Karaloʼuta namüinjatka na Hebreokana
1 Sümaiwa paala aashajaapuʼushi chi Maleiwakai namaa na watuushinuukana. Naaʼinrapuʼuin tia nakajee na nünüikimaajanakana, kojuyatua naaʼinrüin tia jee wainma sukuwaʼipa nutuma. 2 Maaʼutpünaa yaa,* aashajaashi nia wamüin nükajee wanee Nüchon, nia nüneekaka süpüla naapüin nümüin süpüshuaʼa tü kasa eekat nümaʼana jee nia nukumajaka akajee tü kasa eekat chaa iipünaa jee tü yaakat mmapaʼa.* 3 Nükajee niakai ayaawatüna aaʼuchi pülashin chi Maleiwakai, ayatüsü maʼin nukuwaʼipa Maleiwa nutuma, ayatüsia eein kasa süpüshuaʼa sükajee tü pütchi nujuʼitirakat jee süchikijee wulein wakuwaʼipa nutuma suulia kaainjalaa, aikalaashi nia chaa iipünaa nikialuʼujee chi Maleiwakai. 4 Alanaʼaleeshia chi Nüchonkai Maleiwa noulia na aapieekana, jama shiʼitaanüin nünain wanee anüliee anaʼleeka maʼin suulia nanülia na aapieekana.
5 «Tachon pia, tayaichipa püshika», ¿eeshiche wanee aapiee münakai amüin nutuma Maleiwa? «Tayeechi chi nüshikai jee tachonjeechi nia», ¿eeshichejeʼeya chi münakai amüin? 6 Anuu nünüiki Maleiwa saaʼujee nüntirüin nüchikuaʼa chi Niʼirumakai yaa mmapaʼamüin: «Anashi kojutule nia natuma napüshuaʼa na aapiee nümaʼanajeejanakana Maleiwa».
7 Anuu nünüiki nachiki na aapieekana: «Meʼrujusalii nutuma na aapiee nümaʼanajeejanakana jee müshiʼiya na aʼyataakana nümüin müshii aka saaʼin suwarala siki nutuma». 8 Anuupejeʼe nünüiki nüchiki chi Nüchonkai: «Nia Maleiwa aapaka laülawaa pümüin süpüla kaʼikat süpüshuaʼa otta aluwataashi pia sümaa lotuin sukuwaʼipa tü paaʼinrakat nutuma. 9 Kamalainsü pümüin tü lotookalü akuwaʼipaa jee piyouta achikirü tü mojulawaakat. Müshijeseʼe püneekünüin nutuma chi Pümaleiwasekai. Naaʼinrüin tia sükajee niʼyotuin seita saaʼu pikii jee talatüshi pia nutuma noulialeʼeya na wane aluwataashiikana».* 10 Anuu sünüiki tü Karaloʼuta Nüchikimaajatkat Maleiwa: «Señotkalee, sümaleeiwaʼaya paala püikaleʼerüin tü mmakat jee pukumajüin tü sirumatuʼukat. 11 Amülouijeena naya, ayateechipejeʼe pia katüin oʼu, ajaʼtteena naya maʼaka sajaʼttüin wanee kuluulu, 12 pukoʼoyojeena naya maʼaka sukoʼoyojunuin wanee kuluulu jee maʼaka sukoʼoyojunuin süsheʼin wayuu. Aʼwanajaaneena naya, eekajasaʼa piakai, nnojoleerü aʼwanajaain pukuwaʼipa, kateerü poʼu süpüla kaʼikat süpüshuaʼa».
13 «Püikalaa yaa tekialuʼujee waneʼereeya puuʼuipalapa tatuma na püʼünüükana», ¿eeshiche wanee aapiee nümakai amüin Maleiwa? 14 ¿Aashin meʼrujuin naya napüshuaʼa?, aʼyataashii naya nümüin chi Maleiwakai. ¿Aashin nayain nuluwataain Maleiwa süpüla nakaalinjain na wayuu oʼtteʼennajanakana?