Éxodo

8 Anuukalaka tü aluwataanakalü anain Moisés nutuma Jehová: «Puʼuna nümaʼanamüin faraón jee püma nümüin: ‹Anuusa nünüiki Jehová: «Püjüta nachiki na israelitakana süpüla naʼwaajüin taya. 2 Ayatülejeʼeya paʼalijirüin naya, watteerü saalii iperüʼüi tantireetka suluʼupünaa tü puumainkat. 3 Watteerü saalii iperüʼüi shirokupünaa tü süchikat Nilo, ojuʼiteerü shia shirokujee tü wüinkat, ekeroteerü shia pipialuʼu, eere putunkuin jee awateerü shia saaʼu pücamain. Ekeroteerü shia nepialuʼu na püchepchiakana jee pasanainjeena sünain na wayuu yaakana puumainpaʼa, ekeroteerü shia suluʼu ‹horno› jee suluʼu tü iita amasaajiakat. 4 Mülieechi maʼin pia sutuma iperüʼüi, mülieena maʼin sutuma na püchepchiakana jee napüshuaʼa na wayuu eekana süpaʼa tü mma eere pia»›».

5 Anuu tü nümakat Jehová mapa nümüin Moisés: «Anuu tü püküjainjatkat nümüin Aarón: ‹Paapaa tü waraaratkat jee piyurula pütüna sooʼopünaa tü süchikat, tü sütünakat tü süchikat Nilo jee tü lamuunakat. Püjüta iperüʼüi nooʼomüin na wayuu yalakana Egipto müliaiwa naya sutuma›». 6 Niyurutkalaka Aarón nütüna sooʼopünaa tü wüin eekalü Egipto, sujuʼitaka iperüʼüi shirokujee tü wüinkat jee wainmaka iperüʼüi süpaʼapünaa tü mmakalü Egipto. 7 Nashataka tia na sacerdote ooʼulaküliikana sükajee tü napülainkat, nojuʼitirüin iperüʼüi shirokujee tü wüinkat jee wainmakalaka shia natuma sainküinpünaa tü mmakalü Egipto. 8 Shiasaʼa süchikijee tia, nuunejitkalaka faraón Moisés jee müshia Aarón jee nümaka namüin: «Juchuntaʼaya maa nümüin Jehová nüshaʼleʼeraiwa toulia tü iperüʼüikat jee noulia na wayuu yaakana toumainpaʼa. Aluʼu tajüteenainjaʼa jooluʼu na israelitakana noʼutaiwa saaʼin mürüt süpüla naʼajüin shia nümüin Jehová». 9 Anuujeseʼe nünüiki Moisés nümüin faraón: «Piasaʼa neʼe taʼatapajaka anüiki süpüla tachuntuinjachin nümüin Maleiwa süpüla nüshaʼleʼerüinjatüin puulia tü iperüʼüikat, noulia na püchepchiakana, noulia na wayuu yaakana puumainpaʼa jee suulia tü jipiakat. Shieerü neʼe apütaaka tü iperüʼüikat shiroku tü süchikat Nilo». 10 «Shia anaka aluʼu wattaʼa», nümaka faraón nümüin. Anuujeseʼe nünüiki Moisés nümüin: «Shieerü aainjünaka tü pümakat pütüjaaiwa saaʼu nnojolin eein wanee maleiwa eekai müin aka naaʼin Jehová chi Wamaleiwasekai. 11 Nnojoleetka eein iperüʼüi jipialuʼu, ashaʼleʼenneerü shia puulia, noulia na püchepchiakana jee noulia na wayuu yaakana suluʼu tü mmakalü Egipto. Shieerü neʼe apütaaka tü iperüʼüikat shiroku tü süchikat Nilo».

12 Nuʼunakalaka Moisés jee müshia Aarón nümaʼanajee faraón, nuchuntaka maʼin Moisés nümüin Jehová nüshaʼleʼerüinjatüin tü iperüʼüi nuluwataakat paala nooʼomüin faraón. 13 Naaʼinrakalakaʼaya Jehová tü nuchuntakat Moisés nümüin, outayaa sümakalaka tü iperüʼüi eejatkat nepialuʼu na egipciokana, eejatka suluʼu napaatiase jee tü eejatkat suluʼu noumain. 14 Nakotchojaka shia na egipciokana sümaa neichijain shia. Keejuusü maʼin tü mmapaʼakat sutuma. 15 Niʼrapa faraón sajaʼlajaain tü iperüʼüikat, macheʼeka nia sümüin tü nümakat Moisés jee sümüin tü nümakat Aarón, nnojoishi jaa müin nia namüin maʼaka nüküjatülin shia paala Jehová.

16 Anuukalaka joo nünüiki Jehová nümüin Moisés: «Anuu tü püküjainjatkat nümüin Aarón: ‹Piyalera tü waraaratkat, pütaʼiteetka tü mmakat süka, sukumajaajeetka shipe sünainjee tü sükalirakat mma, wainmeetkalaka shia süpaʼapünaa tü mmakalü Egipto›». 17 Shia naaʼinrakaʼaya tia. Niyaletkalaka Aarón tü waraaratkat, nütaʼitaka tü mmakat süka. Sushutakalaka tü shipekat naaʼu na wayuukana jee saaʼu mürüt. Akumajaasü tü shipekat sünainjee sükalira tü mmakat, wainmakalaka shia süpaʼapünaa tü mmakalü Egipto. 18 Nayasaʼa na sacerdote ooʼulaküliikana nashateein sükajee tü napülainkat tü naainjakat Aarón, eejeesü shipe natuma, nnojotpejeʼe nountuin shia. Sushutakalaka tü shipekat nooʼomüin na wayuukana jee sooʼomüin mürüt. 19 Anuujese nanüiki na sacerdote ooʼulaküliikana nümüin faraón: «¡Aainjünüsü tia sükajee tü nüpülainkat Maleiwa!».* Ayatakalakaʼaya macheʼein nia sümüin tü münakat nümüin, nnojoishi jaa müin nia maʼaka nüküjatülin paala Jehová.

20 Nuluwataanaka Moisés nutuma Jehová sümaa nümüin nümüin: «Pütamaa wattaʼa maalü, oʼunajachi pia süpüla püntiraainjachin nümaa faraón. Oʼuneechisaʼa nia eemüin tü süchikat, anuujeetkalaka pünüiki nümüin: ‹Anuu nünüiki Jehová: «Püjüta na israelitakana süpüla naʼwaajüinjachin taya. 21 Nnojoliire püjütüin na israelitakana ajüteechi taya pooʼomüin wanee merüle aikalü ataʼa, tajüteerü shia nooʼomüin na püchepchiakana, nooʼomüin na wayuu kepiakana suluʼu tü mmakalü Egipto jee tajüteerü shia jipialuʼumüin. Watteerü saalii tia merüle aikalü ataʼa suluʼu tü miichi yaakalü Egipto jee jouleerü shia sainküinpünaa tü mma kaluʼukat jia. 22 Shiapejeʼe nnojoleerüin jamüin soʼu kaʼikat tia tü mmakat Gosén, chaa eere kepiain na israelitakana. Nnojoleerü antüin chamüin tü merüle aikalü ataʼa, pütüjaajeetkalaka saaʼu yaain taya suluʼu tü mmakalü Egipto, tayakai chi kanüliakai Jehová. 23 Naateerü tü taaʼinreetkat napüleerua na tachonniikana, na israelitakana suulia tü taaʼinreetkat namüin na egipciokana. Alateerü tia wattaʼa»›».

24 Shiaʼaya naaʼinraka Jehová tia. Watta maʼin saalii merüle aikalü ataʼa antayaa maka sooʼomüin nipia faraón, sooʼomüin nepia na nüchepchiakana jee sooʼomüin süpüshuaʼa tü mmakalü Egipto. Müliashii maʼin na egipciokana sutuma tia merüle aikalü ataʼa. 25 Neenajirakalaka faraón Moisés nümaa Aarón sümaa nümüin namüin: «Anakajaʼa juʼutule saaʼin mürüt süpüla jaʼajüinjatüin shia nümüin Maleiwa suluʼu mmakat tüü». 26 Asoutapejeʼe Moisés nümüin sünain maa: «Nnojotsüsaʼa anain waaʼinrüle tia, nalerajüin na egipciokana woʼutuin saaʼin mürüt süpüla waʼajüin shia nümüin Jehová chi Wamaleiwasekai. ¿Aashin naʼinaʼaleenain waya süka ipa woʼutule saaʼin mürüt noʼupala sümaa waʼajüin shia? 27 Müshiijeseʼe woʼunajaajeenain soʼu apünüin kaʼi isashiipaʼamüin, woʼuteenakalaka saaʼin mürüt chamüin süpüla waʼajüinjatüin shia nümüin Jehová chi Wamaleiwasekai maʼaka nuchuntuin shia wamüin».

28 Anuukalaka nünüiki faraón: «Tajüteena jia isashiipaʼamüin süpüla juʼutuinjatüin saaʼin mürüt jaʼajüinjatka nümüin Jehová chi Jümaleiwasekai. Nnojoliipejeʼe wattakualiinjanain maʼin jia. Juchunteenaka tapüleerua». 29 Anuukalaka nünüiki Moisés nümüin: «Anakajaʼa toʼunule pümaʼanajee, tachunteechikalaka nümüin Jehová püpüleerua piakai faraón, napüleerua na püchepchiakana jee napüleerua na yaakana puumainpaʼa süpüla süshaʼwalaainjatüin wattaʼa juulia müliain jia sutuma tü merüle aikalü ataʼa. Nnojoliipejeʼe pimeejüinjanain waya wachikuaʼa piakai faraón jee nnojoishii paʼalijirüinjanain na israelitakana suulia noʼunuin sünain oʼutaa saaʼin mürüt süpüla naʼajüin shia nümüin Jehová». 30 Nuʼunakalaka Moisés nümaʼanajee faraón jee nuchuntaka nümüin Jehová. 31 Naaʼinrakalaka Jehová tü nuchuntakat Moisés nümüin. Nnojolichipaka müliain faraón sutuma tü merüle aikalü ataʼa, nnojoishii müliain na nüchepchiakana namaʼaleeya na wayuu sulujunakana tia mmakat. Nnojotsü apütaain waneesiaakaijeʼe merüle aikalü ataʼa suluʼu tü mmakalü Egipto. 32 Macheʼepejeʼe faraón nüchikuaʼa, nnojoliikalaka nüjütüin na israelitakana.