Chiiruaajatka karaloʼuta Samuel
16 Nülatapa David süchikijee tü wutai kanüliakat Olivos, apanapünüshi nia nutuma Zibá, chi nüchepchiakai Mefibóset. Eejatü piamasü püliikü nümaa kachiseka 200 pan, poloo shikii saʼatachein uuwa jososü, poloo shikii saʼatachein higo otta dátil, müsia wanee jaara miyoʼu kaluʼusü wiino. 2 Anuujeseʼe nünüiki David nümüin Zibá: «¿Kasapülajatü tü püntirakat wamüin?». Anuujeseʼe nünüiki Zibá nümüin: «Tantirüin tü püliikükat süpüla neʼejenainjatüin shia na wayuu pipialujunakana, tantirüinña tü pankat, tü higokot, tü dátilkat süpüla neküinjatüin shia na wayuu pümaakana otta tantirüinña tü wiinokot süpüla nüsüinjatüin shia wanee wayuu eekai sajaʼlajüin naaʼin chaa isashiipaʼa». 3 Anuujeseʼe nünüiki David nümüin: «¿Jalakaʼa nülüin chi pülaamainkai?». Anuujeseʼe nünüiki Zibá nümüin: «Makatüshi nia chaa Jerusalén. ‹Aluʼu aneeküneechinjaʼa taya soʼukai natuma na israelitakana süpüla aluwatawaa naaʼu maʼaka naneeküinkain chi tatuushikai›, müshi nia». 4 Anuujeseʼe nünüiki David nümüin Zibá: «Paapaa pümata süpüshuaʼaleeya tü kasa eepuʼukat nümaʼana Mefibóset». Anuujeseʼe nünüiki Zibá nümüin: «Kojuteeshi pia tatuma otta taapeein pümüin analuʼutkat. Laülaashikalee, kasataalejeseʼe anain tü kasa jülüjakat paaʼin tachiki».
5 Nüntapa David suluʼumüin tü mmakat Bahurim, nujuʼitaakalaka wanee wayuu nüpanapa, nüpüshi Saúl, Simeí nünülia, nüchon nia Guerá. Oʼunushijeseʼe nia nünainmüin David, aʼwoolojushi nia sümaa nüküjain pütchi mojuluʼut nümüin. 6 Eʼinaʼannüshi David nutuma süka ipa, eʼinaʼannüshiʼiya nutuma na nüchepchiakana David, na wayuu nümaajanakana namaʼaleeya na surulaat yalayalakana aaʼin sünain atkawaa, na nikialuʼujeekana otta na nipeʼeruʼujeekana David. 7 Anuu nünüiki Simeí nümüin: «Puʼuna yaajee pia oʼunuliaaka saaʼin wayuu, malasaʼata maʼin pia. 8 Kasalajanasü pümüin nutuma Jehová puʼutuin naaʼin na nüpüshikana Saúl, piaichipaka joo aluwataain niiʼirakaluʼu. Niapejeʼe nüneeküin Jehová süpüla aluwatawaa Absalón, chi püchonkai. Watta saalii tü müliaa piʼrakat süka puʼunulin saaʼin wayuu».
9 Anuujeseʼe nünüiki Abisái nümüin David: «¿Jamüsükai türa eʼraʼatakat süküjakuʼu sümaka pütchi mojuluʼut pümüin laülaashikalee? Anashi puuʼulaale taya, tasholojooiwa sunutpünaa». 10 Anuujeseʼe nünüiki David nümüin Abisái: «Nnojoishii jiain kaliajanain tü pütchi jaapakat jia süchonniikana Zeruyá. Anashi juuʼulaale chira wayuukai süpüla nüküjainjachin pütchi mojuluʼut tamüin, jama niain Jehová müin nümüin: ‹Püküja pütchi mojuluʼut nümüin David›. Nnojotkalaka anain nüsakinnüle süchiirua jamüin nüküjaka tia pütchikat». 11 Anuujeseʼe nünüiki David nümüin Abisái otta namüin napüshuaʼa na nüchepchiakana: «Nuʼutee aaʼinchi taya chi tachonkai, nieematataaka nnojolin oʼuteein taaʼin wanee wayuu eekai nülüin Benjamín. Anashi juuʼulaale chira wayuukai, jama niain Jehová kaluwanaajalain nia süpüla mojuinjatüin nünüiki tamüin. 12 Eeshijaʼa nümülialaajeechire Jehová taalin, teʼreechikalaka kasa anasü nutuma Jehová suulialeʼeya tü kasa mojusü aküjünakalü achiki tamüin soʼukai». 13 Ayatapejeʼe oʼunuin David namaa na wayuu nümaajanakana suluʼupünaa tü wopu kalujunakana naya. Chakajasa Simeí saʼatoʼupünaa tü uuchikat, ayatüshia nia aküjain pütchi mojuluʼut nümüin David, niʼinnaʼalüin naya süka ipa jee nijinain mma naaʼu.
14 Nüntakalaka David namaa na wayuu nümaajanakana eeʼewaliinjanale naya. Mapüsajüshii maʼin, eemeraashiijeseʼe naya.
15 Nüntakalaka Absalón Jerusalénmüin namaa napüshuaʼa na israelita wanaawakana aaʼin nümaa, eejachiaʼaya Ahitofel nümaa. 16 Anuujeseʼe nünüiki Husái, chi naʼaleewainkai David nüntapa nümaʼanamüin Absalón: «Kasataalejeseʼe anain nukuwaʼipa chi aluwataainjachikai». 17 Anuujeseʼe nünüiki Absalón nümüin Husái: «Iraa aika maʼin püpüla chi paʼaleewainkai, ¿jamakaʼa nnojoikai puʼunuin nümaa?». 18 Anuujeseʼe nünüiki Husái nümüin: «Nnojoishi taya oʼunuin nümaa, jama paaʼinwain taya nümaa chi wayuu nüneekakai Jehová süpüla aluwatawaa, chi naneekakai wayuukana naainnua jee namaʼaleeya napüshuaʼa na israelitakana, paaʼinwashi taya pümaa. 19 ¿Aashin niainjachin taʼyataain amüin nüchon chi taʼaleewainkai? Maʼaka taküjaitpain pümüin, aʼyataajeechi taya pümüin maʼaka taʼyataapuʼuin nümüin chi püshikai».
20 Anuujeseʼe nünüiki Absalón nümüin Ahitofel: «Anashi püküjale tamüin tü anakat süpüla waaʼinraa». 21 «Anashi püinkaale namaa na jieyuu suwalaʼatakana nuʼwayuuse chi püshikai, na nüpütakana miichajunain. Nayaawateetka saaʼu napüshuaʼa na israelitakana nüʼürülain pia chi püshikai saalinjee tü paaʼinrakat, paaʼinwaleejeenaka pümaa na wayuu wanaawakana aaʼin pümaa», nümakalaka Ahitofel nümüin Absalón. 22 Sukumajünaka wanee miichi aainjuushi süka loona süraloʼujee tü miichikat. Nüinkaaka Absalón suluʼu tia miichikat namaa na jieyuu suwalaʼatakana nuʼwayuuse chi nüshikai, noʼupala napüshuaʼa na israelitakana.
23 Nüsakinnüle Ahitofel süchiirua wanee kasa müshijaʼa niakaijaʼa asakinnüin chi shiimainshikai suluʼu Maleiwain. Müshijeseʼe naapaʼawalin David otta Absalón sümaa tü nümakat Ahitofel.