Levítico

27 Yootokalaka Jehová nüchikuaʼa nümaa Moisés sümaa nümüin nümüin: 2 «Anuu tü püküjainjatkat namüin na israelitakana: ‹Nüküjale wanee wayuu nuwalaajüinjachin tamüin tayakai Jehová tü nüliapalakat wanee wayuu süpüla nikeraajüinjatüin tü pütchi nüpansaajakat tamüin, anuu tü nuwalaajüinjatkat: 3 awalaajüinjachi wanee wayuu 570 gramo* nneerü aainjuushika süka pülaata piamale shikii nuuyase sünainmüin aipirua shikii nuuyase, nuwalaajüinjatü shia wanaapünaa sümaa shipesajia wanee kasa suluʼu tü miichi aʼwaajüleekat. 4 Jierüle shia awalaajüinjatü 342 gramo* nneerü aainjuushika süka pülaata. 5 Jaʼraire nuuyase wanee wayuu sünainmüin piama shikii nuuyase, awalaajüinjachi nia 228 gramo* nneerü aainjuushika süka pülaata, jierüle shia, awalaajüinjatü 114 gramo* nneerü aainjuushika süka pülaata. 6 Nialejeʼeya wanee joʼu waneeichikai kashi sünainmüinreʼeya jaʼrai nuuyase, awalaajüinjachi nia jaʼrai shikii akaratshimüin gramo* nneerü aainjuushika süka pülaata, jietchonle shia, awalaajüinjatü 34,2 gramo* nneerü aainjuushika süka pülaata.

7 »›Aipiruale shikii nuuyase wanee wayuu jee sülatüle suulia tia, awalaajüinjachi nia 171 gramo* nneerü aainjuushika süka pülaata, jierüle shia, awalaajüinjatü 114 gramo* nneerü aainjuushika süka pülaata. 8 Maʼletsere joo chi wayuu apansaajakai nünüiki tamüin süpüla nuwalaajüinjatüin tü nüliapalakat wanee wayuu, oʼunajachi nia nümaʼanamüin chi sacerdotekai, nüküjeetka chi sacerdotekai nümüin tü nuwalaajüinjatkat. Nüküjeerü tia chi sacerdotekai wanaapünaa sümaa tü eekat süpüla nuwalaajüin chi wayuu apansaajakai nünüiki tamüin.

9 »›Nüküjale wanee wayuu naapajatüin wanee mürüt eekai wulein tamüin tayakai Jehová, akatannajatü tia mürütkat tamüin tayakai Jehová. 10 Nnojotsü aʼwanajaanajatüin tia mürütkat, nnojotsü aʼwanajaanajatüin wanee mürüt eekai anain süka wanee eekai ayuulin jee nnojotsü aʼwanajaanajatüin wanee eekai ayuulin süka wanee eekai anain. Eekajasaʼa suʼwanajaanüle wuleinjatü tü mürüt aapünakat paala sümaʼaleeya tü mürüt aapünakat shiiʼiraka. 11 Shiale aapünajatüin wanee mürüt eekai yarüttüin nnojotka anain süpüla suʼutunuin aaʼin süpüla saapünüin tamüin tayakai Jehová, eʼikajaanajatü tia mürütkat nümaʼanamüin chi sacerdotekai. 12 Nüküjeerü chi sacerdotekai jeʼrainjatüin sülia tü mürütkat wanaapünaa sümaa ayuuire jee nnojorüle ayuulin shia, shiainjatü süliaka tü niʼitaakat chi sacerdotekai. 13 Niyaʼlajeere chi wayuukai süchikuaʼa tü mürütkat, naapüinjatü wanee shiʼipa sooʼomüin sülia tü niʼitaakat chi sacerdotekai sünainjee jaʼraisü shiʼipa sülia tü nüwalaajüinjatkat.

14 »›Nükatarüle wanee wayuu tü nipiakat süpüla naapüinjatüin shia tamüin tayakai Jehová, nüküjeerü chi sacerdotekai jeʼrainjatüin sülia wanaapünaa sümaa anale tü miichikat jee mojule shia, shiainjatü süliaka tü niʼitaakat chi sacerdotekai. 15 Niyaʼlajeere chi wayuukai süchikuaʼa tü nipia nükatalakat paala, naapüinjatü wanee shiʼipa sooʼomüin sülia tü miichikat sünainjee jaʼraisü shiʼipa sülia tü nüwalaajüinjatkat, nipieetkalaka shia süchikuaʼa.

16 »›Nükatarüle wanee wayuu shiʼipa nuumain süpüla naapüinjatüin shia tamüin tayakai Jehová, aküjüneerü jeʼrain sülia wanaapünaa sümaa tü süʼü cebada choʼujaakat süpüla süpünajünüinjatüin: tü süliainjatkat 130 kilo* cebada shieerü 570 gramo* nneerü aainjuushika süka pülaata. 17 Nükatarüle tia nuumainkat tamüin tayakai Maleiwa soʼu tü Juya Taashinjatkalü Oʼu Wayuu, nnojoleerü aʼwanajaain tü süliakat. 18 Nükatarüle tia nuumainkat tamüin tayakai Maleiwa süchikijee tü Juya Taashinjatkalü Oʼu Wayuu, nüküjeerü chi sacerdotekai jeʼrainjatüin sülia wanaapünaa sümaa tü juya choʼujaayütkalia süpüla süntüinjatüin tü Juya Taashinjatkalü Oʼu Wayuu, paliʼireetka tü süliakat. 19 Niyaʼlajeere joo chi wayuukai süchikuaʼa tü mma nükatalakat paala tamüin tayakai Maleiwa, naapüinjatü wanee shiʼipa sooʼomüin sülia tü mmakat sünainjee jaʼraisü shiʼipa sülia tü nuwalaajüinjatkat, nuumainjeetkalaka shia süchikuaʼa. 20 Nnojorüle niyaʼlajüin süchikuaʼa tia nuumainkat jee süikünataarüle joo nümüin wanee wayuu naata, nnojoluitpa süpüla shiyaʼlajünüin süchikuaʼa tia mmakat. 21 Nnojotpa süpüla shiyaʼlajünüin süchikuaʼa tia mmakat soʼu tü Juya Taashinjatkalü Oʼu Wayuu, akatanneerü tü mmakat tamüin tayakai Jehová süpüla taʼwaajünüin, noumainjeetka tia mmakat na sacerdotekana.

22 »›Nükatarüle wanee wayuu wanee mma niyaʼlajaka süpüla naapüinjatüin shia tamüin tayakai Jehová jee nnojorüle shiʼipünaaushin nüpüla tia natuma na nutuushinuukana, 23 niyaawajeerü chi sacerdotekai jeʼrainjatüin sülia wanaapünaa sümaa tü juya choʼujaayütkalia süpüla süntajatüin tü Juya Taashinjatkalü Oʼu Wayuu, nüküjeetkalaka soʼuleʼeya kaʼikat tia jeʼrainjatüin sülia. Shia wanee kasa akataluushika tamüin tayakai Jehová kojutuka maʼin. 24 Soʼu tü Juya Taashinjatkalü Oʼu Wayuu, aleʼejinneerü tü mmakat nümüin chi wayuu niyaʼlajakai oulia shia, chi koumainkai tü mmakat.

25 »›Aküjüneerü jeʼrain sülia wanee kasa wanaapünaa sümaa shipesajia wanee kasa suluʼu tü miichi aʼwaajüleekat, poloo piamamüin gramo* tü waneekat siclo.

26 »›Nnojotpejeʼe nükatalüinjatüin wanee wayuu shiʼiruma nümüʼlüin süpüla naapüinjatüin shia tamüin tayakai Jehová, süka takatalüitpain shia tamüin joʼuuiwaʼaya shia, jaʼitashi niale wanee paaʼa jee shiale wanee anneerü, taya kamüinka tayakai Jehová. 27 Shialejeʼe wanee mürüt eekai yarüttüin awalaajüinjachin nia tü süliakat süpüla saapünüinjatüin nümüin süchikuaʼa, sünainjee jaʼraisü shiʼipa sülia tü nüwalajüinjatkat naapüinjatü wanee shiʼipa sooʼomüin. Nnojorüle shiyaʼlajünüin süchikuaʼa, oiküneerü shia wanaapünaa sümaa tü süliapalakat.

28 »›Nnojotpejeʼe süpüla suikünüin jee shiyaʼlajünüin süchikuaʼa wanee kasa nükatalaka wanee wayuu paala saʼakajee tü kasa eekat nümaʼana naapaka* tamüin tayakai Jehová, shiale wanee wayuu, wanee nümüʼlüin jee shiale wanee nuumain. Kojutusü maʼin tü kasa nükatalakat wanee wayuu süpüla naapajatüin shia tamüin tayakai Jehová. 29 Jaʼitakajeʼe wanee wayuu süsalakai naainjala atumawaa sümaa naapünüin ekii süpüla outaa nnojoishi süpüla naakajinnüin, outajachiaʼaya nia.

30 »›Sünainjee poloosü shiʼipa aapünajatü wanee shiʼipa tamüin tayakai Jehová, shiale sünainjee süchon pünajüt jee shialejeʼe sünainjee süchon tü wunuʼuliakalüirua. Shia wanee kasa kojutuka maʼin tamüin tayakai Jehová. 31 Niyaʼlajeere nüchikuaʼa wanee wayuu tü shiʼipa naapüitpakat, acheküsü naapajatüin wanee shiʼipa sooʼomüin sünainjee jaʼraisü shiʼipa naapaka. 32 Sünainjee poloosü paaʼa jee sünainjee poloosü anneerü sümaa kaaʼula pükatalüinjatü waneesia tamüin tayakai Jehová. Niyaawajapa wanee arüleejüi tü nümüʼlüinkat,* nükatalüinjatü waneesia tamüin sünainjee poloosü nümüʼlüin, kojutusü maʼin tü nümüʼlüin nükatalakat. 33 Nnojotsü anaʼnnajatüin anale jee ayuuire wanee mürüt, nnojotsü aʼwanajaanajatüin shia. Nuʼwanajaataarüle joo wanee wayuu tia mürütkat, tü mürüt eetüjütkalia paala sümaa tü eekai shiʼirakainjatüin nutuma, aapünajatü tamüin tayakai Maleiwa, nnojotsü süpüla shiyaʼlajünüin süchikuaʼa›».

34 Tia shia tü nuluwataakalü anain Jehová na israelitakana nükajee Moisés saaʼu tü uuchikat Sinaí.