Karaloʼuta namüinjatka na chajanakana Roma
14 Kamanee jia namüin na wayuu nnojoliikana katchin maʼin anoula, nnojoliinjanapejeʼe jiyoujain na wayuu nnojoliikana wanaawain aaʼin jümaa. 2 Chi wayuu eekai katchin anoula eküshi kasa süpüshuaʼa, akaajasaʼa chi eekai matchin anoula, eküshi süchon pünajüt. 3 Chi wayuu ekakai kasa süpüshuaʼa, nnojotsü pülainjatüin naaʼin nuulia chi nnojoikai eküin kasa süpüshuaʼa otta müshia chi nnojoikai eküin kasa süpüshuaʼa, nnojoishi niyoujainjachin chi ekakai kasa süpüshuaʼa, jama kamaneein Maleiwa nümüin. 4 ¿Jamüshi piyoujaka nüchepchia wanee wayuu? Nia aküjaka chi nülaamainkai müleka anale jee mojule wanee kasa nutuma chi nüchepchiakai. Nükaalinjeechi nia Jehová* süpüla anainjatüin nukuwaʼipa.
5 Eeshii na wayuu jülüjakana aaʼin anaʼleein wanee kaʼi suulia wane, eepejeʼe na wanaawakana amüin tia. Pansaainjatü tü jülüjakat naaʼin waneʼewai nakua naya wayuukana. 6 Na wayuu jülüjakana aaʼin anaʼleein maʼin wanee kaʼi suulia wane, naaʼinrüin tia süka kojutuin namüin Jehová.* Na wayuu ekakana kasa süpüshuaʼa, naaʼinrüin tia süka kojutuin namüin Jehová,* jama naapüin analuʼut nümüin* saaʼujee tü kasa nekakat. Otta müshiʼiya na nnojoliikana eküin kasa süpüshuaʼa, naaʼinrüin tia süka kojutuin namüin Jehová* jee naapüin analuʼut nümüin.* 7 Tü waaʼinrakat kataiwaʼaya woʼu nnojotsü süpülajatüin kojutuinjanain neʼe waya. Outule waya nnojotsü süpülajatüin kojutuinjanain waya. 8 Tü waaʼinrakat kataiwaʼaya woʼu süpülajatü kojutuinjachin watuma Jehová.* Outule waya süpülajatü kojutuinjachin watuma Jehová.* Jaʼitairü katüin woʼu jee outule waya waapüin waaʼin nümüin Jehová.* 9 Asoʼiraasü naaʼin Cristo süchikijee outaa süpüla niainjachin laülaain naaʼu na eekai outuin jee na eekai katüin oʼu.
10 ¿Jamüshii piyoujaka na puwalayuukana? ¿Jamüshi pülayaaka paaʼin noulia? Shaʼwateena waya wapüshuaʼa nümülatuʼu Maleiwa süpüla kasalajanain waainjala nutuma. 11 Anuu tü sümakat tü Karaloʼuta Nüchikimaajatkat Maleiwa: «Anuu nünüiki Jehová:* ‹Shiimain katüin toʼu, süsapainkeerü wayuu süpüshuaʼa tamülatuʼu jee naʼwaajeechi taya sümaa naküjain tayain chi Maleiwakai›». 12 Asouteena waya nümüin Maleiwa waneʼewai wakua sünainjee tü kasa waainjakat.
13 Nnojotkalaka anain jiyoujale na juwalayuukana. Shia anaka aluʼu nnojorüle jaaʼinrüin wanee kasa amalajeʼereetka nanoula jee mojeetka atuma nakuwaʼipa. 14 Sutuma toushikajaain süchiirua nukuwaʼipa chi Señotkai Jesús, tatüjaa aaʼu nnojoluin mojuin tü wekakat. Mojushiire nümüin wanee wayuu niküinjatüin wanee kasa, anasüjaʼamata nnojorüle niküin shia. 15 Nnojoishi alin püpüla wanee puwala piküle wanee kasa mojushiika nümüin, aapajiraashi nikii Cristo naaʼu chia puwalakai, nnojo pumojujeʼerüin nunoula saaʼujee tü kasa pikakat. 16 Nnojo paainjain wanee kasa mojeetka atuma sünüiki wayuu süchiki tü kasa anasü paainjakat. 17 Eejeechi wanee wayuu nuluwataapeena Maleiwa lotule nukuwaʼipa, anajiraale nia sümaa wayuu jee talatüle naaʼin, jama nükaalinjain nia Maleiwa sükajee tü nüpülainkat. Nnojoishi eejeechin nia sünainjee tü kasa nikakat jee tü kasa nüsakat. 18 Chi wayuu makai akuwaʼipa sümaa niʼyataain nümüin Cristo, talateechi Maleiwa nümaa jee aneerü sünüiki wayuu nüchiki.
19 Shiakalaka anain kachiiruale waaʼin anajiraain waya sümaa wayuu jee wakatchinjiraain waaʼin. 20 Nnojo pumojujeʼerüin sukuwaʼipa tü kasa nukumajakat Maleiwa saaʼujee pikeein neʼe wanee kasa, nnojotsiaajeʼe mojuin tü eküütkat, mojeetpejeʼe shia piküle wanee kasa amalajeʼereetka nunoula wanee wayuu. 21 Anashi nnojoire piküin asalaa, püsüin wiino jee paaʼinrüin wanee kasa amalajaajeetka atuma nunoula wanee puwala. 22 Pansaale tü jülüjakat paaʼin* süchiki wanee kasa, anashi piale neʼe atüjaain saaʼu tia nümaa Maleiwa. Talateerü paaʼin nnojorüle wainmajüin paaʼin sünain aaʼinraa wanee kasa anakat saaʼin pümüin. 23 Wainmajüle naaʼin wanee wayuu saaʼu tü kasa nikakat, kaainjalashi nia süka niküin tia sümaa manoulain nia. Waainjale wanee kasa sümaa manoulain waya, kaainjalashii waya.