Chiiruaajatka karaloʼuta Samuel
4 Niimolojooko Is-Bóset, chi nüchonkai Saúl, naapapa süchiki nuʼutunuin aaʼin Abner chaa Hebrón. Shapaasiaʼaya naaʼin na israelitakana sutuma tia. 2 Eejana piamashii wayuu aʼyataakana nümüin Is-Bóset, nekiipüʼü naya na aʼluwajawaikana wanee kasa nümüin Is-Bóset. Baaná nünülia wanee otta chi wane Recab münüshi, nüchooin naya Rimón, chi beerotitakai, nüikeyuu naya Benjamín. Tü mmakat Beerot süpüshi tü noumainkat na nüikeyuukana Benjamín. 3 Naʼluwataakalaka na beerotitakana suluʼumüin tü mmakat Guitaim, ayatayüliʼiya naya maaʼulu kepiain suluʼu tia mmakat mayaainjeʼe nnojoluin noumain shia.
4 Eejachi wanee nüchon Jonatán, Mefibóset nünülia, masaʼasai nia. Soʼu jaʼralin juya Mefibóset, aküjünüsü wanee pütchi chejee Jezreel, süchiki nuʼutunuin aaʼin Saúl nümaa Jonatán. Apataanüshijeseʼe Mefibóset sutuma tü wayuu ayuujawaika nia, süpantajaaka, sajachijaaka chi joʼuukai suwatiroʼu. Müichireeka nia masaʼain.
5 Nüntakalaka Baaná nümaa Recab nipialuʼumüin Is-Bóset kaleʼu kaʼikat wanaa maʼin sümaa nutunkuin Is-Bóset. Nüchooin Rimón naya wayuukana. 6 Nikerotkoloko Baaná nümaa Recab suluʼumüin nipia Is-Bóset, asaajayaashii naya trigo. Nasotokoloko nüleʼenain Is-Bóset, napantajaakalaka süchikijee. 7 Soʼu nekeroluin suluʼumüin tü miichikat, neʼrüin Is-Bóset juʼletüin saaʼu tü nücamainkat, nasotokoloko nia jee noʼutakalaka naaʼin. Nashoʼttüinjeseʼe nunut sümaa nalüʼüjain tü nikiikat. Siraasü aikat naaʼu sünain waraittaa suluʼupünaa tü wopu chaʼwatkat Arabá. 8 Nantakalaka suluʼumüin tü mmakat Hebrón jee nantitkalaka nikii Is-Bóset nümüin David. Anuujeseʼe nanüiki nümüin: «Anuu wantirüin pümüin nikii Is-Bóset, chi nüchonkai Saúl, chi püʼünüükai jee chi oʼuteekai paala paaʼin. Laülaashikalee, süsalashi soʼukai Saúl nutuma Jehová saalinjee tü kasa naainjakat pümüin jee süsalashiʼiya nutuma na nüikeyuukana Saúl».
9 Anuukalaka nünüiki David nümüin Recab jee nümüin Baaná, na nüchooinkana Rimón: «Shiimain maʼin tanüiki jümüin nuʼupala Jehová chi Maleiwa matüjainkai outaa, chi akaalinjakai taya suulia süpüshuaʼa tü kasa shapaakalü atuma taaʼin. 10 ‹Oʼutuna aaʼinchi Saúl›, müshinka tamüin wanee wayuu eʼikajaakai pütchi analuʼut nüküjainruʼu. Tataʼülüinjeseʼe nia jee toʼutakalaka naaʼin suluʼu tü mmakat Ziclag, shia nükanainka tia tatuma saaʼu niʼikajaain tamüin tia pütchikat. 11 Jieematataaka nnojoluin toʼuteein aaʼin saalinjee juʼutuin naaʼin wanee wayuu eekai maainjalain, juʼuta aaʼinchi nia nipialuʼu saaʼu tü nücamainkat. Süsaleena jia jaainjala tatuma saaʼujee juʼutuin naaʼin chia wayuukai, wuleʼreejeena jia tatuma saaʼujee tü mmakat». 12 Nuluwataainjeseʼe David na wayuu nümaajanakana süpüla noʼutuinjatüin naaʼin naya wayuukana, naʼyotookoloko najapü jee nooʼui, nakacherüinjeseʼe naya süʼütpaʼa tü ishi chajatkat Hebrón. Eekajasaʼa nikii Is-Bóset eʼitaanüsü shia eejachire niʼikünüin Abner, chaa suluʼu tü mmakat Hebrón.