Génesis
7 Anuukalaka nünüiki Jehová nümüin Noé süchikijee tia: «Anakajaʼa pikerotule suluʼu tü anuwakat namaa na kasayuukana pünain, jama tayaawatüin saaʼu lotuin pukuwaʼipa noulialeʼeya na wayuu eekana maaʼutpünaa. 2 Saʼakajee tü mürüt eekai wulein saashin wayuu, akaratshiwalinjatü pikerotitka, eeinjatü tooloyuu otta jieyuu jee saʼakajee tü eekai nnojoluin wulein saashin wayuu, piamawalinjatü wanee toolo otta wanee jierü. 3 Akaʼaya tü wüchii waawatakalü akaratshinjatü tü pikerotirakat, eeinjatü tooloyuu otta jieyuu. Watteetkalaka saalii süchonnii süpaʼapünaa tü mmakat. 4 Choʼujaʼalaa neʼe akaratshi kaʼi süpüla taʼitirüin wanee juya soʼu pienchi shikii kaʼi jee pienchi shikii ai. Tajaʼttireetkalaka süpüshuaʼa tü kasa takumalakat süpaʼajee tü mmakat». 5 Noonookalaka Noé sümaa süpüshuaʼa tü nuluwataakalü anain nia Jehová.
6 Seiscientos nuuyase Noé soʼu süʼitüin tü Juya Miyoʼukat maʼin yaa mmapaʼa. 7 Süpülapünaa süʼitüin tü Juya Miyoʼukat maʼin, ekerotushi Noé suluʼu tü anuwakat sümaa nuʼwayuuse, namaa nüchonnii jee müsia naʼwayuuse na nüchonniikana. 8 Ekorotusiaʼaya suluʼu tü anuwakat tü mürüt eekai wulein saashin wayuu sümaʼaleeya tü eekai nnojoluin wulein, ekerotusü tü wüchiikalüirua jee müsia süpüshuaʼa tü eejatkat süpaʼapünaa tü mmakat. 9 Süntayaa sümakalaka eemüin Noé jee shikeronuwaaka suluʼu tü anuwakat sümaa piamawalin shia, eeshi eekai tooloin jee eekai jierüin maʼaka nuluwataain shia Maleiwa nümüin Noé. 10 Akaratshi kaʼi süchikijee tia, süʼitakalaka tü Juya Miyoʼukat maʼin.
11 Soʼu 600 nuuyase Noé, soʼu polooin akaratshimüin sükalia tü piamakat kashi, müsü süjütünakai aaʼin tü wüin chajatkat sirumatuʼu* jee müsü sujutannakai aaʼin süpüla süʼitajatüin maʼin tü juyakat. 12 Kaʼüliaka maʼin tü juyakat soʼu pienchi shikii kaʼi jee pienchi shikii ai. 13 Nikerotakalaka Noé suluʼu tü anuwakat soʼu kaʼikat tia. Ekerotushiaʼaya nia sümaa tü nuʼwayuusekat jee müshiʼiya na nüchonniikana. Chi kanüliakai Sem, Cam jee müshia Jafet, ekerotusiaʼaya naʼwayuuse namaa. 14 Ekerotushii naya suluʼu tü anuwakat sümaa süpüshuaʼa tü wüchii wünaʼapüjatkat sümaa naatayaa müin sukuwaʼipa, ekerotusiaʼaya süpüshuaʼa tü mürütkalüirua suluʼu naatayaa müin sukuwaʼipa, tü wüchii lemütüsükat jee müsia tü eekai waawatüin sümaa naatayaa müin sukuwaʼipa jee wüchii maʼleekalia. 15 Süntayaa sümakaʼa eemüin Noé süpüshuaʼa tü eekai katüin soʼu jee shikerotaka suluʼumüin tü anuwakat sümaa piamawalin shia. 16 Shikerotaka tü mürütkalüirua suluʼu tü anuwakat, eekai tooloin jee eekai jierüin, wanaapünaa sümaa tü aluwataanakalü anain Noé nutuma Maleiwa. Nüsürütka Jehová soʼu tü anuwakat nikerotapa Noé.
17 Süʼitakalaka maʼin tü juyakat soʼu pienchi shikii kaʼi. Ayataka süsetüin tü wüinkat, shiyaleraaka tü anuwakat sutuma iipünaamüin maʼin sümaa samatüin shia. 18 Ayatakalaka miyoʼuin tü wüinkat sümaa süsetüin, samatapejeʼe tü anuwakat shirokupünaa. 19 Alanaʼaleesia tü wüinkat sooʼopünaa tü uuchi miyoʼuyuukat. 20 Alatüsü tü wüinkat aipirua metro* sooʼopünaa tü uuchikat.
21 Outakalaka süpüshuaʼa tü kasa eejatkat süpaʼa tü mmakat, outusü wüchii, outusü mürüt, wüchii wünaʼapüjatü, outusü eekai tünnatüin sümaʼaleeya wayuu. 22 Outakalaka süpüshuaʼa tü eejatkat süpaʼa tü mmakat, tü eekai süsanalüin saaʼin. 23 Najaʼttiraka Maleiwa süpaʼajee mmakat süpüshuaʼa tü kasa eekai katüin soʼu, ajaʼttüsü wayuu, mürüt, wüchii eekai lemütüin jee müsia eekai waawatüin, ajaʼlajaasü süpüshuaʼa. Niaʼala neʼe oʼttaaka Noé namaa na eejanakana nümaa suluʼu tü anuwakat. 24 Ciento cincuenta kaʼi siraaka oʼu tü mmakat sutuma tü wüinkat.