Palajatka karaloʼuta Samuel
13 Aneekünüshi Saúl süpüla aluwatawaa naaʼu na israelitakana soʼu [?]* nuuyase. Aluwataashi nia naaʼu soʼu piama juya. 2 Nüneekakalaka Saúl 3.000 surulaat chejeʼewalii Israel. Eejana nümaa Saúl 2.000 surulaat suluʼu tü mmakat Micmash otta saaʼu tü uuchi chajatkat süʼütpünaa Betel jee eejanaʼaya 1.000 surulaat nümaa Jonatán suluʼu tü mmakat Guibeá, tü noumainkat na nüikeyuukana Benjamín. Nüjütakalaka Saúl nachikuaʼa nepialuʼumüin na wane surulaatkana. 3 Naapüin na filisteokana süchiki nükanajüin Jonatán na nasurulaatse chajanakana suluʼu tü mmakat Gueba. Nuluwataakalaka Saúl wayuu süpüla shiʼyalajirajatüin tü suʼuwakat anneerü suluʼupünaa noumain na israelitakana süpüla naapinnajanain na wayuu hebreokana süchiki tü alatakat. 4 Anuu tü pütchi aküjünakat namüin napüshuaʼaleʼeya na israelitakana: «Nükanajüin Saúl waneinnua surulaat filisteo, naʼürülaanaka maaʼulu na israelitakana natuma naya wayuukana». Naapinnakalaka napüshuaʼa na surulaatkana süpüla noʼunajanain suluʼumüin tü mmakat Guilgal nümaa Saúl.
5 Outkajaashiʼiya na filisteokana süpüla nashutajanain naaʼu na israelitakana. Eejana namaa 6.000 surulaat amaajuna, eejatü namaʼana 30.000 tü neʼejenawaikat sünain atkawaa otta watta naalii na surulaat namaajanakana, watta maʼin naalii maʼaka tü jasai eekat sotpünaa palaa, noʼunakalaka suluʼumüin tü mmakat Micmash, wüinpümüin saaʼu Bet-Aven, noutkajaakalaka suluʼu tia mmakat. 6 Mmotkalaka maʼin na surulaat israelitakana neema na filisteokana, ounjulaashiijeseʼe naya suluʼupünaa koʼushii, suluʼupünaa ipa, sooʼopünaa wutai, shiinaluʼupünaa mma jee suluʼupünaa ishi. 7 Eejana waneinnua wayuu hebreo alatakana waneemüin saʼata tü süchikat Jordán, suluʼumüin tü mmakat Gad jee suluʼumüin tü mmakat Galaad, chajachipejeʼe Saúl suluʼu tü mmakat Guilgal, kutkutta’atshii neʼe sutuma mmoluu na wayuu eejanakana nümaa. 8 Naʼatapajünaka Samuel nutuma Saúl soʼunnaa akaratshi kaʼi suluʼu tü mmakat Guilgal, nnojoipejeʼe antüin Samuel soʼu tü kaʼi nüküjakalü oʼu nüntajachin. Noʼunayaa namaka na wayuu eejanakana nümaa Saúl. 9 Anuujeseʼe nünüiki Saúl: «Jüntira tamüin tü mürüt oʼutunajatkalü aaʼin jee aʼajünajatkat nümüin Maleiwa sümaʼaleeya tü kasa wasülajüinjatkat nümüin süpüla anajiraainjanain waya nümaa». Niakalaka Saúl aʼajüin tia nümüin Maleiwa.
10 Nüntalaa nümakalaka Samuel kettaapa naʼajüin Saúl tü mürütkat nümüin Maleiwa. Nuʼunakalaka Saúl nüpanapa Samuel süpüla nüsakajachin nia. 11 Anuujeseʼe nünüiki Samuel nümüin: «Mojukatche maʼin tü paainjakat». Anuukalaka nünüiki Saúl nümüin: «Taaʼinrüin tia süka noʼunayaa namüin na surulaatkana toulia. Nnojoishi pia antaatüin soʼu tü kaʼi püntajachikalü oʼu paajüin otta outkajaayaa müshii na filisteokana suluʼu tü mmakat Micmash. 12 ‹Anteenainjaʼa yaamüin na filisteokana süpüla nashutajanain taaʼu, nnojoiyüitpejeʼe taya achuntuin kaalinwaa nümüin Jehová›, tamakalaka suluʼu taaʼin. Müshijeseʼe tayain aʼajüin tia mürütkat nümüin».
13 Anuujeseʼe nünüiki Samuel nümüin Saúl: «Mojusü maʼin tü paaʼinrakat. Nnojotsü paaʼinrüin tü nuluwataakalü anain pia Jehová, chi Pümaleiwasekai. Piayüije aluwataaka nutuma Jehová namaa na püikeyuukana naaʼu na israelitakana süpüla kaʼikat süpüshuaʼa paaʼinrüle tü nümakat. 14 Nnojoleenapejeʼe jiain aluwataain. Nüchajaajeechi Jehová wanee wayuu talatakai atuma naaʼin, aneeküneechi nia nutuma Jehová süpüla niainjachin aluwataain naaʼu na nüpüshikana, jama nnojoluin paaʼinrüin tü nuluwataakalü anain Jehová».
15 Nuʼunakalaka Samuel suluʼujee tü mmakat Guilgal suluʼumüin tü mmakat Guibeá, eere noumain na nüikeyuukana Benjamín. Niyaawajaka Saúl na wayuu apütaakana nümaa, eeshii maʼaka naaʼin 600. 16 Chajachikalaka Saúl suluʼu tü mmakat Gueba, tü noumainkat na nüikeyuukana Benjamín nümaʼaleeya Jonatán jee namaa na surulaat eejanakana namaa. Chajanakajasa na filisteokana outkajaain suluʼu tü mmakat Micmash. 17 Apünüinsü neʼipapaʼa na surulaat ojuʼitakana naʼakajee na filisteokana, noʼunakalaka waneinnua surulaat suluʼupünaa süpüna tü mmakat Ofrá, tü chakat wanaapünaa sümaa tü mmakat Sual. 18 Eeshii na surulaat oʼunakana suluʼupünaa tü wopu chaʼwatkat Bet-Horón, nayasaʼa na wane surulaatkana, oʼunushii suluʼupünaa tü wopu chaʼwatkat sünainmüin tü namüna eejeere jaʼyashiin tü nasapüshii chajatkat Zeboím, wanaa maʼin sümaa tü isashiikat.
19 Nnojoishi eejachin wanee wayuu suluʼu tü mma eere kepiain na israelitakana, eekai niʼyataain sünain akumajaa wanee kasa süka kachueera, jama namüin paalajee na filisteokana: «Anashii wachajaale sukuwaʼipa süpüla nnojoluin nakumajüin na hebreokana wanee chajaruuta jee shiale wanee lanza».* 20 Antawaishii napüshuaʼa na israelitakana namaʼanamüin na filisteokana süpüla süsalajünüin namüin tü kachueera najaralawaikalü aka, tü picokot, tü napoluinkat jee müsia tü chajaruuta nashanawaikalü aka aʼttiee. 21 Awalaajawaishii na israelitakana wanee pim* süpüla süsalajünüinjatüin namüin tü najaralawaikalü aka, süpüla süsalajünüinjatüin namüin tü picokot, tü kachueera apünüinkalü eʼichi, tü napoluinkat jee süpüla süsalajünüin namüin tü wunuʼu keʼichikat kachueera. 22 Nnojotsü eejatüin chajaruuta jee lanza namaʼana na surulaat eejanakana nümaa Saúl otta na eejanakana nümaa Jonatán no’unawaipa sünain atkawaa, niaʼala neʼe eejachika amaʼana tia Saúl nümaa Jonatán.
23 Noʼunakalaka waneinnua surulaat filisteo suluʼupünaa tü wopu alatakat pasanainpünaa sünain tü patajatshii chajatkat suluʼu tü mmakat Micmash.