Jueces
7 Niasaʼa Gedeón chi Jerubaal münakai, atamaatüjüi eeiwaʼa aikat namaa na nusurulaatsekana. Noutkajaakalaka süʼütpaʼa wanee wüin aparatka mmapüjee kanüliaka Harod. Chajana jutkatüin na madianitakana palaajeeruʼu nünain Gedeón jee palaajeeruʼu nanain na nusurulaatsekana, süʼütpaʼajana naya tü namüna kanüliakat Moré, chaa süpaʼa wanee patajatshii. 2 Anuujeseʼe nünüiki Jehová nümüin Gedeón: «Watta maʼin naalii na pusurulaatsekana. Nnojoleena taapüin ekii jümüin na madianitakana sünainjee tia. Taapüle nekii jümüin aʼwaataajeena na israelitakana suluʼu tia jee naküjeerü nayain akanajüin sutuma katchin maʼin naya. 3 Anuu tü pünüikinjatkat namüin na surulaatkana: ‹Anashi nüleʼejaale nipialuʼumüin chi wayuu eekai mmoluin maʼin›». Nüküjakalaka Gedeón tia namüin süpüla nütüjaainjatüin aaʼu jaraliin na surulaat mmotkana. Oʼunushiijeseʼe nepialuʼumüin 22.000 surulaat jee makatakalaka nümaa Gedeón 10.000 surulaat.
4 Mayaainjeʼe naainjain Gedeón tia, anuu nünüiki Jehová nümüin: «Wainmayüliʼiya maʼin na pusurulaatsekana. Püma namüin noʼunaiwa eemüin tü luwopukat, tooʼulakeetkalaka naaʼin chapa naya. ‹Nieechi pümaaka wayuukai chii›, tamüle pümüin, pümaajeechi, eekajasaʼa ‹nnojoleechi pümaain wayuukai chii›, tamüle pümüin, nnojoleechi pümaain». 5 Nuluwataakalaka Gedeón na nusurulaatsekana süpüla noʼunuinjanain eemüin tü luwopukat.
Anuujeseʼe nünüiki Jehová nümüin Gedeón: «Chi wayuu asakai wüin maʼaka sukuwaʼipa nutuma wanee erü, pükatala nia noulia na nasapainkakana sünain asaa wüin». 6 Trescientoshii na wayuu ajaʼitakana tü wüinkat süka najapü sümaa nasüin shia. Eekajasaʼa na wane nasapainkashii sünain asaa wüin.
7 Anuujeseʼe nünüiki Jehová nümüin Gedeón: «Toʼtteʼereena na israelitakana nakajee na 300 surulaat ajaʼitakana tü wüinkat süka najapü sümaa nasüin shia. Taapeetkalaka nekii pümüin na madianitakana. Püma namüin na wane surulaatkana naleʼejaaiwa nepialuʼumüin». 8 Nayasaʼa na surulaat ajütünakana nepialuʼumüin naapüin tü nemiakat jee tü suʼuwakat anneerü namüin na wane 300 surulaat. Najütüinjeseʼe naya Gedeón nepialuʼumüin süchikijee tia. 300 na surulaat makatakana nümaa Gedeón. Chajana jutkatüin na madianitakana süpaʼa tü patajatshiikat.
9 Anuujeseʼe nünüiki Jehová nümüin Gedeón soʼu aikat tia: «Pushuta naaʼu na madianitakana, jama taapüinjatüin nekii pümüin. 10 Mmorülejeʼeya pia sünain ashutaa, puʼuna eere jutkatüin na madianitakana, pümaajeechi Purá chi püchepchiakai. 11 Akatchinraajeerü paaʼin paapapa tü namakat na madianitakana, pushuteechikalaka naaʼu». Nürütkaʼaleekalaka Gedeón nümaa Purá eejanale na madianitakana.
12 Watta maʼin naalii na madianitakana, na amalequitakana otta na wüinpüjeʼewaliikana, müshii naya maʼaka saaʼin kaashapa eekai wattain maʼin saalii. Watta maʼin saalii tü kameeya eejatkat namaʼana, isasü süchiki shiyaawajüinjatüin wayuu. Watta maʼin saalii maʼaka tü jasai eekat sotpünaa palaa. 13 Soʼu nüntüin Gedeón eemüin na madianitakana naapakalaka nünüiki wanee wayuu aküjakai nüʼlapüin nümüin waneʼeya. Anuu nünüiki chia wayuukai: «Teʼrüin wanee pan koʼoyoosü aainjuushi süka cebada. Antüsü shia naʼakamüin na madianitakana sümaa leeyatüin shia. Süsheʼetuukalaka sünain wanee miichi, alianajaasü shia emetut sutuma sümaa sujuttiraleein shia». 14 Anuujeseʼe nünüiki chi wayuu aküjünakai amüin tü lapükat: «Tü pankat shiyaawase tü chajaruuta nümaʼanakat Gedeón, chi nüchonkai Joás, wayuu israelita nia. Aapünajana ekii nümüin Gedeón nutuma Maleiwa na madianitakana namaʼaleeya na surulaat namaajanakana».
15 Nüsapainkaka Gedeón sünain aʼwaajaa Maleiwa naapapa süchiki tü lapükat. Nüleʼejaakalaka nüchikuaʼa eemüin na israelitakana jee nümakalaka namüin: «Joʼu washutai naaʼu na madianitakana, jama naapüinnapain ekii naya Jehová wamüin». 16 Nüpaajaakalaka na 300 surulaat eejanakana nümaa, apünüinsü neʼipapaʼa nutuma. Naapaka suʼuwa anneerü namüin sümaʼaleeya amüchi kaluʼuka sikoʼu. 17 Anuujeseʼe nünüiki namüin: «Jülüja jaaʼin tü taaʼinrajatkat, juuʼulakeetka shia tachiirua. Jüntapeena naʼütpaʼamüinreʼeya na madianitakana, juuʼulakeerü tachiirua tü taaʼinrajatkat. 18 Taʼyalajirapa tü suʼuwakat anneerü jee naʼyalajirapa shia na surulaat tamaakana, meeriaʼaya sukuwaʼipa jutuma naʼütpünaa na madianitakana, emetuleetka jünüiki sünain maa: ‹Nia atkaajeechika wapüleerua Jehová nümaa Gedeón›».
19 Nürütkaʼaleeka Gedeón namaa na polookana nekii surulaat nanainmüin na madianitakana. Antüshii naya süseʼeruwematapa aikat,* süchikijee nantüin na neʼirakainjanakana na vigilantekana paala. Naʼyalajiraka tü suʼuwa anneerü eejatkat namaʼana sümaa nasottüin tü amüchi eejatkat najapuluʼu. 20 Naʼyalajiraka tü suʼuwakat anneerü na apünüinkana neʼipapaʼa surulaat jee nasottokoloko tü amüchikat. Najapuluʼujuin tü sikoʼukot süka nepeʼe, naʼyalajiraka tü suʼuwakat aneerü, tü najapulujutkat süka tü nekiakat. Anuujeseʼe nanüiki sümaa emetuluin maʼin shia: «Nia atkaajeechika wapüleerua Jehová nümaa Gedeón». 21 Jimajimatka na surulaatkana eejanale paala neʼitaanüin peje nanain na madianitakana. Napantajaaka na madianitakana, kookotushii neʼe naya nawatiroʼu. 22 Ayatüsia naʼyalajirüin tü suʼuwakat anneerü na 300 surulaat. Nasoniraayaa namakaʼa na surulaat madianitakana, nia maka atuma naya Jehová. Antaleeshiʼiya na surulaat madianitakana suluʼumüin tü mmakat Bet-Sitá sünainmüinreʼeya tü mmakat Zererá peje sünain tü mmakat Abel-Meholá, süʼütpaʼa Tabat.
23 Nasakajünaka napüshuaʼa na israelitakana, asakajünüshii na nüikeyuukana Neftalí, na nüikeyuukana Aser jee na nüikeyuukana Manasés. Noushikajaaka nachiirua na surulaat madianitakana. 24 Nuluwataaka Gedeón wayuu sümaa pütchi suluʼupünaa noumain na nüikeyuukana Efraín. Anuu tü pütchi nuluwataakat namüin: «Jushuta naaʼu na madianitakana, juukaja napüla eere epetüin tü süchikat Jordán jee suluʼupünaa luwopu sünainmüinreʼeya tü mmakat Bet-Bará». Outkajaashiʼiya na nüikeyuukana Efraín sümaa noutkajüin napüla na neʼipolokana eere epetüin tü süchikat Jordán jee suluʼupünaa luwopu sünainmüinreʼeya tü mmakat Bet-Bará. 25 Nütaʼünaka Oreb nümaa Zeeb, wayuu aluwataashii chaa Madián. Nuʼutunaka aaʼin Oreb saaʼu wanee ipa miyoʼu maʼin. «Oreb», münüsü mapa tia ipakat sutuma wayuu. Nuʼutunaka aaʼin Zeeb eere süchüüjünüin tü uuwakat. «Zeeb», münüsü mapa tia sutuma wayuu. Ayatüshiʼiya oushikajaanüin achiirua na madianitakana jee süntinnaka nümüin Gedeón nikii Oreb sümaa nikii Zeeb. Chajachi Gedeón suluʼu tü mma pejekat sünain tü süchikat Jordán.