Levítico

20 Ayatakalaka naashajaain Jehová nümaa Moisés sümaa nümüin nümüin: 2 «Püma namüin na israelitakana: ‹Oʼutunajachi aaʼin wanee israelita jee niale wanee wayuu nnojoikai israelitain kepiakai jaʼaka, naapataale wanee nülüin nümüin Mólek. Aʼinaʼannajachi nia süka ipa natuma na israelitakana outaleepa nia. 3 Aashichijaweechi taya nooʼomüin chia wayuukai jee toʼutireechi aaʼin nia naʼakajee na israelitakana süka naapüin joo wanee nülüin nümüin Mólek, süka mojutuin nümüin tü miichi eere taʼwaajünüin jee mojutusai taya nutuma. 4 Nnojorüle kasajatüin namüin na israelitakana naapüin nülüin wanee wayuu nümüin Mólek sümaa nnojolin noʼutuin naaʼin, 5 aashichijaweechi taya nooʼomüin chia wayuukai jee sooʼomüin nüpüshi. Toʼutireechi aaʼin chia wayuukai naʼakajee na israelitakana namaʼaleeya na aʼluwajiraakana nakuwaʼipa süpüla naʼwaajüin Mólek.

6 »›Niiʼirajirüle ouutsü wanee wayuu jee nuuʼulakirüle süchiirua tü kasa alatajatkat sümaa nnojolin noonooin tamüin tayakai Maleiwa,* aashichijaweechi taya nooʼomüin jee toʼutireechi aaʼin nia naʼakajee na israelitakana.

7 »›Wuleinjatü jukuwaʼipa süka tayain Jehová chi Jümaleiwasekai. 8 Oonooinjana jia sümaa tü tamakat jümüin jee jaaʼinrajatü shia. Tayasa Jehová chi wulekai atuma jukuwaʼipa.

9 »›Oʼutunajachi aaʼin wanee wayuu nuʼulejüle chi nüshikai jee müsia tü niikat. Nüchajaala nooʼomüin outule nia saaʼujee nuʼulejüin chi nüshikai jee müsia tü niikat.

10 »›Outajachi chi wayuu aʼluwajiraakai nukuwaʼipa sümaa wayuu nnojotka nuʼwayuusein. Outajachi chi toolokoi sümaʼaleeya tü jietkat. 11 Mojutusai nutuma wanee wayuu chi nüshikai nüinkaale sümaa nuʼwayuuse chi nüshikai, oʼutunajachi aaʼin nia sümaʼaleeya tia wayuukot. Nachajaala nooʼomüin outule naya. 12 Oʼutunajachi aaʼin wanee wayuu sümaʼaleeya tü naʼüitkat nüinkaale sümaa. Nnojoishii takumajüin naya süpüla müinjatüin naainjala, nachajaala nooʼomüin outule naya.

13 »›Yarütteerü maʼin tü naaʼinrakat wanee wayuu nüinkaale nümaa wanee toolojiraakai wanaa nümaa maʼaka nüinkaain sümaa wanee jierü. Oʼutunajana aaʼin naya, nachajaala nooʼomüin outule naya.

14 »›Yarütteerü maʼin tü naaʼinrakat wanee wayuu nüinkaale sümaa wanee jierü sümaʼaleeya tü shiikat. Oʼutuneechi aaʼin nia sümaʼaleeya tia jieyuukalüirua jee aʼajüneena naya soʼu siki suulia eejüin wanee akuwaʼipaa yarüttüsü jaʼaka.

15 »›Oʼutunajachi aaʼin wanee wayuu nuʼluwajiraale nukuwaʼipa sümaa mürüt, juʼutuinjatiaʼaya aaʼin tü mürütkat. 16 Sünaataale wanee wayuu nüpüla wanee mürüt süpüla suʼluwajiraain sukuwaʼipa nümaa, juʼutajatü aaʼin tia wayuukot nümaʼaleeya chi mürütkai. Outajanaʼaya naya, nachajaala nooʼomüin outule naya.

17 »›Eʼreechi japülii wanee wayuu nuʼluwajiraale nukuwaʼipa sümaa nuwala jaʼitasü nüchoin shia chi nüshikai jee süchonle shia tü niikat, oʼutunajana aaʼin naya noʼupala na israelitakana. Mojutusat tü nuwalakat nutuma chia wayuukai, nusoutajachika saaʼu naainjala.

18 »›Nnojotsü kojutuin nümüin wanee wayuu jee sümüin wanee jierü kakashiale shia nüinkaale chia wayuukai sümaa jee nuʼluwajiraale nukuwaʼipa sümaa. Oʼutunajana aaʼin naya piamaleʼeya naʼakajee na israelitakana.

19 »›Nnojo puʼluwajiraain pukuwaʼipa sümaa suwala tü piikat jee sümaa nuwala chi püshikai süka kasairüin shia nanain na kachonshiikana pia. Asoutajana jia piamaleʼeya saaʼu tü jaaʼinralakat. 20 Mojuteechi nüʼlaüla wanee wayuu nutuma nuʼluwajiraale nukuwaʼipa sümaa nuʼwayuuse chi nüʼlaülakai. Asoutajana naya piamaleʼeya saaʼu tü naaʼinralakat, outajana sümaa machonniin naya. 21 Yarüttüsü maʼin tü naaʼinrakat wanee wayuu kasaarüle nia sümaa nuʼwayuuse chi nuwalakai, mojutusai chi nuwalakai nümüin suluʼujee tia. Müinna machonniin naya.

22 »›Oonooinjana jia sümaa süpüshuaʼa tü tamakat jee sümaa süpüshuaʼa tü taluwataakalü anain sümaa jaaʼinrajatüin shia, nnojoliijeenaka tajünajaain jia suluʼujee tü mma tamaakalü aluʼumüin jia müinmaʼa yaa süpüla kepiain jia suluʼu. 23 Nnojo jaaʼinrüin tü naluwataakalü anain na wayuu tajünajaainjanakana jüpüleerua, süka naaʼinrüin naya wayuukana süpüshuaʼa tü kasa talerajakat. 24 Anuujeseʼe tanüiki jümüin: «Jieena aapünaka amüin noumain naya wayuukana jieena koumainka shia tatuma, joutsü leechi jee müsia mapa süpaʼa tia mmakat. Tayasa Jehová chi jümaleiwasekai, chi akatalakai jia noulia na wane wayuukana». 25 Jiyaawatüinjatü aaʼu kasain naatain atuma wanee mürüt eekai wulein suulia wanee eekai yarüttüin, tü naatakalü atuma wanee wüchii eekai wulein suulia wanee eekai yarüttüin. Nnojoishii jia yarüttüinjanain sünainjee wanee mürüt, sünainjee wanee wüchii jee sünainjee wanee kasa eekai lemütüin takatalaka süpüla yarüttüinjatüin shia jümüin. 26 Wuleinjatü jukuwaʼipa maʼaka wulein takuwaʼipa tayakai Jehová. Takatalüin jia noulia na wane wayuukana süpüla tayainjachin laülaain jaaʼu.

27 »›Outajachi wanee wayuu jee shiale wanee jierü eekai ouutsüin jee eekai suuʼulaküin süpüla sütüjaain saaʼu tü alatajatkat. Eʼinaʼannajana naya natuma na israelitakana süka ipa outaleepaʼaya naya. Nachajaala nooʼomüin outule naya›».