Tü nüshajalakat Juan
20 Soʼu tü kaʼi shiinaluʼujeekat semaana, suʼunakalaka María Magdalena wattachon chaa amuuyuupaʼamüin. Piʼyuuiwajatü, shiʼrüinjeseʼe süsünneʼeruushin tü ipa soʼulujunakat tü woowirakat. 2 Suwataakalaka eemüin Simón Pedro otta eemüin chi wane nikirajüinkai Jesús, chi aishikai maʼin nüpüla Jesús, sümakalaka namüin: «Apataanüshi chi Señotkai suluʼujee woowirakat, nnojotka watüjaain saaʼu jalain nia eʼitaanüin».
3 Nuʼunakalaka Pedro otta chi wane nikirajüinkai Jesús chaa eemüin tü woowirakat. 4 Nawataaka piamaleʼeya, niakalaka antüin palajana chi wane nikirajüinkai Jesús eemüin tü woowirakat, jama kawatirain maʼin nia nuulia Pedro. 5 Nejepülaaka süpüla anaʼlawaa suluʼu tü woowirakat, shiaka neʼe niʼrüin tü kuluulu kanüliakat lino, nnojoipejeʼe nia ekeroluin. 6 Yaaülerü, nüntakalaka Simón Pedro jee nikeroloko suluʼumüin tü woowirakat. Yalajatüjaʼaya niʼrüin tü kuluulu kanüliakat lino. 7 Tü kuluulu akoʼonnokalü aka nikii Jesús, nnojotsü yalajatüin sümaa tü wane kuluutkalüirua, chajatü akoʼoyojuushin sümüiwaʼa. 8 Mapa, nikerotoko chi wanee nikirajüinkai Jesús, chi antüshikai palajana eemüin tü woowirakat. Eirakaashijeseʼe nia jee nunoujakalaka sünain tü aküjünakat paala namüin. 9 Nnojotsü nayaawatüin saaʼu tü sümakat tü Karaloʼuta Nüchikimaajatkat Maleiwa, eere süküjünüin nüsoʼireʼennajachin aaʼin Jesús süchikijee outaa. 10 Naleʼejaka na nikirajüinkana Jesús nepialuʼumüin.
11 Shaʼwatakalaka María sünain aʼyalajaa yala süʼütpaʼa tü woowirakat. Sümaʼainruʼu shiʼyalajüin, sejepülaaka sünain eirakawaa suluʼupünaa tü woowirakat. 12 Shiasaʼa eejachire niʼitaanüin müliashii, shiʼraka piamashii aapiee nümaʼanajeejana Maleiwa, kasuujasü maʼin nasheʼin. Eejachi wanee joyotuin nikiinainjee otta chi wane chajachi joyotuin nuuʼuinainjee. 13 Anuujeseʼe nanüiki na aapieekana sümüin: «Nii waaʼiraa, ¿jamüsü piʼyalajakaʼa?». Susoutakalaka namüin: «Apataanüshi chi Señotkai, nnojotkalaka tatüjaain saaʼu jalain niʼitaanüin». 14 Süchikijee süküjain tia, shiirakaaka süchiiruajee, shiʼraka Jesús shaʼwatüin. Nnojoipejeʼe nia shiyaawatüin. 15 Nüsakitka shia Jesús: «Nii waaʼiraa, ¿jamüsü piʼyalajaka? ¿Jara püchajaaka achiki?». Niayaa saaʼinruʼu chi wayuu aʼyataaikai suluʼu tü yüüjakat jee sümakalaka nümüin: «Tawalachee, pialejeʼeya apataain chi Señotkai püküja tamüin jalain nia piʼitaain, tasaajeechikalaka nia». 16 «María», nümakalaka Jesús sümüin. Shiirakaaka süchiiruajee sümaa sümüin nümüin suluʼu hebreo, «¡Rabbóni!» («ekirajüikalee», maluʼulu tia). 17 Anuujeseʼe nünüiki Jesús sümüin: «Püjüta tachiki, moʼunuinyüiya taya eemüin chi Tashikai. Puʼuna eemüin na tawalayuukana jee püküja tanüiki namüin sünain maa: ‹Oʼunajaisaʼa taya eemüin chi Tashikai, chi Jüshikaijaʼaya jiakana. Chi Tamaleiwasekai jee chi Jümaleiwasekaijaʼaya›». 18 Suʼunakalaka María Magdalena eemüin na nikirajüinkana Jesús jee sümakalaka namüin: «¡Teʼrüin chi Señotkai!», süküjakalaka namüin tü nüküjakat Jesús sümüin.
19 Motsouupa, soʼuleʼeya kaʼikat tia, noutkajaaka na nikirajüinkana Jesús sümaa nasülajaain tü miichoʼukot süka yaawe, jama mmoluin maʼin naya neema na judíokana. Niiʼiyalaʼalaa nümaka Jesús pasanain nanain jee nümakalaka namüin: «Kasataalejeseʼe anain jia». 20 Süchikijee nüküjain tia, niiʼiyatakalaka Jesús namüin tü nülioʼu najapünainkat jee tü nuwatsenainkat. Talatakalaka maʼin naaʼin na nikirajüinkana neʼrapa chi Señotkai. 21 Nusoutaka Jesús nüchikuaʼa namüin: «Kasataalejeseʼe anain jia. Taluwataain jia maʼaka nuluwataain taya chi Tashikai». 22 Shiasaʼa süchikijee nüküjain tia, nujuʼulakalaka naya jee nümakalaka namüin: «Anakajaʼa eere jaaʼu tü nüpülainkat Maleiwa. 23 Motule jaaʼin naainjala wanee wayuu, alatinneerü naainjala. Eekajasaʼa nnojorüle motuin jaaʼin naainjala, nnojoleerü alatinnüin nuulia».
24 Wanaa sümaa nüntüin Jesús nnojoishi yalajachin Tomás, niajaʼa napüshi na Polookana Piamamüin, chi «Senkeyuu» münakai. 25 Müshiijeseʼe namüin na nikirajüinkana Jesús nümüin Tomás: «Weʼrüin chi Señotkai». Nusoutakalaka Tomás namüin: «Nnojorüle teʼrüin süchikanain külaawa sünain najapü, nnojoleerü tanoujain tü jümakat. Akaataajaʼa nnojorüle teʼitaain tajapü sünain tü nülioʼu nuwatsenainkat, nnojoleerü tanoujain tü jümakalia».
26 Mekiisat kaʼi süchikijee tia, noutkajaaka na nikirajüinkana Jesús suluʼuya tia miichikat, yalajachikalaka Tomás namaa. Mayaapejeʼe süsürünnüin tü miichoʼukot süka yaawe, niiʼiyalaʼalaa nümaka Jesús pasanain nanain sümaa nümüin namüin: «Kasataalejeseʼe anain jia». 27 Anuujeseʼe nünüiki Jesús nümüin Tomás: «Piʼitaa pajapü yaʼayaa piʼraiwa sülioʼu tajapü, piʼitaʼaleeya pajapü yaa tawatsenainña. Nnojo wainmajüin paaʼin, anashi kanourale pia». 28 Nusoutakalaka Tomás nümüin: «¡Piala maʼin Taseñotsekai jee Tamaleiwasekai!». 29 Anuujeseʼe nünüiki Jesús nümüin: «¿Kanoulaichipa pia süka piʼrüichipain taya? Anataʼaleeshijaʼa maʼin chi wayuu nnojoikai eʼrüin wanee kasa, kanoulapejeʼe nia».
30 Wainma tü kasa pülasü naainjakat Jesús noʼupala na nikirajüinkana, nnojotka ashajünüin achiki suluʼu rooyokot tüü. 31 Ashajünüsü pütchikat tüü süpüla junoujainjanain niain Jesús chi Cristo münakai, chi Nüchonkai Maleiwa. Kateetkalaka joʼu süpüla kaʼikat süpüshuaʼa sünainjee nünülia.