Palajatka karaloʼuta Samuel
12 Anuukalaka nünüiki Samuel namüin na israelitakana: «Taaʼinrüin süpüshuaʼa tü juluwataakalü anain taya, taneeküin jümüin wanee wayuu aluwataainjachikai jaaʼu. 2 Anii chi wayuu aluwataainjachikai jaaʼu, laülaaichi taya jee kasuuichi taya, naʼasa tachonnii jaʼaka. Tekirajatüjülii jia jintüliiwaʼaya taya. 3 Jüküja maa tachiki nümüin Jehová jee nümüin chi wayuu nüneekajalakai tasütüle juulia wanee jüpaaʼase, wanee jüpüliiküse, taʼluwajüle jia, müliale jia tatuma jee taapaale wanee nneerü shiiʼiree taaʼinrajachin wanee kasa eekai mojuin. Mülejeʼeya sukuwaʼipa tia tawalaajeerü jümüin tü taainjalakat». 4 «Nnojotsü kasain püsütüin woulia jee nnojoishii waya müliain putuma. Nnojotsü paapaain wanee kasa shiiʼiree paaʼinrajachin wanee kasa eekai mojuin», namakalaka na israelitakana nümüin Samuel. 5 «Nütüjaa aaʼulu Jehová jee nütüjaa aaʼulu chi wayuu nüneekakai, nnojolin kaainjalain taya juulia», nümakalaka Samuel namüin. «Aa, shiimain», namakalaka na israelitakana.
6 Anuukalaka nünüiki Samuel namüin na israelitakana: «Aneekünüshi Moisés nümaa Aarón nutuma Jehová süpüla niyuʼluinjanain na jutuushinuukana suluʼujee tü mmakat Egipto. Nütüjaa aaʼulu nnojolin kaainjalain taya juulia. 7 Jülüja jaaʼin tü kasa taküjainjatkat jüchiki nümüin Jehová. Taküjeerü jümüin tü kasa anasü naainjakat Jehová jüpüleerua jee napüleerua na jutuushinuukana.
8 »Soʼu nukolojooin Jacob suluʼumüin tü mmakat Egipto jee nachuntuin maʼin kaalinwaa na jutuushinuukana nümüin Jehová, aluwataanüshi Moisés nümaa Aarón nutuma Jehová süpüla nayuʼluinjanain naya suluʼujee tü mmakat Egipto süpüla kepiainjanain naya suluʼu mmakat tüü. 9 Niyüülajüin Jehová na jutuushinuukana sutuma jükayalaain nuulia. Niyüülajüin naya nüpüla Sísara, chi nekiipüʼükai na surulaat chejeʼewaliikana Hazor, niyüülajüinña naya napüla na filisteokana jee nüpüla chi aluwataakai naaʼu na wayuu sulujunakana tü mmakat Moab, müliashiijeseʼe naya natuma. 10 Nachuntakalaka kaalinwaa nümüin Jehová, anuu nanüiki nümüin: ‹Kaainjalashii waya puulia Jehová, jama wakayalaain puulia. Shia neʼe naʼwaajaka niyaakuairua chi maleiwayaashi kanüliakai Baal jee shiyaakuairua tü maleiwayaasü kanüliakat Astoret. Pükaalinjaʼaya waya noulia na waʼünüükana süpüla waʼyataainjanain pümüin›. 11 Nüjütakalaka Jehová Jerubaal, Bedán, Jefté otta Samuel süpüla nükaalinjainjanain jia noulia na jüʼünüü kepiakana jüʼütpünaa, naaʼinrüin tia süpüla jimatajatüin jaaʼin. 12 Jütüjaapa saaʼu nushutuinjachin jaaʼu Nahás, chi aluwataakai naaʼu na ammonitakana, achuntushii jia kaalinwaa tamüin kojuyatua sünain maa: ‹Choʼujaashi wamüin wanee wayuu aluwataainjachikai waaʼu›, niapejeʼe Jehová chi Jümaleiwasekai aluwataain jaaʼu. 13 Aniiʼisa chi wayuu juchuntakai nümüin Jehová süpüla nuluwataainjachin jaaʼu. 14 Aneerü jukuwaʼipa ayatüle juʼwaajüin Jehová, chi Jümaleiwasekai, ayatüle nuʼwaajünüin nutuma chi wayuu aluwataakai jaaʼu. Aneeriaʼaya jukuwaʼipa kojutule jümüin Jehová, jiʼyataale nümüin, joonoole sümaa nünüiki jee nnojoliire jiʼrüliijaain wayumüin nümüin Jehová. 15 Eekajasaʼa nnojoliire joonooin sümaa nünüiki Jehová jee nnojorüle jaaʼinrüin tü nuluwataakalü anain Jehová, süsaleena jia nutuma Jehová sünainjee tia jee süsaleena nutuma na wayuu kachooinkana jia. 16 Jülüja jaaʼin tü kasa pülasü naaʼinrajatkat Jehová. 17 ¿Aashin süshannüin süchon tü trigokat maaʼutpünaa yaa? Tachunteerü nümüin Jehová sütüttai tü juyakat sümaa süʼitüin. Jiyaawateetkalaka saaʼu mojuin nümüin Jehová juchuntuin wanee wayuu süpüla nuluwataainjachin jaaʼu».
18 Nuchuntakalaka maʼin Samuel nümüin Jehová, sütüttaka tü juyakat nutuma Jehová sümaa süʼitüin soʼu kaʼikat tia. Mmotshiijeseʼe na israelitakana neema Jehová jee neema Samuel. 19 Anuukalaka nanüiki na israelitakana nümüin Samuel: «Puchunta nümüin Jehová chi Pümaleiwasekai suulia süsalain waya waainjala nutuma, nnojoishii waya outeein. Mojuleeitpa maʼin tü kasa waainjakat sünainjee wachuntuin wanee wayuu aluwataainjachikai waaʼu».
20 Anuukalaka nünüiki Samuel namüin na israelitakana: «Nnojo mmoluin jia. Shiimain mojuin tü kasa jaainjakat, ayatüinjachipejeʼe juʼwaajüin Jehová, jiʼyataa nümüin Jehová süka süpüshuaʼa jaaʼin. 21 Ayataʼaya juʼwaajüin nia jee nnojo juʼwaajüin tü maleiwayaasü nnojotkat kasain anain apüla, isasü süchiki suʼtteʼerüin wayuu. 22 Nnojoleena jia niyüülajüin Jehová süpüla kojutuinjachin nia atumawaa.* Nüneeküinnapa jia Jehová süpüla nüpüshinjanain jia. 23 Ayateechiaʼaya taya achuntuin jüpüleerua nümüin Maleiwa, nnojorüle tachuntuin jüpüleerua, kaainjaleechi taya nuulia Jehová. Ayateenaʼaya jia tekirajüin süpüla anainjatüin jee lotuinjatüin jukuwaʼipa. 24 Kojuta jümüin Jehová, jiʼyataa nümüin waneepia süka süpüshuaʼa jaaʼin. Soto jaaʼin süpüshuaʼa tü kasa naainjakat jüpüleerua. 25 Ajaʼttinneena jia nümaʼaleeya chi wayuu aluwataakai jaaʼu, ayatüleʼeya macheʼein jia süchiirua aaʼinraa kasa mojusü».