Chiiruaajatka karaloʼuta Samuel
20 Eejachikalaka wanee wayuu kanüliashi Seba, nüchon Bicrí, wanee nülüin Benjamín. Nootowalin Seba wayuu sünain eʼraa wayumüin, niʼyalajirüinjeseʼe tü suʼuwakalü anneerü jee nümakalaka: «Nnojoishiisa napüshin waya na nüpüshikana David, nnojotsü kaseerüin naapüin wamüin chi nüchonkai Jesé. Anashii juʼunule waneʼewai jukua sünain aʼwaajaa jümaleiwase, jia wayuu israelitakana». 2 Nakoʼulayaa namaka napüshuaʼa na israelitakana nümaʼanajee David süpüla noʼunajanain nümaa Seba chi nüchonkai Bicrí, nnojoliipejeʼe oʼunuin nuulia David na nüikeyuukana Judá, na oʼunakana paala nümaa eejee tü süchikat Jordán Jerusalénmüinreʼeya.
3 Shiasaʼa nüntapa David nipialuʼumüin, chaa Jerusalén, nükatatkalaka na polooshii jieyuu suwalaʼatakana nuʼwayuuse nüpütakana miichaajunain paala, nünajiraka naaʼu. Naapawalin David tü nayaalujutkat, nnojoipejeʼe nia ainkaain namaa. Ayatüshiʼiya naya jieyuukana suluʼu tia miichikat outaleepaʼaya naya, müshii naya maʼaka saaʼin wanee wayuu eekai outuin suʼwayuuse mayaainjeʼe katüin noʼu chi naʼwayuusekai.
4 Anuujeseʼe nünüiki David nümüin Amasá: «Anashii puunejüle tamüin na nüikeyuukana Judá süpüla nantajanain yaa tamaʼanamüin soʼu apünüin kaʼi, anteechiaʼaya pia namaa». 5 Nuʼunakalaka Amasá sünain ounejaa na nüikeyuukana Judá, nnojoipejeʼe nia antüin soʼu tü kaʼi nüntajachikalü oʼu naashin David. 6 Anuujeseʼe nünüiki David nümüin Abisái: «Mülialeejeeria maʼin waaʼin sutuma tü kasa naaʼinreetkat wamüin Seba, chi nüchonkai Bicrí suulialeʼeya tü kasa naaʼinrakat wamüin Absalón. Anashii pümaale na tasurulaatsekana puushikajaaiwa nüchiirua, ekerotushitaa suluʼu wanee pueulo eekai kasepüin, isaja meechia nia woulia». 7 Oʼunushiijeseʼe Jerusalénjee sünain oushikajawaa nüchiirua Seba na wayuu nümaajanakana Joab, na keretitakana, na peletitakana, oʼunushiʼiya nümaa* na wayuu yalayalajakana aaʼin sünain atkawaa. 8 Shiasaʼa nantapa eemüin tü ipa miyoʼu eejatkat suluʼu tü mmakat Gabaón, antiraashi Amasá namaa. Eejatü nünain Joab tü nüsheʼin nütkaayakat otta eejatiaʼaya niyatapünaa tü chajaruuta nütkaayakat. Ojutuusüjeseʼe tia chajaruutakat suluʼujee süta nürütkaapa nünainmüin Amasá.
9 Anuujeseʼe nünüiki Joab nümüin Amasá: «¿Kasa eeyaaka waʼle?». Naapaainjeseʼe Joab nüʼliima Amasá süka tü najapü nikiakat, müinjachi nutuʼlakai saaʼin nuwalapaʼa. 10 Nnojotsü jülüjain naaʼin Amasá eejatüin wanee chajaruuta nümaʼana Joab, susotunakalaka nüleʼenain Amasá nutuma Joab süka tia chajaruutakat. Shiweenuwaakalaka tü nüyülainkat, sujutuuka mmoluʼu, uwatua neʼe nusotuin nia, nujuttakalaka Amasá. Shiasaʼa süchikijee tia, nuʼunakalaka Joab nümaa Abisái sünain oushikajawaa nüchiirua Seba, chi nüchonkai Bicrí.
11 Nüshaʼwalaakalaka nüʼütpaʼa Amasá wanee wayuu nümaajachi Joab jee nümakalaka: «Anashi nuʼunule nüchiirua Joab chi wayuu paaʼinwakai nümaa David jee chi paaʼinwakai nümaa Joab». 12 Chüületaka Amasá saʼaka tü nüshakat pasanain sünain tü wopukot. Nünsüleʼennaka Amasá nutuma chia wayuukai saʼakamüin wanee mojuui süka niʼrüin süshaʼwalaayaa sümüin wayuu sünain anaʼlawaa nümüin Amasá, nukoʼoloko nia süka wanee kuluulu. 13 Nüsünneʼennapa Amasá nutuma suluʼujee tü wopukot, lotushii napüshuaʼa na wayuukana nüchiirua Joab sünain oushikajawaa nüchiirua Seba, chi nüchonkai Bicrí.
14 Nülatakalaka Seba suluʼupünaa noumain napüshuaʼa na israelitakana nüntaleepaʼaya suluʼumüin tü pueulokot Abel de Bet-Maacá, noutkajaaya namaka napüshuaʼa na nüikeyuukana Bicrí, ekerotushiijeseʼe naya nüchiirua Seba suluʼumüin tia pueulokot.
15 Nüntapa Joab namaa na wayuu nümaajanakana noutkajüin tü pueulokot Abel de Bet-Maacá, neichajaka mma sünain tü süsepükat süpüla nashutajanain saaʼu, kasepüsü tia pueulokot. Nayasaʼa na wayuu nümaajanakana Joab naponüin suuʼui tia pueulokot süpüla nojuʼttirajatüin shia. 16 Suʼwaatakalaka suluʼujee tü pueulokot wanee wayuu kekiikat maʼin jee sümakalaka: «Jaapaja tanüiki, jülüja jaaʼin tanüiki. Jüküjaʼaya jümaa nümüin Joab nüntaiwa yaamüin, yooteesü taya nümaa». 17 Arütkaashijeseʼe nia sünainmüin tia wayuukot jee sümaka nümüin: «¿Pia Joab?». «Aa, tayaʼayan», nümakalaka sümüin. Anuujeseʼe sünüiki nümüin: «Paapaja tü süküjainjatkat pümüin tü püchepchiakat». «Anakajaʼa, taapajeerü pünüiki», nümakalaka sümüin. 18 Anuu sooʼomüin sünüiki nümüin: «‹Sunouteere wayuu sukuwaʼipa wanee kasa, anashii nasakirüle suluʼumüin tü pueulokot Abel›, mapuʼusü sünüiki wayuu sümaiwa. Sunoutaamaatakalaka sukuwaʼipa wanee kasa. 19 Taya nekiipüʼüka na wayuu eekana atuma anajirawaa otta na wayuu lotokana akuwaʼipa yaa Israel. Pajaʼttiree amüinrü wanee pueulo miyoʼuka saʼakajee tü mmakat yaa Israel. ¿Jamüsü pajaʼttireekaʼa sümüin tü pueulo nüpaalakat Jehová?». 20 Anuujeseʼe nünüiki Joab sümüin: «Nnojorüleejaʼa antapünaain suluʼu tekii tajaʼttirüinjatüin tü pueulokot. 21 Nnojotsiaajeʼe tajaʼttireein tü pueulokot, eeshi wanee wayuu eʼrüijaaka wayumüin nümüin chi aluwataashikai. Seba nünülia chia wayuukai, nüchon nia Bicrí, chejeʼewai nia saaʼu tü uuchi eere kepiain na nüikeyuukana Efraín. Oʼuneechi taya juulia jaapüle tamüin nikii chia wayuukai». Anuujeseʼe sünüiki tia wayuukot nümüin Joab: «Wojuteerü pümüin nikii sooʼopünaa süsepü tü pueulokot».
22 Suʼunamaatakalaka tia wayuukot sünain aashajawaa namaa napüshuaʼa na wayuu sulujunakana tia pueulokot, sushoʼttunaka nunutpünaa Seba, sujutunaka tü nikiikat nümüin Joab. Niʼyalajitkalaka Joab tü suʼuwakat anneerü, naleʼejaayaa namaka napüshuaʼa na wayuukana nepialuʼumüin, nüleʼejaaka Joab Jerusalénmüin nümaʼanamüin chi aluwataashikai.
23 Niakalaka Joab nekiipüʼüin na surulaat israelitakana otta nia Benaya, chi nüchonkai Jehoiadá nekiipüʼüka na keretitakana otta na peletitakana. 24 Nia Adoram nekiipüʼüka na wayuu ounejaanakana sünain aʼyatawaa nümüin chi aluwataashikai jee müshia Jehosafat, chi nüchonkai Ahilud, nia ashajaka süchiki wanee kasa alataka suluʼu tia mmakat. 25 Nia ashajawaika Sevá süchiki wanee kasa, niaka sacerdotein Sadoc nümaa Abiatar. 26 Sacerdoteshiaʼaya Irá nutuma David, nülüin nia Jaír.