Chiiruaajatka karaloʼuta Samuel
21 Aikalaka maʼin jamü nükalioʼu David soʼu apünüin juya. Nüsakinnaka Jehová nutuma David, asoutushijeseʼe Jehová nümüin sünain maa: «Uwomuyuushi Saúl namaa na nüpüshikana, nuʼuta aaʼinna na gabaonitakana». 2 Nnojoishii israelitain na gabaonitakana, napüshi naya na amorreo nnojoliikana oʼutunuin aaʼin. Napansaajüin na israelitakana namüin na gabaonitakana nnojoliinjanain jamajüin naya natuma, najaʼttirataainnajeʼe naya Saúl, jama mojushiin nümüin naʼakainjanain naya na israelitakana namaa na nüikeyuukana Judá. Eenajinnüshiijeseʼe na gabaonitakana nutuma David süpüla yootuinjachin nia namaa. 3 Anuukalaka nünüiki David namüin na gabaonitakana: «¿Kasache eeka süpüla taaʼinrüin jüpüleerua? Moteerüje jaaʼin waainjala jee anakuwaʼipaleenaje na nüpüshikana* Jehová». 4 Anuukalaka nanüiki na gabaonitakana nümüin David: «Nnojoleerü motuin waaʼin tü naainjakat Saúl wamüin jee tü naainjakat na nüpüshikana wamüin, jaʼitasü saapünüin ooro jee pülaata wamüin. Nnojotsü süpüla woʼutuin naaʼin wanee israelita». Anuukalaka nünüiki David namüin: «Jaʼitasü kasain juchuntuin tamüin, taapeeriaʼaya shia jümüin». 5 Anuukalaka nanüiki na gabaonitakana nümüin David: «Chia wayuukai, nuʼuta aaʼinna na wapüshikana jee nukumajüin sukuwaʼipa süpüla najaʼttirajanain naya suluʼujee noumain na israelitakana. 6 Anasü saapünüle wamüin nekii akaratshishii nüchooin Saúl, woʼutaiwa naaʼin jee wakachereenaka naya nuʼupala Jehová suluʼu tü mmakat Guibeá, eejeʼewaire Saúl, chi wayuu nüneekajalakai Jehová». «Taapeena ekii jümüin», nümakalaka David namüin.
7 Amülialaapejeʼe naaʼin David naalin Mefibóset, chi nüchonkai Jonatán, jama sotuin naaʼin nüpansaajüin nünüiki nuʼupala Jehová nümüin Jonatán, chi nüchonkai Saúl. 8 Nüneekünaka Armoní nümaa Mefibóset nutuma David, nüchonnii naya Saúl sümüin Rizpá, tü nüchonkat Ayá. Nüneeküinña David jaʼraishii süchonnii Mical, tü nüchonkat Saúl, nüchonnii naya Adriel sümüin Mical. Adriel nüchon Barzilái chi chejeʼewaikai Meholá.* 9 Aapüna ekiichii naya wayuukana namüin na gabaonitakana, süchikijee noʼutunuin aaʼin akachennüshii naya nuʼupala Jehová saaʼu tü uuchikat. Akaratshishii na wayuu oʼutunakana aaʼin, oʼutuna aaʼinchii naya soʼu tü kaʼi suʼttakalü oʼu süshannüin tü aʼttiee kanüliakat cebada. 10 Süchikijee tia, saapaakalaka Rizpá tü nüchonkat Ayá, wanee kuluut shiyaawase mojuu aaʼin, suwayalaka shia saaʼu wanee ipa. Yalajatkalaka shia suʼttiajee tü kaʼi sukotchojunakalü oʼu süchon tü aʼttieekat sünainmüinreʼeya tü kaʼi süʼitakalü oʼu juya naaʼu müliashii. Saʼatajüin naaʼu müliashii suulia shikajüin naya wüchii soʼukai jee suulia sürütkajüin naya saʼwai tü wüchii wünaʼapüjatkat.
11 Süküjünaka nümüin David tü saainjakat Rizpá, tü suwalaʼatakat nuʼwayuuse Saúl. 12 Nüsaajakalaka David niipüse Saúl jee niipüse Jonatán, chajatü shia namaʼana na laülaashii chejeʼewaliikana Jabés-Galaad, na asaajakana paala shia ojuunaa eejee tü pülaasa chakat Bet-San. Eejanale paala nakachennüin natuma na filisteokana wanaa sümaa nükanajuuin Saúl natuma na filisteokana chaa Guilboa. 13 Nüsaajakalaka David niipüse Saúl, niipüse Jonatán sümaʼaleeya neipüse na wayuu oʼutunakana aaʼin natuma na gabaonitakana. 14 Sojoitünaka niipüse Saúl jee niipüse Jonatán suluʼu tü mmakat Zelá, chaa eere noumain na nüikeyuukana Benjamín suluʼu naamaka Quis, chi nüshikai Saúl. Süchikijee saaʼinnüin süpüshuaʼa tü nuluwataakalü anain David, naapüin Maleiwa nanüiki na israelitakana nachuntapa napüleerua napüshuaʼa na wayuu sulujunakana tia mmakat.
15 Natkaakalaka nachikuaʼa na filisteokana namaa na israelitakana, oʼunushijeseʼe David namaa na nusurulaatsekana sünain atkawaa namaa na filisteokana, sajaʼlajakalaka naaʼin David. 16 Eejachikalaka wanee wayuu nülüin Rafah, Isbí-Benob nünülia. Eejatü nümaʼana wanee lanza aainjuushi süka cobre, apünüin kilo shiatapünaamüin* saawain, oʼutunee aaʼinchi David nutuma chia wayuukai. 17 Nükaalinjünamaataka David nutuma Abisái, chi süchonkai Zeruyá, awataashijeseʼe nia nooʼomüin chi filisteokai sümaa nuʼutuin naaʼin. Anuukalaka nanüiki na nusurulaatsekana David sümaa napansaajüin nanüiki nümüin: «Anashi nnojoire puʼunuin piantua wamaa sünain atkawaa, puʼutunule aaʼin meerü shiyokojoonakai aaʼin naranparase* na israelitakana».
18 Natkaakalaka nachikuaʼa na israelitakana namaa na filisteokana chaa suluʼu tü mmakat Gob. Niasaʼa Sibecái, chi husatitakai nuʼuta aaʼinchi Saf, wanee nülüin Rafah.
19 Natkaakalaka nachikuaʼa na israelitakana namaa na filisteokana chaa Gob. Niasaʼa Elhanán, chi nüchonkai Jaaré-Oreguim, chi betlemitakai nuʼuta aaʼinchi Goliat, chi guititakai. Laüttasü maʼin shipi tü lanza nümaʼanajatkat Goliat, müsü aka süʼlaüttain wanee anütpala.
20 Natkaakalaka nachikuaʼa na israelitakana namaa na filisteokana chaa Gat. Eejachi wanee wayuu miyoʼusenuu maʼin suluʼu tia mmakat, aipiruasü süchon najapü jee aipiruasü süchon nuuʼui, piamakalaka shikii pienchimüin süpüshuaʼa. Nülüin Rafah chia wayuukai. 21 Sutuma nimeeʼerainpalakuʼu nümüin chia wayuukai na israelitakana, oʼutuna aaʼinchi nia nutuma Jonatán, chi nüchonkai Simeí. Simeí, nuwala David.
22 Nüikeyuu Rafah naya pienchishiikana wayuu jee kepiapuʼushii naya Gat. Oʼutuna aaʼinchii naya nutuma David namaa na nusurulaatsekana.