Jueces

20 Shiasaʼa saalinjee tia, noʼunakalaka napüshuaʼa na israelitakana suluʼujee noumain. Oʼunushii naya suluʼujee tü mmakat Dan sünainmüinreʼeya Beer-Seba, nantiraakalaka namaa na wayuu suluʼujeejanakana tü mmakat Galaad, paaʼinwashii naya napüshuaʼa. Noutkajaakalaka suluʼu tü mmakat Mizpá nümülatuʼu Jehová. 2 Noutkajaakalaka napüshuaʼaleʼeya na israelitakana namaa na nekiipüʼükana, eejanaʼaya 400.000 surulaat kaʼapülajüshii.

3 Naapa achikirü na nüikeyuukana Benjamín chajanain noutkajaain na israelitakana chaa Mizpá.

«Anashii jüküjale wamüin kasain müin aaʼujee atumawaa tü wayuukot», namakalaka na israelitakana namüin na wayuu yalajanakana jutkatüin. 4 Anuujeseʼe nünüiki chi nülüinkai Leví, chi suʼwayuusekai tü wayuu oʼutunakalü aaʼin: «Antüshi taya sümaa suwalaʼata tü taʼwayuusekat suluʼumüin tü mmakat Guibeá, tü noumainkat na nüikeyuukana Benjamín. Atunkaapünaainjana waya suluʼu tia mmakat. 5 Nantakalaka saʼwai tanainmüin na wayuu sulujunakana tia mmakat, noutkajaain tü miichi eejachire taya. Noʼutee aaʼinchi taya, shiapejeʼe nataüjaain tü suwalaʼatakat taʼwayuuse. Outakalaka shia suluʼujee tia. 6 Tachonoojokoloko müliashii, taluwataakalaka shiʼipa suluʼumüin waneʼewai sukua tü mmakat Israel. Taaʼinrüin tia süka keemain maʼin tü aaʼinnakat suluʼu tü mmakat Israel. 7 ¿Jamüsü jünüiki süchiki tia, jia wayuu yaakana Israel, kasa waaʼinrajatka?».

8 Natamaayaa namaka napüshuaʼa na wayuukana jee namakalaka: «Nnojoleena waya aleʼejüin wepialuʼumüin. 9 Ashantanajiraajeena waya süpüla watüjaain saaʼu jaraliinjanain ashutuin naaʼu na wayuu chajanakana suluʼu tü mmakat Guibeá. 10 Naʼakajee poloo nekii israelita waneekeena polooshii, naʼakajee 1.000 israelita waneekeena poloo nekii otta naʼakajee 10.000 israelita waneekeena 1.000. Waneeküinjana naya süpüla nachajaainjatüin wanee kasa choʼujaaka namüin na surulaatkana. Shieetkalaka neʼe naaʼinmaain na surulaatkana nashutajanain naaʼu na wayuu chajanakana suluʼu tü mmakat Guibeá, tü noumainkat na nüikeyuukana Benjamín. Keemasü maʼin tü kasa naaʼinrakat yaa Israel». 11 Paaʼinwakalaka napüshuaʼa na israelitakana nekiira naya wayuukana.

12 Naluwataakalaka na israelitakana waneinnua wayuu nanüikimaajana namaʼanamüin na nüikeyuukana Benjamín jee namakalaka namüin: «¿Jamüshii jaaʼinrakaʼa wanee kasa keemaka maʼin? 13 Anashii jaapüle nekii na wayuu makana aainjala woʼutaiwa naaʼin. Nnojoleetkalaka wayuu yaa Israel eekai müin aainjalaa». Nnojotpejeʼe kasajatüin namüin na nüikeyuukana Benjamín tü pütchi aluwataanakat namüin.

14 Noutkajaakalaka na nüikeyuukana Benjamín suluʼu tü mmakat Guibeá, outkajaashii naya süpüla natkaainjanain namaa na israelitakana. 15 Naneekünakalaka natuma na nüikeyuukana Benjamín 26.000 wayuu kaʼapülajakana chajaruuta, eejana 700 surulaat atüjakana maʼin atkawaa, suluʼujeejana naya tü mmakat Guibeá. 16 Eejanaʼaya 700 surulaat kepeʼejakana, nnojotsü kasain noʼtchejüin süka tü junaayakat, jaʼitakajeʼe wanee walashi neʼitüin süka.

17 Naneekünaka 400.000 wayuu kaʼapülajaka naʼakajee na israelitakana, yalayalashii maʼin sünain atkawaa naya wayuukana. Nnojoliipejeʼe eejanain na nüikeyuukana Benjamín naʼaka. 18 Noʼunakalaka suluʼumüin tü mmakat Belén süpüla nachuntajanain kaalinwaa nümüin Maleiwa. Anuujeseʼe nanüiki na israelitakana nümüin Maleiwa: «¿Jaralii na oʼunajanakana wapüleerua sünain atkawaa namaa na nüikeyuukana Benjamín?». Anuujeseʼe nünüiki Jehová namüin: «Naya oʼunuinjanakana jüpüleerua na nüikeyuukana Judá».

19 Natamaakalaka wattaʼa maalü na israelitakana jee noutkajaaka süpüla natkaainjanain namaa na wayuu sulujunakana tü mmakat Guibeá.

20 Noʼunakalaka na israelitakana sünain ashutaa naaʼu na nüikeyuukana Benjamín. Noutkajaakalaka süpüla atkawaa soʼuluʼu tü pueulokot Guibeá. 21 Nojuʼitakalaka na nüikeyuukana Benjamín neʼipajee jee noʼutakalaka naaʼin 22.000 israelita. 22 Nnojoliipejeʼe eimmolojooin na surulaat israelitakana, noutkajaakalaka nachikuaʼa süpüla atkawaa eejanale noutkajaain paala soʼu tü palajatkat kaʼi. 23 Noʼunakalaka na israelitakana suluʼumüin tü mmakat Betel, aipaʼakalaka naaʼu sünain aʼyalajaa nümüin Jehová jee namakalaka nümüin Jehová: «¿Anasüche saaʼin pümüin woʼunule wachikuaʼa sünain atkawaa namaa na wawalayuukana, na nüikeyuukana Benjamín?». Anuujeseʼe nünüiki Jehová namüin: «Anashii juʼunule sünain atkawaa namaa».

24 Narütkaakalaka na israelitakana nanainmüin na nüikeyuukana Benjamín noʼu chi piamakai kaʼi. 25 Ojuʼitaashiijeseʼe na nüikeyuukana Benjamín neʼipamüin suluʼujee tü pueulokot Guibeá jee noʼutakalaka naaʼin 18.000 israelita kaʼapülajakana chajaruuta. 26 Noutkajaaka napüshuaʼa na israelitakana suluʼumüin tü mmakat Betel. Naikalaaka jee naʼyalajaka nuʼupala Jehová, aipaʼawasü naaʼu sünain aamajaa noʼu kaʼikai chia. Noʼutaka saaʼin wanee kasa jee naapaka shia nümüin Jehová jee nasülajüinña nümüin wanee kasa anajiraainjanaka aaʼujee naya nümaa. 27 Shiasaʼa süchikijee tia, nachuntakalaka kaalinwaa na israelitakana nümüin Jehová. Eejatü soʼunnaa tia chaa Betel tü kojon shiyaawasekat süpansaajünüin pütchi nümaa chi shiimainshikai suluʼu Maleiwain. 28 Nia sacerdotekai wanaa sümaa tia Finehás, chi nüchonkai Eleazar, nülüin nia Aarón. Anuujeseʼe nanüiki nümüin Maleiwa: «¿Anasüche saaʼin pümüin woʼunule sünain atkawaa wachikuaʼa namaa na wawalayuukana, na nüikeyuukana Benjamín? ¿Shiataapa anain aluʼu wooʼulaale neʼe naya?». Anuujeseʼe nünüiki Jehová namüin: «Anashii juʼunule sünain atkawaa namaa, taapeena ekii jümüin wattaʼa». 29 Noutkajaka na israelitakana napüla na nüikeyuukana Benjamín anuuipaʼa sünain tü pueulokot Guibeá.

30 Noʼunakalaka na israelitakana sünain atkawaa namaa na nüikeyuukana Benjamín noʼu chi apünüinkai kaʼi. Noutkajaakalaka süpüla atkawaa namaa na wayuu sulujunakana tü pueulokot Guibeá maʼaka naaʼinrüin shia paala. 31 Nojuʼinuwaakalaka na nüikeyuukana Benjamín neʼipamüin. Akayalaapejeʼe na israelitakana napüleerua wattamüin suulia tü pueulokot. Nashutaka na nüikeyuukana Benjamín naaʼu jee noʼuta aaʼinchii waneinnua wayuu suluʼupünaa tü wopu jerutsükat, tü chaʼwatkat chaa Betelmüin otta suluʼupünaa tü wane wopu chaʼwatkat Guibeá. Eeshii maʼaka naaʼin apünüin nekii israelita noʼutakana aaʼin suluʼupünaa tü wopukot. 32 «Wayamülüinsa naya nachikuaʼa», namakalaka na nüikeyuukana Benjamín nachiki na israelitakana. Anuupejeʼe nanüiki na israelitakana: «Anashii wakayalaale suulia tü pueulokot, anashii woʼunule suluʼumüin tü wopu jerutsükat». 33 Noʼunakalaka napüshuaʼa na surulaat israelitakana suluʼumüin tü mmakat Baal-Tamar süpüla natkaainjanain namaa na nüikeyuukana Benjamín, akaʼaya na israelita outkajakana paala süʼütpaʼa tü pueulokot Guibeá ojuʼinuwaashii naya jee nashutakalaka saaʼu tü pueulokot. 34 Nantaka soʼuluʼumüin tü pueulokot Guibeá 10.000 surulaat atüjakana maʼin atkawaa naʼakajee na israelitakana. Outiraashii maʼin naya soʼu tia namaa na nüikeyuukana Benjamín. Nnojotpejeʼe natüjaain saaʼu na nüikeyuukana Benjamín tü kasa alatajatkat namüin.

35 Naapünakalaka ekii na nüikeyuukana Benjamín nutuma Jehová namüin na israelitakana. Outushii 25.100 nüikeyuu Benjamín soʼu tia, chajaruutamaajana napüshuaʼa naya wayuukana.

36 Shiasaʼa sutuma nakayalaain na israelitakana, jülüjasü naaʼin na nüikeyuukana Benjamín nakanajüinjanain naya nachikuaʼa. Akayalaapejeʼe na israelitakana süka natüjaain saaʼu noutkajünüin apüla na nüikeyuukana Benjamín chaa Guibeá. 37 Nashutamaatakalaka na surulaat yalajanakana outkajüin naaʼu na wayuu kepiakana suluʼu tü pueulokot Guibeá, noʼuta aaʼinchii napüshuaʼa na wayuu yalajanakana suluʼu süka chajaruuta.

38 Keraatüjülia nanüiki na israelitakana süchiki kaitajatüin siki natuma na surulaat yalajanakana outkajüin napüla na nüikeyuukana Benjamín, nekerolopa suluʼumüin tü pueulokot.

39 Nashutunakalaka aaʼu na israelitakana natuma na nüikeyuukana Benjamín noʼunayaa namapa suulia tü atkawaakat jee noʼutunakalaka aaʼin maʼaka apünüin nekii israelita. «Akanajuushii watuma maʼaka wakanajüinkain naya», namajiraakalaka na nüikeyuukana Benjamín. 40 Sükaʼirakalaka wanee siki suluʼujee tü pueulokot shiyaawase nekeronuwaain na israelitakana suluʼumüin. Neirakaapa nachiiruajee na nüikeyuukana Benjamín, neʼrakalaka jotuin tü pueulokot, chuwatsü maʼin. 41 Nouyantaaka na israelitakana nooʼomüin na nüikeyuukana Benjamín jee nashutakalaka naaʼu. Watta naaʼin na nüikeyuukana Benjamín neʼrapa tü kasa alatakat namüin. 42 Napantajaakalaka na nüikeyuukana Benjamín napüleerua na israelitakana chaa isashiipaʼamüin, nnojoliipejeʼe isajüin naya noulia. Oʼutuna aaʼinchiʼiya na nüikeyuukana Benjamín sutuma wayuu sulujutkat tü pueulo eejatkat naʼütpünaa. 43 Noutküin na israelitakana nachiki na nüikeyuukana Benjamín jee neipiijüin maʼin naya. Nayamülüin naya soʼuluʼu tü pueulokot Guibeá, wüinpejeeruʼu. 44 Dieciocho miit na surulaat outakana soʼu tia naʼakajee na nüikeyuukana Benjamín, yalayalajüshii maʼin napüshuaʼa sünain atkawaa.

45 Nouyantaakalaka na nüikeyuukana Benjamín, napantajaakalaka isashiipaʼamüin napüleerua na israelitakana. Awataashii naya sünainmüin tü ipa miyoʼu kanüliakat Rimón. 5.000 na nüikeyuu Benjamín oʼutunakana aaʼin suluʼupünaa tü wopu jerutsükat. Eipinnüshii naya suluʼumüinreʼeya tü mmakat Guidom, outakalaka 2.000 wayuu nooʼomüin. 46 Veinticinco miit napüshuaʼa na wayuu outakana naʼakajee na nüikeyuukana Benjamín soʼu kaʼikat tia, wayuu kaʼapülajüshii naya chajaruuta otta yalayalashii maʼin naya sünain atkawaa. 47 Oʼunapejeʼe 600 wayuu naʼakajee na nüikeyuukana Benjamín chaa isashiipaʼamüin sünainmüin tü ipa miyoʼu kanüliakat Rimón, makataka naya chayaa soʼunnaa pienchi kashi.

48 Nashutakalaka nachikuaʼa na israelitakana naaʼu na nüikeyuu Benjamín apütaakana paala, noʼuta aaʼinchii naya sümaʼaleʼeya namüʼlüin. Noʼuta aaʼinchiʼiya napüshuaʼa na apütaakana suluʼupünaa tü pueulo eejanale kepiain na nüikeyuukana Benjamín. Naʼajüin na israelitakana süpüshuaʼa tü mma nantakalü aluʼumüin.