Chiiruaajatka karaloʼuta Samuel
8 Nütkaakalaka David namaa na filisteokana, niyamütka naya jee nüsütüin noulia tü mma kanüliakat Meteg-Amá.
2 Niyamülüinña na moabitakana, nujulereʼerüin naya mmoluʼu süpüla nimeriijain naya süka jiiku. Nükatatka piama neʼipapaʼa süpüla noʼutunajanain aaʼin otta wane süpüla nnojoliinjanain noʼutunuin aaʼin. Nüchepchiashii David na moabitakana jee awalaajawaishii naya nneerü nümüin.
3 Niyamülüinña David Hadadézer, chi nüchonkai Rehob, chi aluwataakai saaʼu Zobá, nükanajüin nia wanaa sümaa nuʼunuin sünain alejaa tü mma nuluwataapuʼukalü aaʼu chaa süʼütpaʼa tü süchikalü Éufrates. 4 Nütaʼülüin David 1.700 surulaat amaajuna otta 20.000 surulaat. Nüshanaajüin süsaʼa tü ama ajaralajawaikat kareeta, poloo shikii neʼe tü ama nnojotkat nüshanaajüin asaʼa.
5 Nuʼuta aaʼinchii David 22.000 surulaat sirio chejeʼewalii Damasco. Antüshii naya sünain akaalinjaa Hadadézer. 6 Nuluwataaka David surulaat suluʼumüin tü mmakat Siria, tü chakat Damasco. Nüchepchiaka David na siriokana jee awalaajawaishii naya nneerü nümüin. Akaalinjünawaishi David nutuma Jehová süpüla nükanajüinjanain na nüʼünüükana eepünaweere nia. 7 Nüsütaka David noulia na aʼyataashiikana nümüin Hadadézer tü escudo aainjuushikat süka ooro eejatkat namaʼana, nülüʼüjaka shia Jerusalénmüin. 8 Wattaʼa saalii cobre nülüʼüjaka David suluʼujee tü pueulokot Bétah otta Berotái, aluwataashi Hadadézer saaʼu tia pueulokot.
9 Naapa achikit Toi, chi aluwataakai saaʼu tü mmakat Hamat, niyamülüin David napüshuaʼa na nusurulaatsekana Hadadézer. 10 Nüjütüinjeseʼe Toi wanee nüchon kanüliashi Joram nümaʼanamüin David süpüla nüsaküinjachin nia jee süpüla nüküjainjachin nümüin talatüin nia nümaa süka nükanajuuin Hadadézer nutuma. Wainmatua nütkaain Hadadézer nümaa Toi. Akolojushi Joram nümüin David wainma kasa aainjuushi süka pülaata, ooro otta cobre. 11 Nükatalaka shia David nümüin Jehová maʼaka nükatalüin tü ooro otta tü cobre nüsütakat noulia na wayuu nükanajakana, 12 maʼaka saaʼin tü nüsütakat noulia na chajanakana Siria, noulia na chajanakana Moab, noulia na ammonitakana, noulia na filisteokana, noulia na amalequitakana otta tü nüsütakat nuulia Hadadézer, chi nüchonkai Rehob, chi aluwataakai saaʼu tü mmakat Zobá. 13 Eʼnnaajünaleeshia maʼin David sutuma nuʼutuin naaʼin 18.000 edomita süpaʼa tü nasapüshii kanüliakat Ichii. 14 Niʼitaain David surulaat sainküinpünaa tü mmakat Edom otta nüchepchiashii David na edomitakana. Akaalinjünawaishi David nutuma Jehová süpüla nükanajüinjanain na nüʼünüükana eepünaweere nia.
15 Ayatüshia David aluwataain naaʼu na israelitakana jee lotusü sukuwaʼipa nutuma nunoutajachipa wanee kasa namüin na israelitakana. 16 Joab, chi süchonkai Zeruyá, nia nekiipüʼüka na surulaatkana otta Jehosafat, chi nüchonkai Ahilud, nia ashajawaikai süchiki wanee kasa alataka suluʼu tia mmakat. 17 Nia sacerdoteka soʼu tia Sadoc, chi nüchonkai Ahitub otta sacerdoteshiaʼaya Ahimélec, chi nüchonkai Abiatar. Jee nia ashajawaika Seraya süchiki wanee kasa. 18 Benaya, chi nüchonkai Jehoiadá nia nalaülajanaka na keretitakana otta na peletitakana. Aʼyataashii na nüchooinkana David niʼipajee.