin chi laülaashikai saalinjee outuin chi nüchonkai. 3 Koʼukoʼushii naya nekerotopa suluʼu tü pueulokot, japüishii naya maʼaka naaʼin na wayuu apattajaakana suulia atkawaa. 4 Nukoʼoloko nuʼupünaa chi aluwataashikai jee nuʼwaataka sünain maa: «Tachonchee, Absalón, Absalón, tachonchee, tachonchee».
5 Nikerotokoloko Joab suluʼumüin tü miichi eejachire chi aluwataashikai jee nümakalaka nümüin: «Eʼrüshii japülii putuma napüshuaʼa na surulaatkana, na akaalinjakana pia suulia puʼutunuin aaʼin, na akaalinjakana püchonnii, puʼwayuuse namaʼaleeya na jieyuu suwalaʼatakana puʼwayuuse. 6 Naya aikana püpüla na wayuu aʼürülaakana pünain, püʼürülapejeʼe na wayuu aikana apüla pia. Mojutusalii pümüin soʼukai na wayuu nekiipüʼükana na pusurulaatsekana namaʼaleeya na pusurulaatsekana. Talatüshije pia katayürüleje noʼu Absalón, jaʼitashiije oʼuwoulin waya wapüshuaʼa. 7 Pütamaa, pujuʼita anuuipaʼamüin pükatchinraiwa naaʼin na pusurulaatsekana. Nnojorüle paaʼinrüin tia oʼuneena puulia napüshuaʼa na pusurulaatsekana soʼuleʼeya aikat tüü, shiimain maʼin tü tamakat pümüin nuʼupala Jehová. Mojuleejeeria maʼin tia suulialeʼeya tü kasa mojusü piʼrakat jintüliiwaʼaya pia». 8 Nütamaakalaka chi aluwataashikai jee nüikalaaka soʼuluʼu tü pueulokot. Naapinnakalaka na wayuukana sünain maa: «Ichaa joyotuin chi laülaashikai soʼuluʼu tü pueulokot». Noʼunakalaka napüshuaʼa na wayuukana nümaʼanamüin chi aluwataashikai.
Nayapejeʼe apattajaain nepialuʼumüin na israelita paaʼinwakana nümaa Absalón. 9 Anuukalaka nanüiki napüshuaʼa na israelitakana sünain aʼülüjirawaa: «Nükaalinjain waya chi laülaashikai noulia na waʼünüükana jee noulia na filisteokana, apattajaapejeʼe nia pueulopaʼajee nuulia Absalón. 10 Oʼutuna aaʼinchi Absalón sünain atkawaa, chi waneekakai süpüla niainjachin aluwataain waaʼu. ¿Jamakaʼa nnojoika nüntinnamaatüin David yaamüin?».
11 Nüjütitkalaka nünüiki David nümüin Sadoc otta nümüin Abiatar sünain maa: «Anuu tü jüküjainjatkat namüin na laülaashii chakana Judá: ‹Antüsü tamüin wanee pütchi tepialuʼumüin süchiki tü namakat napüshuaʼa na israelitakana. ¿Aashin jiainjanain palajanain sünain asaajaa chi aluwataashikai süpüla jümaainjachin nia nipialuʼumüin? 12 Tawalayuu jia, tapüshinna jia. ¿Aashin jiainjanain palajanain sünain asaajaa chi aluwataashikai?›. 13 Anuu tü jüküjainjatkat nümüin Amasá: ‹Tapüshi pia, anashi süsarale taya nutuma Maleiwa nnojoire taneeküin pia soʼujeʼereeya kaʼikat tüü süpüla piainjachin nekiipüʼüin na surulaatkana niiʼirakaluʼu Joab›».
14 Anashiikalaka namüin napüshuaʼa na chajanakana Judá tü nümakat chi aluwataashikai. «Anashi püleʼejaale püchikuaʼa namaʼaleeya na püchepchiakana», namakalaka nümüin.
15 Nüntakalaka chi aluwataashikai eemüin tü süchikat Jordán nuʼunajachipa nipialuʼumüin,* antüshiijeseʼe suluʼumüin tü mmakat Guilgal na wayuu sejenakana Judá sünain apanapajaa David süpüla nalatirüinjachin nia süchikijee tü süchikat Jordán. 16 Niasaʼa Simeí, chi nüchonkai Guerá, oʼunamaatüshi nia namaa na wayuu sejenakana Judá sünain apanapajaa chi aluwataashikai. Simeí nülüin nia Benjamín, chejeʼewai nia suluʼujee tü mmakat Bahurim. 17 Eejanaʼaya nümaa Simeí 1.000 nüikeyuu Benjamín. Eejachiaʼaya Zibá, chi nachepchiakai na nüpüshikana Saúl namaʼaleeya na polookana jaʼralimüin nüchonnii otta piama nekii nüchepchia. Chatüjüiya Zibá eekai tü süchikat Jordán süpülapünaa nüntüin David. 18 Nülatakalaka Zibá eere epetüin tü süchikat süpüla nükaalinjain sünain alataa na wayuu nümaajanakana David jee süpüla naaʼinrajatüin süpüshuaʼaleeya tü nuchuntakat chi laülaashikai. Nüsapainkakalaka Simeí, chi nüchonkai Guerá nümülatuʼu David, nnojoliiwaʼaya nülatüin David tü süchikat Jordán. 19 Anuujeseʼe nünüiki Simeí nümüin David: «Señotkalee, pülatira sooʼopünaa paaʼin taainjala, kasataalejeseʼe motuin paaʼin tü kasa mojusü naainjakat chi püchepchiakai pümüin soʼu tü kaʼi puʼunakalü oʼu Jerusalénjee. Kasataalejeseʼe nnojoluin sotokuʼu müin paaʼin tia laülaashikalee. 20 Tatüjaa aaʼu kaainjalain taya puulia, müshijeseʼe tantüin palajana naʼakajee na nüpüshikana José sünain apanapajaa pia».
21 Anuukalaka nünüiki Abisái, chi süchonkai Zeruyá: «Oʼutunajachi aaʼin Simeí saalinjee nuchuntuin sülatajatüin kasa mojusü nümüin chi wayuu nüneekakai Jehová süpüla aluwatawaa». 22 Anuujeseʼe nünüiki David: «Nnojoishii jiain kaliajanain tü pütchi jaapakat jia süchonniikana Zeruyá. ¿Jamüshii macheʼekaʼa jia tamüin? Nnojotsü choʼujaain nuʼutunajachin aaʼin Simeí, jama taluwataaichipain tachikuaʼa soʼukai naaʼu na israelitakana». 23 Anuukalaka nünüiki David nümüin Simeí: «Nnojoleechi oʼutunuin aaʼin pia», nüküjain David tia nümüin sümaa nüpansaajüin nünüiki.
24 Nuʼunakalaka Mefibóset, chi nülüinkai Saúl, nümaʼanamüin chi aluwataashikai. Nnojotsü nuʼlojuin nuuʼui, nnojotsü nüüjüin nüʼliima jee nnojotsü nüshijaain tü nüsheʼinkat soʼujee tü kaʼi nuʼunakalü oʼu chi aluwataashikai Jerusalénjee sünainmüinreʼeya tü kaʼi nüleʼejakalü oʼu chi aluwataashikai sümaa nnojolin jamajüin nia atumawaa. 25 Nüntapa Mefibóset Jerusalénmüin sünain anaʼlawaa nümüin David, anuujeseʼe nünüiki David nümüin: «¿Jamüshi nnojoikaʼa puʼunuin tamaa Mefibóset?». 26 Anuupejeʼe nünüiki Mefibóset nümüin: «Señotkalee, pütüjaa aaʼuchi masaʼain taya. ‹Yapaja putuma chi tapüliiküsekai süpüla toʼunajachin nümaa chi aluwataashikai›, müshi taya nümüin chi tachepchiakai, nimeejapejeʼe neʼe taya. 27 Aküjashi alawaa tachiki chi tachepchiakai pümüin laülaashikalee. Kekiipejeʼe maʼin pia laülaashikalee maʼaka kekiin wanee aapiee nümaʼanajeejachikai chi shiimainshikai suluʼu Maleiwain. Anashi paainjale tü anakat saaʼin pümüin. 28 Laülaashikalee puʼutira aaʼinchiijee nüpüshi chi tashikai püchekülejeʼeya süchiki tia, nnojotpejeʼe paaʼinrüin tia. Kamaneeshi pia tamüin, peenajirüinjeseʼe taya süpüla tekawalinjachin pümaa, nnojoikalaka tachuntuinjachin sooʼomüin pümüin».
29 Anuukalaka nünüiki David nümüin Mefibóset: «Anashii nnojoliire yootuin waya süchiki tia. Püpaajiraainjatsa tü mmakat nümaa Zibá». 30 Anuupejeʼe nünüiki Mefibóset nümüin: «Anasü saapünüle süpüshuaʼa tü mmakat nümüin, jama teʼrüichipain püleʼejüin püchikuaʼa pipialuʼumüin sümaa nnojolin jamajüin pia atumawaa».
31 Niasaʼa Barzilái, chi chejeʼewaikai Galaad, oʼunushi nia suluʼujee tü mmakat Roguelim chai nukua eemüin tü süchikat Jordán. Oʼunushi nia nümaa David nüntaleepaʼaya eemüin tü süchikat Jordán. 32 Wayuu laülaa Barzilái, mekiisat shikii nuuyase. Akolojushi nia eküülü nümüin David soʼu tü kaʼi chajachikalü oʼu David suluʼu tü mmakat Mahanaim. Wayuu washirü maʼin Barzilái. 33 Anuukalaka nünüiki David nümüin Barzilái: «Anashi tamaale pia, pülata tü süchikat tamaa. Keküinwaleechi pia tatuma chaa Jerusalén». 34 Anuukalaka nünüiki Barzilái nümüin: «Alüʼülüichi taya süpüla outaa, nnojoleerü kasain taamüin pümüin toʼunule pümaa chaa Jerusalénmüin. 35 Mekiisalüirü shikii touyase. Nnojoluitpa tayaawatüin saaʼu wanee kasa eekai anain otta wanee kasa eekai mojuin. Nnojoluitpa tayaawatüin saaʼu jamüin seʼejü wanee kasa tekaka jee seʼejü wanee kasa tasaka. Macheʼeichi taya, isairü tachiki taapüin neeʼirain na eeʼiraliikana, müliakuʼu meerü paaʼin pümaale taya laülaashikalee. 36 Nnojotsü choʼujaain pümaainjachin taya pipialuʼumüin laülaashikalee. Anasü neʼe taaʼin saaʼu teʼikajaain pia yaamüin eemüin tü süchikat Jordán. 37 Anashi puuʼulaale chi püchepchiakai nüleʼejai nipialuʼumüin, anashi puuʼulaale taya outuin toumainpaʼa eere niʼikünüin chi tashikai sümaa tü teikat. Aniipejeʼe tamaa chi püchepchia kanüliakai Kimham, anashi niale alatüin pümaa tü süchikat, paainjeetkalaka nüpüleerua tü anakat saaʼin pümüin».
38 Anuukalaka nünüiki David: «Tamaajeechijaʼamata Kimham. Taainjeerü nüpüleerua tü anakat saaʼin pümüin, taainjeeria süpüshuaʼa tü puchuntakat tamüin». 39 Nalatayaa namaka na wayuukana tü süchikat Jordán. Sutunnaka nuwalapaʼa Barzilái nutuma David nülatajachipa David tü süchikat jee nuchuntakalaka nüpüleerua süpüla anainjatüin nukuwaʼipa Barzilái. Nuʼunakalaka Barzilái nipialuʼumüin. 40 Nülatapa David tü süchikat jee nuʼunapa suluʼumüin tü mmakat Guilgal, oʼunushi Kimham nümaa. Nalatüinña tü süchikat nümaa David na wayuu sejenakana Judá otta noʼutku na israelitakana.
41 Anuupejeʼe nanüiki napüshuaʼa na israelitakana nümüin David: «¿Jamüshi nasaajakaʼa pia wojuuna na wawalayuukana, na nüikeyuukana Judá? Nalatirüin pia tü süchikat namaʼaleeya na wayuu pipialujunakana otta namaa na wayuu pümaajanakana». 42 Anuupejeʼe nanüiki na nüikeyuukana Judá namüin na israelitakana: «Wasaajüin chi aluwataashikai saaʼu wapüshin nia. ¿Jamüshii jashichikaʼa jia sünainjee tia? Nnojoishiisa nikirüinnain waya chi laülaashikai jee nnojoishii nüsülajüinnain amüin waya wanee kasa shiiʼiree wakaalinjainjachin nia».
43 Anuukalaka nanüiki na israelitakana namüin na nüikeyuukana Judá: «Poloosü eʼirukuu eeka waʼaka, wapüshireeichipakalaka maʼin David juulia jiakana. ¿Jamüshii mojutukaʼa waya jümüin? ¿Aashin wayainjanain palajanain sünain asaajaa chi laülaashikai?». Kaawainpejeʼe maʼin nanüiki na nüikeyuukana Judá suulialeʼeya nanüiki na israelitakana.