Chiiruaajatka karaloʼuta Samuel
24 «Anashii pücensajirüle na israelitakana jee na nüikeyuukana Judá», nümakalaka wanee wayuu nümüin David süpüla naaʼinrüinjatüin wanee kasa namüin na israelitakana. Jashichikalaka Jehová nüchikuaʼa namüin na israelitakana sünainjee tia. 2 «Anashi puʼunule naʼakapünaa napüshuaʼa na israelitakana süpüla pücensajüinjanain naya, tatüjaajeetkalaka saaʼu jeʼrain naya napüshuaʼa. Anasü paaʼinrüle tia suluʼujee tü mmakat Dan sünainmüinreʼeya Beer-Seba», nümakalaka David nümüin Joab, chi nekiipüʼükai na surulaatkana wanaa sümaa yalajachin nia nüʼütpaʼa. 3 Anuukalaka nünüiki Joab nümüin David: «Kasataalejeseʼe nakooʼomüinraain* na wayuu puluwataakana aaʼu nutuma Jehová, chi Pümaleiwasekai jee kasataalejeseʼe piʼrüin nakooʼomüinraain na wayuukana. Señotkalee, nnojotpejeʼe anakai saaʼin tü paaʼinreekalü amüin».
4 Kaawainpejeʼe maʼin nünüiki David suulia nünüiki Joab jee suulia nanüiki na nekiipüʼükana na surulaatkana. Nuʼunakalaka Joab nümaʼanajee David jee oʼunushiʼiya nümaa na nekiipüʼükana na surulaatkana, oʼunushii naya süpüla nacensajüinjanain na israelitakana. 5 Nalatakalaka tü süchikat Jordán jee noʼotokoloko suluʼumüin tü pueulokot Aroer, tü uuchijeekat sünain tü pueulo pasanainkat sünain luwopu. Oʼunushiijeseʼe naya suluʼumüin noumain na nüikeyuukana Gad jee oʼunushii naya suluʼumüin tü mmakat Jazer. 6 Süchikijee tia noʼunakalaka Galaadmüin jee suluʼumüin tü mmakat Tahtim-Hodsí, wattashiijeseʼe naya suluʼumüin tü mmakat Dan-Jaán jee nojununtaakalaka Sidónmüin. 7 Noʼunakalaka suluʼumüin tü pueulo kasepüka kanüliakat Tiro, oʼunushiʼiya naya suluʼupünaa noumain na heveokana jee na cananeokana, suluʼumüin tü mmakat Négueb tü chakat Judá, suluʼu tü pueulokot Beer-Seba. 8 Nantakalaka Jerusalénmüin mekietsatpa kashi naya sünainmüin piama shikii kaʼi süchikijee chajanain naya suluʼupünaa noumain na israelitakana sünain acensajaa. 9 Nüküjakalaka Joab nümüin David jeʼrain napüshuaʼa na wayuu nacensajakana. 800.000 na surulaat chajaruutamaajana eejanakana Israel jee 500.000 na wayuu eejanakana Judá.
10 Mojusü maʼin naaʼin David süchikijee niyaawajirüin na wayuukana, anuu nünüiki nümüin Jehová: «Mojusü maʼin tü taainjakat, malataʼaleeshijaʼa maʼin taya. Jehovákalee, pülatira sooʼopünaa paaʼin naainjala chi püchepchiakai». 11 Nütamaakalaka David wattaʼa maalü. Aküjünüsüjeseʼe wanee pütchi nümüin Gad nutuma Jehová, nüküjawalin Gad nümüin David tü kasa niʼrakat nutuma Maleiwa, nünüikimaajachi nia Maleiwa, anuu tü nüküjakat Maleiwa nümüin: 12 «Anashi puʼunule nümaʼanamüin David sümaa püküjain wanee pütchi nümüin sünain maa: ‹Anuu nünüiki Jehová: «Taaʼinrajatü apünüinsü kasa, püneeka tü püchekakat»›». 13 Nüntakalaka Gad nümaʼanamüin David jee nümakalaka nümüin: «¿Kasa püchekaka achiki? ¿Alinjatüin jamü sümüin wayuu soʼu akaratshi juya? ¿Piipiijünüinjachin natuma na püʼünüükana soʼu apünüin kashi? ¿Shiataapa pücheküin achiki süntüin wanee ayuulii outasiroʼu soʼu apünüin kaʼi nanainmüin na wayuu puluwataakana aaʼu? Püsakireʼera paaʼin palajana süpülapünaa püküjain tamüin tü püneeküinjatkat süpüla taküjain shia nümüin chi kajünalakai taya». 14 Anuukalaka nünüiki David nümüin Gad: «Shapaasü maʼin taaʼin sutuma tü alatakat. Nnojotsü anain müliale waya sutuma wayuu, anashi niale Jehová müliain atuma waya, jama nümülialaʼawalin aaʼin saalin wayuu».
15 Nuluwataakalaka Jehová wanee ayuulii outasiroʼu namüin na israelitakana, oʼttatüjülia tia wattaʼajee maalü sünainmüinreʼeya tü kaʼi niʼitaakalü oʼu Maleiwa sülatajatüin tia. Outushii 70.000 wayuu suluʼujee tü mmakat Dan sünainmüinreʼeya Beer-Seba. 16 Niyurutpa nütüna chi aapieekai sünainmüin Jerusalén süpüla najaʼttirüinjatüin shia, mojukalaka maʼin naaʼin Jehová saalinjee tü ayuulii nuluwataakat nanainmüin jee nümakalaka nümüin chi aapiee ajaʼttirakai naya wayuukana: «Anashi puuʼulaale suulia türa, püshakatira türa pütünakat». Chajachi chi aapiee nümaʼanajeejachikai Jehová süʼütpaʼa tü mma eere nuwaajüin Arauna süchon nüʼttia, wayuu jebuseo Arauna.
17 Anuujeseʼe nünüiki David nümüin Jehová niʼrapa chi aapiee ajaʼttirakai na wayuukana: «Taya kaainjalaka, taya kasitka tü alatakat, nnojoliipejeʼe kaainjalain wayuukana naainnua.* Anashi tayale müliain putuma namaʼaleeya na wayuu nipialujunakana chi tashikai».
18 Oʼunushi Gad nümaʼanamüin David jee nümakalaka nümüin: «Anashi pukumajüle wanee aʼajülee kasa nümüin Jehová suluʼu tü mma eere nuwaajüin Arauna süchon nüʼttia». 19 Oʼunushijaʼa David maʼaka nüküjain Gad nümüin otta maʼaka nüküjain Jehová nümüin. 20 Niirakaapa Arauna niʼrüinjeseʼe David nüpanapajee namaʼaleeya na nüchepchiakana, oʼunamaatüshijeseʼe Arauna sünain apanapajaa nia jee nejepülaakalaka nümülatuʼu David. 21 Anuukalaka nünüiki Arauna nümüin David: «Antüshiaʼala pia laülaashikalee, ¿kasa eeka süpüla taaʼinrüin püpüleerua?». Anuukalaka nünüiki David nümüin Arauna: «Antüshi taya shiiʼiree tayaʼlajüin puulia tü mma eere puwaajüin süchon aʼttiee, takumajüinjatü wanee aʼajülee kasa nümüin Jehová suluʼu, suuʼulaajeetkalaka tü ayuulii antakat nanainmüin na wayuukana». 22 Anuukalaka nünüiki Arauna nümüin David: «Laülaashikalee, anashi paapaale türa mmakat, paapeetka nümüin Maleiwa tü püsülajeekat nümüin. Anuu tü paaʼakalüirua süpüla puʼutuin saaʼin nümüin Maleiwa jee paʼajüin shia nümüin, anuʼuya tü taapüla asaichijiakat süchon aʼttiee sümaʼaleeya tü wunuʼu sunutpünaakat tü paaʼakalüirua, sukuainjatka tü paapüinjatkat nümüin Maleiwa. 23 Tasülajüinjatü süpüshuaʼa tia pümüin laülaashikalee». Anuukalaka sooʼomüin nünüiki Arauna: «Kasataalejeseʼe anain pukuwaʼipa nutuma Jehová, chi Pümaleiwasekai».
24 Nusoutakalaka David nümüin Arauna sünain maa: «Tawalaajeerü pümüin süpüshuaʼa tia, nnojotsü toʼutuinjatüin aaʼin jee taʼajüinjatüin wanee kasa nümüin Jehová, chi Tamaleiwasekai sümaa maliapalain shia tamüin». Niyaʼlajüinjeseʼe David tü mmakat sümaa tü paaʼakalüirua. 570 gramo* nneerü aainjuushika süka pülaata naapaka saaʼu tia. 25 Nukumajüinjeseʼe David wanee aʼajülee kasa nümüin Jehová, nuʼutakalaka saaʼin mürüt jee naʼajakalaka shia nümüin. Jee asülajüshiaʼaya nia wanee kasa anajiraainjanaka aaʼujee naya nümaa. Naapakalaka Jehová nünüiki David soʼu nuchuntuin maʼin napüleerua na wayuu nuluwataakana aaʼu, suuʼulaakalaka tü ayuuliikat noulia na israelitakana.