Rut
1 Eejatka wanee jamü chaa Israel nakalioʼu na nekiipüʼükana na israelitakana. Eejachika wanee wayuu chejeʼewai Belén suluʼu tü mmakat Judá, akolojooshi nia sümaa nuʼwayuuse jee namaa na piamashiikana nüchonnii chaa suluʼumüin tü mmakat Moab süpüla kepiainjachin nia chamüin. 2 Elimélec* nünülia chia wayuukai, Noemí* sünülia tü nuʼwayuusekat, Mahlón* nünülia wanee nüchon jee chi wane Kilión* nünülia. Chejeʼewalii naya Efrata, tü Belén chakat Judá. Antüshiijeseʼe naya suluʼumüin tü mmakat Moab, chaʼaleeinnaka naya.
3 Nünaajaakalaka Elimélec mapa, shiaka apütüüin sümüiwaʼa Noemí, tü nuʼwayuusekat. Nayaʼala neʼe eejanakana sümaa na piamashiikana süchonnii. 4 Kaʼwayuusekalaka mapa na süchonniikana Noemí, wayuu chejeʼewalii Moab. Orpá sünülia wanee otta Rut sünülia tü wane. Kepiakalaka naya poloo juya chayaa. 5 Nanaajaaka na piamashiikana süchonnii Noemí, Mahlón nümaa Kilión. Nnojoliinnapaka na süchonniikana nümaʼaleeya chi suʼwayuusekai. 6 Süleʼejaakalaka süchikuaʼa suumainpaʼamüin namaa na saʼünnüükana, jama saapüin süchiki chaiwaʼaya shia Moab sotuin naaʼin Jehová na nüpüshikana jee naapüin tü neküinjatkat.
7 Suʼunakalaka Noemí shipialuʼujee namaʼaleeya na piamashiikana saʼünnüü. Sümaʼinruʼu wopuluʼuin naya Judámüin, 8 sümakalaka Noemí namüin na saʼünnüükana: «Anashii jüleʼejaale jüchikuaʼa waneʼewai jukua sümaʼanamüin jüi. Kasataalejeseʼe nümülialaain* Jehová jaalin maʼaka jümülialaain taalin jee naalin tachonnii. 9 Kasataalejeseʼe nükaalinjain jia Jehová süpüla jüntüin nünain wanee wayuu anakai süpüla juʼwayuusein waneʼewai jukua, aneetka jukuwaʼipa». Sutuʼlakalaka naya Noemí nawalapaʼa jee naʼyalajakalaka maʼin. 10 «Nnojoishii waya aleʼejaainjanain, oʼunajanaʼaya waya pümaa jee kepiainjana waya naʼaka na wayuu kepiakana puumainpaʼa», namakalaka sümüin Noemí. 11 Anuujeseʼe sünüiki Noemí namüin: «Aleʼejüinjanaʼaya jia tachonniwaa. ¿Jamüshii juʼunajanakaʼa tamaa? Anayütche joo taya süpüla kachonwaa shiiʼiree taapüinjanain naya jümüin süpüla naʼwayuuseinjanain jia. 12 Anashii jüleʼejüle tachonniwaa, juʼuna jümaala. Wayuuirü muloʼu taya süpüla kaʼwayuuseinjatüin taya. Jaʼitakajaʼa kaʼwayuusetaale taya saʼwaijee jee kachonle taya, 13 ¿jaʼatapeenasaʼaya muloʼuyuuin na tachonniikana süpüla kasaalüin jia namaa? ¿Ayateenaʼaya maʼwayuusein jia sujuunaluʼu tia? Nnojo jaaʼinrüin tia tachonniwaa. Müshi aka peʼipaakai naaʼin Jehová tamaa jee mojusü maʼin taaʼin sutuma müin jukuwaʼipa mayaa».
14 Naʼyalajakalaka maʼin nachikuaʼa. Süchikijee tia, sutuʼlaka Orpá suwalapaʼa tü saʼütkat jee suʼunakalaka, shiapejeʼe aʼalijiraain Rut. 15 Anuujeseʼe sünüiki Noemí sümüin Rut: «Ichaa aleʼejaain tü nuʼwayuusekat chi püleshikai namaʼanamüin na wayuu suumainpaʼajeʼewaliikana. Aleʼejüsü shia sünain aʼwaajaa sümaleiwase, anasü puʼunule sümaa».
16 Anuujeseʼe sünüiki Rut sümüin Noemí: «Nnojo puchuntuin tamüin taleʼejüinjatüin toumainpaʼamüin jee tapütajatüin pia pümüiwaʼa. Oʼuneerü taya jalapünaale puʼunuin tapüleerua. Atunkeerü taya pümaa jalale aipaʼain paaʼu, tapüsheena na püpüshikana jee taʼwaajeechi chi Pümaleiwasekai wanaa pümaa. 17 Ayateeriaʼaya taya suluʼu tü mma eere pojoitunuin waneʼereeya outapa taya, tojoituneetka püʼütpaʼa. Kasalajaneerü tamüin nutuma Jehová takatalaale puulia, nnojoleerü tapütüin pia pümüiwaʼa aluʼujasaʼa outule taya jee pialejeʼeya outuin».
18 Nnojotkalaka jamüin sünüiki Noemí sümüin Rut süka macheʼein Rut shiiʼiree oʼunaa sümaa. 19 Noʼunakalaka piamaleʼeya Belénmüin, ponoko naya saaʼin wayuu maʼleekalia nantapa chamüin. «¿Shiayaachejeʼe Noemí türa?», mayaa müshii na jieyuukana. 20 Anuujeseʼe sünüiki Noemí namüin: «Nnojo Noemí jümüin tamüin, Mara* jüma tamüin, jama teʼrüin tamüliala nutuma Maleiwa. 21 Nnojotsü kasain choʼujaain tamüin wanaa sümaa toʼunuin, anuupejeʼe neʼe taya aleʼejüin nutuma Jehová sümaa nnojoluin kasain eein tamaʼana. Nnojo Noemí jümüin tamüin, jama müin teʼipolokai naaʼin Jehová, eʼrüsü taya tamüliala nutuma Maleiwa».
22 Shia sukuwaʼipaka Noemí tia süleʼejapa suluʼujee tü mmakat Moab. Aleʼejüsü shia sümaa Rut tü saʼüt chejeʼewatkat Moab. Antüshii naya Belénmüin soʼu tü kaʼi suʼttakalü oʼu süshannüin tü aʼttiee kanüliakat cebada.