Levítico

26 »›Nnojo jukumajüin shiyaakua maleiwayaasü nnojotka kasain anain apüla jee nnojo jütameʼerüin shiyaakua wanee kasa akumajüshika otta nnojo jüshaʼwaleʼerüin ipa süpüla kojutuin shia jutuma, nnojotsiaʼaya jüshaʼwaleʼerüinjatüin shiyaakua wanee kasa aainjuushika süka ipa chaa juumainpaʼa süpüla jüsapainkainjanain jia sümülatuʼu, süka tayain Jehová chi Jümaleiwasekai. 2 Kojutuinjatü jümüin tü sükaliakalü eemerawaa jee kojutuinjatü maʼin jümüin tü miichi eere taʼwaajünüin, tayasa Jehová.

3 »›Ayatüleʼeya jaaʼinrüin tü tamakat jümüin jee joonoole sümaa tü taluwataakalü anain sümaa jaaʼinrüin shia, 4 miyoʼujeerü tü juya taʼitirakat juyapoʼu, eejeetkalaka aʼttiee süpaʼapünaa tü mmakat jee kachonjeerü tü wunuʼuliakalüirua. 5 Ajaʼttaleejeeria tü sükaliakalü asaichijaa trigo sütpajünapa süchon uuwoʼulia jee ajaʼttaleejeeria tü sükaliakalü akotchojaa süchon uuwoʼulia süpünajünapa waüyee. Ekeena jia emiraleepaʼaya jia jee jimateerü jaaʼin suluʼu juumain. 6 Jimateerü jaaʼin tatuma suluʼu tü juumainkat, eisalaweena jia sümaa nnojoluin eein wanee wayuu eekai eimmolojuin jia. Tajaʼttireerü wüchii eekai jashichin juumainpaʼajee jee nnojoleena ashutunuin aaʼu jia süpüla atkawaa chaa juumainpaʼa. 7 Shiimain jiipiijeenain jüʼünüü jee juʼuteena aaʼin naya süka chajaruuta. 8 Eejeena jaʼraishii jaʼakajee eipiijaka poloosü shikii jüʼünüü otta eejeena polooshii nekii jaʼakajee eipiijaka 10.000 jüʼünüü, juʼuteenakalaka naaʼin na jüʼünüükana süka chajaruuta.

9 »›Jaʼyeerü taaʼu talatüin taya jümaa, takaalinjeena jia süpüla wattain naalii jüchonnii, wainmeenakalaka jia jee tekeraajeerü tü pütchi tapansaajakat jümaa. 10 Soʼu jikaain süchon tü pünajüt soʼujatkat tü juya alatüitpakat, jiyuʼlajatü süchon tü pünajüt kakaliaitkat süpüla jünaajaain tü jeketükat süchon pünajüt. 11 Takumajireerü tü miichi eere taʼwaajünüin pasanain jünain, nnojoleenaka jia taʼleejüin. 12 Eejeechi taya jaʼaka, tayeechi Jümaleiwaseka jee tapüsheena jia. 13 Taya Jehová chi Jümaleiwasekai, tayuʼluin jia suluʼujee tü mmakalü Egipto süpüla juuʼulaain suulia achepchieeinjanain jia, tooʼuleʼerüin tü müliaakat juulia jee taashishii jia tatuma.

14 »›Eekajasaʼa nnojoliire jia kacheʼejüin sümüin tanüiki jee nnojoliire joonooin sümaa tü taluwataakalü anain, 15 jiyoutule süchiki tü tamakat jee nnojorüle kojutuin jümüin tü taneekakat sümaa nnojoliin joonooin sümüin tü taluwataakalü anain jee nnojoliire jikeraajüin tü pütchi tapansaajakat jümaa, 16 anuu tü taaʼinreetkat jümüin: ajüteechi taya wanee müliaa jooʼomüin, kamüsoineena jia jee tutteena* maʼin jia, moʼupaʼajeena jia suluʼujee tia jee matsüinjeerü jaaʼin. Amüleena neʼe apünajüin jia süka shikeerüin jüʼünüü süchon jüʼttia. 17 Peʼipaajeechi taya jümaa jee akanajuujeena jia sutuma jüʼünüü, mülieena jia natuma na üttakana aaʼin jünain jee apantajaajeena jia sümaa nnojoluin jaralüin eipiijain jia.

18 »›Nnojoliirejeʼeya kacheʼejüin jia sümüin tanüiki mayaainjeʼe sülatüin tia jümüin, eʼreena jia jümüliala tatuma akaratshitua sooʼomüin saaʼujee tü jaainjalakat. 19 Tooʼuleʼereena jia suulia macheʼein jia jee suulia yaletüin jaaʼin, meerü aka saaʼin kachueera tü sirumatuʼukat tatuma jee meerü aka saaʼin cobre tü mmakat. 20 Amüleena neʼe jia ajaʼlajüin aaʼin sünain aʼyatawaa süka nnojoleerüin süsotüin aʼttiee süpaʼa tü mmakat jee nnojoleerü kachooin tü wunuʼuliakalüirua.

21 »›Ayatüleʼeya peʼipaain jia tamaa jee nnojoliire kacheʼejeein jia sümüin tanüiki, akaratshitueerü kooʼomüin jümüin tü jümülialakat wanaapünaa sümaa tü jaainjalakat. 22 Tajüteerü wüchii jashichi jooʼomüin ajaʼttireetka jüchonnii, sajaʼttireerü jümüʼlüin jee apaliʼirajaleejeena jia sutuma, nnojoleerü wayuu süpaʼapünaa jüpüna.

23 »›Nnojoliirejeʼeya jücheküin süchiki tanoutuin tü jukuwaʼipakat mayaainjeʼe sülatüin tia jümüin jee macheʼerejeʼeya jia süchiirua peʼipaain jia tamaa, 24 peʼipaajeechijaʼa taya jümaa jee akaratshitueena eʼrüin jia jümüliala tatuma saaʼujee tü jaainjalakat. 25 Tajüteena na jüʼünüükana jooʼomüin süpüla müliain jia natuma saaʼujee nnojoluin jikeraajüin tü pütchi tapansaajakat jümaa. Juunjulaale suluʼu pueulo, ajüteechi taya ayuulii jooʼomüin jee aapüneena ekii jia namüin na jüʼünüükana. 26 Tajaʼttirapa tü eküülü jünaajaakat, eejeena polooshii jieyuu jaʼakajee aʼlakajaaka eküülü suluʼu waneesia neʼe «horno», yaaweerü shia natuma jee paliʼirawaijeerü nottonojopa shia, ekeena jia nnojoliipejeʼe emireenain jia.

27 »›Nnojoliire jaapaain sümaa tanüiki mayaainjeʼe sülatüin tia jümüin jee macheʼere jia süchiirua peʼipaain jia tamaa, 28 peʼipaʼaleejeechia maʼin taya jümaa jee akaratshitueena eʼrüin jia jümüliala tatuma saaʼujee tü jaainjalakat. 29 Jikeetka neʼiruku na jüchonnii tooloyuucheinkana jee jikeerü shiʼiruku tü jüchonnii jieyuucheinkalüirua. 30 Tajaʼttireerü eere juʼwaajüin maleiwayaasü kojutuka maʼin jümüin, tajaʼttireerü eere jaʼajüin wunuʼu jemetaka eejuu sümüin jümaleiwase jee outapa jia, tapaaʼawajaajeena jia saaʼu shiyaakua jümaleiwase nnojotka katüin oʼu, toʼuneechika juulia sümaa talerajüin jia. 31 Tooʼulaajeena nashutuin na jüʼünüükana saaʼu tü jupueulosekat, nnojorüleejeeria kasain eein tatuma suluʼu tü miichi juʼwaajülekat jee nnojoleerü taatüin eejuu tü kasa jemetakalü eejuu jaapaka tamüin. 32 Nnojorüleejeeria kasain süpaʼajanain tü mmakat tatuma jee poneerü maʼin naaʼin tia na jüʼünüü kepieenakana suluʼu tü juumainkat. 33 Taʼwalakajaajeena jia sainküinpünaa tü mmakat, tajüteena na jüʼünüükana jooʼomüin süpüla nashutuinjanain jaaʼu süka chajaruuta, nnojorüleejeeria kasain süpaʼajanain tü juumainkat jee ajaʼttaleejeeria tü jupueulosekat.

34 »›Nnojorüleejeeria kasain süpaʼajanain tü juumainkat soʼu chain jia noumainpaʼa na jüʼünüükana, meerü seemeraakai aaʼin tü mmakat süka nnojoluin seemeereʼennüin paala soʼu sülatawalin akaratshi juya. 35 Meerü seemeraakai aaʼin tü mmakat soʼu süpüshuaʼa tü kaʼi mapaʼajanakalü oʼu shia, süka nnojoluin seemereʼennüin soʼu tü sükaliakalü eemerawaa soʼu chajanain jia kepiain suluʼu.

36 »›Shapaajeerü maʼin naaʼin tatuma na apütaakana süchikijee sajaʼttinnüin noumain chapa naya noumainpaʼa na naʼünüükana. Apantajaweena neʼe naya naapaiwaʼaya shipisana süpana wunuʼu awawatka sutuma joutai. Apantajaweena neʼe naya maʼaka naaʼin chi wayuu apantajaakai süpüleerua nüʼünüü eekai chajaruutamaain jee ashanaajeena naya mayaainjeʼe nnojoluin jaralin eipiijain naya. 37 Ataʼijiraajeena neʼe naya maʼaka naaʼin wayuu eekai apantajaain süpüleerua naʼünüü jaʼitashii nnojoluin jaralin eipiijain naya, nnojoleena naya eejiraain namaa na naʼünüükana. 38 Outeena naya sainküinpünaa tü mmakat, anaajaajeena naya noumainpaʼa na naʼünüükana. 39 Mülieena saaʼujee naainjala na eekai apütaain jaʼakajee noumainpaʼa na naʼünüükana. Shiimain mülieenain naya saaʼujee naainjala na kachonniikana naya. 40 Naküjeerü süchiki tü naainjalakat jee süchiki kaainjalain na kachonniikana naya sümaa nnojoliin noonooin. Naküjeeriaʼaya nnojoliin noonooin saaʼujee peʼipaain naya tamaa. 41 Peʼipaajeechiaʼaya taya namaa soʼu kaʼikat tia jee tamaajeena naya noumainpaʼamüin na naʼünüükana.

»›Eeshiijaʼa nayaawajaweenale suulia naainjala soʼu tia süka macheʼein naya, neʼreenakalaka namüliala saaʼujee naainjala. 42 Soteetkalaka taaʼin tü pütchi tapansaajakat nümaa Jacob, tü tapansaajakat nümaa Isaac jee soteeria taaʼin tü tapansaajakat nümaa Abrahán, nnojoleerü motuin taaʼin tü mma taküjakalü achiki paala taapüinjatüin jümüin. 43 Soʼu nnojoliin naya süpaʼa tü noumainkat, meerü seemeraakai aaʼin tü noumainkat, nnojoleerü kasain süpaʼajanain tü mmakat süka nnojoliijeenain naya suluʼu. Eʼreena naya namüliala saaʼujee tü naainjalakat süka nnojoliin naapaain sümaa tü taluwataakalü anain jee nayoutuin tü tamakat namüin. 44 Mayaainjeʼe sülatüin tia, nnojoleena tayüülajaleeinña jia soʼu chain jia noumainpaʼa na jüʼünüükana, nnojoleena talerajaleeinña jia shiiʼiree toʼutaleeinjanain jaaʼin. Taaʼinrüle tia, meerü nnojotkai saaʼin tekeraajüin tü pütchi tapansaajakat namaa süka tayain Jehová chi Jümaleiwasekai. 45 Soteerü taaʼin tü pütchi tapansaajakat namaa na jutuushinuukana shiʼree anain jukuwaʼipa, tayuʼluin jia suʼupala watta saalii wayuu suluʼujee tü mmakalü Egipto süpüla tayainjachin Jümaleiwasein, tayasa Jehová›».

46 Tia shia tü pütchi nümakat Jehová jee tü nuluwataakalü anain na israelitakana nükajee Moisés chaa eekai tü uuchikat Sinaí.