Palajatka karaloʼuta Samuel

22 Nuʼunakalaka David suluʼujee tü mmaka Gat jee nuunjulaaka suluʼu tü koʼushii chakat Adulam. Natüjaapa saaʼu na nuwalayuukana David chajachin nia suluʼu tia mmakat, oʼunushii naya sünain anaʼlawaa nümüin jee oʼunushiʼiya namaa na wayuu nipialujunakana chi nüshikai David. 2 Noʼunakalaka nümaa David na wayuu müliakana aaʼin jee na kojuyaalakana, oʼunushiʼiya nümaa David na wayuu nnojoliikana talatüin aaʼin, niakalaka David nekiipüʼüin. Eejana maʼaka 400 wayuu nümaa.

3 Nuʼunakalaka David yalejee suluʼumüin tü mmakat Mizpé, tü chakat Moab jee nümakalaka nümüin chi aluwataakai saaʼu tü mmakat Moab: «Anashii yaale pümaa na wayuu kachooinkana taya waneʼereeya tatüjaapa saaʼu tü nüchekakat Maleiwa tapüleerua». 4 Niʼikajaakalaka David na wayuu kachooinkana nia nümaʼanamüin chi aluwataakai saaʼu tü mmakat Moab. Makatakalaka naya nümaa chi aluwataashikai soʼu chajachin nuunjulaain David uuchoʼupünaa.

5 Anuukalaka tü aküjünakat nümüin David nutuma Gad, chi nünüikimaajachikai Maleiwa: «Anashi nnojoire makatüin pia uuchoʼu, anashi puʼunule suluʼumüin tü mmakat Judá». Nnojoikalaka makatüin David uuchoʼu, oʼunushi nia saʼakamüin tü mojuui chakat Héret.

6 Süküjünakalaka nümüin Saúl jalain nuunjulaain David namaa na wayuu nümaajanakana. Aküjünüsü tia nümüin Saúl wanaa sümaa chajachin nia joyotuin suupünaa tü wunuʼu kanüliakat tamarisco, chajatü tia wunuʼukat saaʼu tü namüna chajatkat suluʼu tü mmakat Guibeá. Najapulujatü Saúl tü lanzakat, pasanainshi nia nanain na wayuu aʼyataakana niʼipajee. 7 Anuukalaka nünüiki Saúl namüin na wayuu aʼyataakana niʼipajee: «Jaapaja tanüiki jiakana nüikeyuukana Benjamín. ¿Nüsülajeerüjasa jümüin chi nüchonkai Jesé juumain jee yüüja eeinjanale jüpünajüin uuwa? ¿Nüneekeenajasa jia süpüla nekiipüʼüin jia 1.000 wayuu jee nekiipüʼüin jia poloo nekii wayuu? 8 Oonooshii jia jüpüshuaʼa tekiira, nnojotsü jaralin aküjain tamüin süchiki nüpansaajüin nünüiki chi tachonkai nümaa chi nüchonkai Jesé, nnojotsü jaralin amülialaain taalin jee nnojotsü jaralin aküjain tamüin taapünüin ekii nümüin David nutuma chi tachonkai süpüla jamajüinjachin taya nutuma».

9 Anuukalaka nünüiki Doeg, chi naʼlaülajanakai na aʼyataakana nümüin Saúl: «Teʼrüinsa chi nüchonkai Jesé wanaa sümaa nüntüin nümaʼanamüin Ahimélec, chi nüchonkai Ahitub. 10 Achuntushi kaalinwaa Ahimélec nümüin Jehová nüpüleerua David jee asülajüshi nia eküülü nümüin, naapüinña nümüin tü chajaruuta nümaʼanapuʼukat Goliat». 11 Nüsaajinnakalaka Ahimélec nutuma Saúl jee asaajinnüshiʼiya napüshuaʼa na sacerdote nipialujunakana chi nüshikai Ahimélec, chajana naya suluʼu tü mmakat Nob. Antüshiijeseʼe naya napüshuaʼa nümaʼanamüin Saúl.

12 Anuujeseʼe nünüiki Saúl nümüin Ahimélec: «Jülüja paaʼin tü taküjainjatkat pümüin piakai nüchonkai Ahitub». «Anakajaʼa laülaashikalee», nümakalaka Ahimélec nümüin. 13 Anuujeseʼe nünüiki Saúl nümüin Ahimélec: «¿Jamüshi poonoojiraakaʼa tekiira nümaa chi nüchonkai Jesé? ¿Jamüshi püsülajakaʼa pan nümüin jee paapaka wanee chajaruuta nümüin? ¿Jamüshi puchuntakaʼa kaalinwaa nümüin Maleiwa nüpüleerua? Taʼünüü nia jee jamajeeshi taya nutuma». 14 Anuukalaka nünüiki Ahimélec nümüin Saúl naapaiwaʼaya tia: «Nnojoishi eein wanee wayuu waneepiakai pümaa maʼaka naaʼin David. Püshimia nia, naʼlaülajana nia na surulaat aaʼinmajakana pia jee kojutushi nia namüin na wayuu pipialujunakana. 15 Nnojoishi eeʼiwalajachin taya achuntuin kaalinwaa nümüin Maleiwa nüpüleerua David. Nnojorüleejaʼa süpüla taaʼinrüinjatüin tü püküjakat tamüin. Nnojo süsalain taya putuma laülaashikalee saaʼujee tia jee nnojo süsalain putuma na wayuu nipialujunakana chi tashikai. Nnojotsü tatüjaain aaʼu sülatüin pümüin tia laülaashikalee».

16 «Outajaisa pia Ahimélec namaʼaleeya napüshuaʼa na wayuu nipialujunakana chi püshikai» nümakalaka Saúl nümüin. 17 Anuukalaka nünüiki Saúl namüin na surulaat nümaajanakana: «Juʼuta naaʼin na sacerdote aʼyataakana nümüin Jehová. Paaʼinwashii naya nümaa David. Natüjaa aaʼulu tachajaain nüchiki David, nounjulajapejeʼe nüchiki toulia». Nnojoliipejeʼe oʼutuneein aaʼin na sacerdote aʼyataakana nümüin Jehová natuma na surulaatkana. 18 «Puʼuta naaʼin», nümakalaka Saúl nümüin Doeg. Noʼutunakalaka aaʼin na sacerdotekana nutuma Doeg. Soʼu kaʼikat tia nuʼuta aaʼinchii Doeg mekiisat nekii jaʼralimüin sacerdote.* 19 Nuʼuta aaʼinchiʼiya Doeg na wayuu chajanakana kepiain suluʼu tü mmakat Nob eejanale kepiain na sacerdotekana. Nuʼuta aaʼinchii na tooloyuukana, na jieyuukana, na tepichikana otta na joʼuuyuukana. Nuʼuta aaʼinrü paaʼa toolo, püliikü jee anneerü. Nuʼuta aaʼinchii naya süka chajaruuta.

20 Isajapejeʼe Abiatar, chi nüchonkai Ahimélec. Ahitub nünülia chi nüshikai Ahimélec. Oʼunushi nia nümaʼanamüin David. 21 «Oʼutuna aaʼinchii na sacerdote aʼyataakana nümüin Jehová nutuma Saúl», nümakalaka Abiatar nümüin David. 22 Anuujeseʼe nünüiki David nümüin Abiatar naapaiwaʼaya tia: «Tatüjaatüjülia aaʼu müinjatüin sukuwaʼipa tia. Wanaa sümaa teʼrüin Doeg teʼitaatüjülia saaʼu nüküjeerüin tachiki nümüin Saúl. Taya kasitka noʼutunuin aaʼin na nüpüshikana chi püshikai. 23 Yaashia pia tamaa, nnojo mmoluin pia. Chi eekai nuʼuteein paaʼin, müshijaʼa tayakai nuʼuteein aaʼin. Aneechi pia tamaa».