Chiiruaajatka karaloʼuta Samuel
2 Nüsakinnakalaka Jehová nutuma David sünain maa: «¿Anashiche toʼunule suluʼumüin wanee mma chakat Judá?». «Anashi puʼunule chamüin», nümakalaka Jehová nümüin. «¿Jarat tü mma tantajatkalü aluʼumüin?», nümakalaka David. «Anashi püntüle suluʼumüin tü mmakat Hebrón», nümakalaka Maleiwa nümüin. 2 Nüntakalaka David suluʼumüin tia mmakat, nümaasü tü piamasükat nuʼwayuuse, Ahinoam tü chejeʼewatkat Jezreel otta Abigaíl, Nabal nünülia chi suʼwayuusepuʼukai, outushi nia, chejeʼewai nia suluʼujee tü mmakat Carmelo. 3 Nümaashiʼiya David na wayuu nümaajanakana namaʼaleeya na napüshikana, kepiaka naya süʼütpünaa tü mmakat Hebrón. 4 Nantakalaka na wayuu chajanakana Judá nümaʼanamüin David, naneekaka nia süpüla nuluwataainjachin naaʼu na nüikeyuukana Judá.
Anuujeseʼe nanüiki nümüin David: «Eʼikünüshi Saúl natuma na wayuu chejeʼewaliikana Jabés-Galaad». 5 Nuluwataaka David waneinnua wayuu namaʼanamüin na wayuu chajanakana Jabés-Galaad, anuu nünüiki namüin: «Kasataalejeseʼe anakuwaʼipaliin jia nutuma Jehová saaʼujee sümülialaain jaaʼin naalin Saúl, chi jüseñotsekai, jiʼiküinjeseʼe nia. 6 Kasataalejeseʼe kamaneein jümüin Jehová jee waneepiain nia jümaa. Kamaneejeechiaʼaya taya saaʼu tü kasa jaainjakat. 7 Katsüin jaaʼin jee yalayala jaaʼin mayaainjeʼe outuichipain Saúl, chi jüseñotsekai. Naneeküichipa taya na nüikeyuukana Judá süpüla taluwataainjachin naaʼu».
8 Nümaanakalaka Is-Bóset nutuma Abner waneemüin saʼata tü süchikat, tü chakat Mahanaim. Is-Bóset nüchon Saúl. Abner nüchon Ner otta nekiipüʼü nia nusurulaatse Saúl. 9 Nüneekünakalaka Is-Bóset nutuma Abner süpüla nuluwataainjachin naaʼu na chajanakana Galaad, naaʼu na asuritakana, naaʼu na chajanakana Jezreel, naaʼu na nüikeyuukana Efraín, naaʼu na nüikeyuukana Benjamín otta naaʼu napüshuaʼa na wayuu chajanakana Israel. 10 Pienchi shikii nuuyase Is-Bóset wanaa sümaa nuluwataain naaʼu na israelitakana, piamaka juya nuluwataakalü oʼu. Anashiisü namüin na nüikeyuukana Judá niainjachin aluwataain David naaʼu. 11 Akaratshi juya shiatapünaa nuluwataakalü oʼu David naaʼu na nüikeyuukana Judá chaa Hebrón.
12 Shiasaʼa mapa nuʼunaka Abner namaa na nümaajanakana Is-Bóset, oʼunushii naya suluʼujee tü mmakat Mahanaim suluʼumüin tü mmakat Gabaón. 13 Nuʼunakalaka Joab, chi süchonkai Zeruyá namaa na wayuu nümaajanakana David, nantiraaka namaa na wayuu nümaajanakana Abner eere tü ishi chakat Gabaón, naikaajaaka na wayuu nümaajanakana Joab wanee saʼata tü ishikat, nayasaʼa na nümaajanakana Abner, aikaajaashii naya waneemüin saʼata tü ishikat. 14 Anuujeseʼe nünüiki Abner nümüin Joab: «Anashii natamaale na jimaʼaliikana natkaaiwa woʼupala». «Anashii natamaajaale», nümakalaka Joab. 15 Natamaajaaya namaka na jimaʼaliikana süpüla atkawaa, naneekünaka poloo piamamüin nüikeyuu Benjamín naʼakajee na wayuu nümaajanakana Is-Bóset otta aneekünüshii poloo piamamüin wayuu nümaajanakana David. 16 Naapaajiraakalaka nekii, nasotokoloko na neʼipolokona nayatapünaa, outushii naya napüshuaʼa. Helcat-Hazurim sümünaka tia mmakat, chasü shia suluʼu tü mmakat Gabaón.
17 Outirawaa maʼin soʼu kaʼikat tia, nükanajuukalaka Abner namaa na israelitakana natuma na wayuu nümaajanakana David. 18 Eejana soʼu kaʼikat tia na apünüinshiikana süchon Zeruyá, eejachi Joab, Abisái otta Asahel. Kawatirashi maʼin Asahel maʼaka saaʼin wanee wüyala. 19 Nuwataakalaka Asahel nüchiirua Abner, ayatüshia nia nüchiiruain. 20 Anuujeseʼe nünüiki Abner niirakaapa nüchiiruajee: «¿Piainjaʼa Asahelüin?». «Aa, tayaʼayan», nümakalaka Asahel nümüin. 21 Anuujeseʼe nünüiki Abner nümüin: «Nnojo piipiijüin taya, anashii nayale piipiijüin na jimaʼaliikana, pütaʼüleechikalaka wanee naʼakajee, pusuteetkalaka nuulia tü kasa eekai nümaʼanain», nümakalaka. Ayatapejeʼe macheʼein Asahel nüchiirua Abner. 22 Anuukalaka nünüiki Abner nüchikuaʼa nümüin Asahel: «Nnojo piipirüin taya, toʼutule paaʼin nnojoleerü anain taaʼin teʼrapa Joab». 23 Ayatüshi eipinnüin Abner nutuma Asahel, nusotokoloko nia Abner süka shipi tü nülanzainkat, nusotuin nia nüleʼenain, shiweenaʼaleeka nünainruʼupünaa tü shipikat lanza. Outatüjüireʼeya nia, ashaʼwalaapünaʼawaishii na wayuukana eejachire nuʼutunuin aaʼin Asahel.
24 Nuushikajaakalaka Joab nümaa Abisái nüchiirua Abner, nantakalaka eemüin tü namüna chakat Amá nikeroteematapa chi kaʼikai, chajatü tia namünakat shiʼipoʼujee tü mmakat Guíah, suluʼu tü wopu chaʼwatkat eemüin tü isashii chakat Gabaón. 25 Noutkajaakalaka na nüikeyuukana Benjamín, nia palajachika Abner napüleerua. Yapajakalaka naya saaʼu wane namüna süpüla atkawaa. 26 Nuʼwaatakalaka Abner nümüin Joab sünain maa: «¿Joujeenakai wojoʼlooko suulia atkawaa? Üttajiraajeerü neʼe waaʼin ayatüle watkaain. Anashii püchiaale na wayuu pümaajanakana suulia natkaain namaa na nawalayuukana». 27 Anuukalaka nünüiki Joab nümüin Abner: «Shiimain maʼin tanüiki pümüin nuʼupala chi shiimainshikai suluʼu Maleiwain, chi matüjainkai outaa. Nnojorüle puchuntuin tamüin tia, ayatüshiije oushikajaain na wayuukana nachiirua na nawalayuukana jaʼyuʼuleepa». 28 Niʼyalajitkalaka Joab suʼuwa anneerü, nooʼulaakalaka na wayuu nümaajanakana suulia oushikajawaa nachiirua na israelitakana, sajaʼlajaakalaka tia atkawaakat.
29 Siraaka aikat naaʼu Abner sünain waraittaa namaa na wayuu nümaajanakana süpaʼapünaa tü mma kanüliakat Arabá. Nalatüin tü süchikat Jordán jee oʼunushii naya süpaʼapünaa tü patajatshiikat, nantakalaka suluʼumüin tü mmakat Mahanaim. 30 Nuutkajeʼerakalaka Joab na wayuu nümaajanakana nuuʼulaapa suulia nuushikajaain nüchiirua Abner. Niyaawatakalaka saaʼu Joab noʼutunuin aaʼin poloo mekietsatshii wayuu nümaajana David, oʼutuna aaʼinchiaʼaya Asahel. 31 Nakanajuukalaka na nüikeyuukana Benjamín namaa na wayuu nümaajanakana Abner natuma na wayuu nümaajanakana David. Oʼutuna aaʼinchii 360 wayuu. 32 Niʼikünaka Asahel suluʼumüin naamaka chi nüshikai, tü chakat Belén. Siraaka aikat naaʼu Joab sünain waraittaa namaa na wayuu nümaajanakana, nantaka suwasajaapa aikai suluʼumüin tü mmakat Hebrón.