Tü nüshajalakat Juan
2 Piama kaʼi süchikijee tia, saainjünaka wanee miʼiraa shikiira kasaalüü suluʼu tü mma kanüliakat Caná, tü chakat Galilea. Chajatü tü niikat Jesús sünain eʼrajaa sukua tia miʼiraakat. 2 Ounejaanüshi Jesús namaa na nikirajüinkana sünain tia miʼiraakat.
3 Sajaʼtteematapa tü wiinokot, sümakalaka tü niikat Jesús nümüin: «Ajaʼlajaasü wiinokot». 4 Nusoutakalaka Jesús sümüin: «Nnojo sünainpünaain waya tia, nnojotyülia antüin tü kaʼi teʼraajünüinjachikalü oʼu». 5 Anuukalaka sünüiki tü niikat namüin na eitajüshiikana: «Jaaʼinra süpüshuaʼa tü nümakat jümüin». 6 Eejatü aipiruasü amüchi aainjuushi süka ipa, kaluʼusü wüin. Tia wüinkat süpülajatü naaʼinrüin na judíokana wanee kasa wuleinjatkalü atuma nakuwaʼipa. Suluʼu wanee amüchi eejatü maʼaka saaʼin 44 jee shiale 66 litro. 7 Anuujeseʼe nünüiki Jesús namüin: «Jipiraja türa amüchikat». Sümülapünaʼaleeka shia natuma. 8 Nümakalaka namüin: «Jajaʼitta süpüshi jee jiʼikajaa shia nümüin chi sülaülajanakai tü miʼiraakat». Neʼikajaakalaka shia nümüin. 9 Niasaʼa chi sülaülajanakai tü miʼiraakat, neenajirüin chi kaʼwayuuseinjachikai. Neenajirüin nia nuuʼulakapa seʼejü tü wiinokot, tü wüinkat paala, jama nnojoluin nütüjaain saaʼu jamakuwaʼipalüin shia. Nayapejeʼe atüjaain saaʼu tia na eitajüliikana süka nayain ajaʼittüin tü wüinkat. 10 Anuujeseʼe nünüiki chi sülaülajanakai tü miʼiraakat: «Wayuu maʼleekalia shiitajirüin palajana tü wiino jemetüsükat jee shiperuwaapa wayuu, shiitajirüin tü wiino mejeʼejütsükat. Naatapejeʼe sukuwaʼipa putuma, eiwaʼalajatia piitajiraa tü wiino jemetüsükat». 11 Tü palajatkat kasa pülasü naaʼinraka Jesús, naaʼinrüin shia suluʼu tü mma kanüliakat Caná, tü chakat Galilea. Suluʼujee tia jaʼyasü saaʼu nukuwaʼipa pülain nia otta anoujashii na nikirajüinkana nünain.
12 Süchikijee tia nuʼunakalaka Jesús Capernaúmmüin sümaa tü niikat, namaa na nuwalayuukana otta namaa na nikirajüinkana. Nnojoliipejeʼe kakaliain maʼin naya chayaa.
13 Nuʼunakalaka Jesús Jerusalénmüin sülüʼütpa sükalia süpüla shikaanajatüin tü Pascuakat* natuma na judíokana. 14 Chajanaka joyojoyolüin nüpüla suluʼu tü aʼwaajüleekat na oikaaliikana paaʼa, anneerü, toomasü otta na aʼwanajüliikana nneerü. 15 Nüchüülejaaka Jesús wanee jiiku, nüjünajaakalaka napüshuaʼa naya wayuukana suluʼujee tü aʼwaajüleekat sümaʼaleeya tü anneetkat otta müsia tü paaʼakat. Nijinaaka nanneetse na aʼwanajüliikana nneerü otta nujunaain nemeesain. 16 Anuujeseʼe nünüiki namüin na oikaaliikana toomasü: «Jüsünneʼera süpüshuaʼa tüü yaajee, nnojotsü juikaaleeinjatüin nipia chi Tashikai». 17 Sotoka naaʼin na nikirajüinkana tü sümakat tü Karaloʼuta Nüchikimaajatkat Maleiwa, tü makat mayaa: «Kojutusiaʼaya maʼin tamüin tü pipiakat, müsü aka saaʼin wanee siki chuwataka suluʼu taaʼin».
18 Anuujeseʼe nanüiki na judíokana nümüin suluʼujee tia: «Anashi paainjale kasa pülasü woʼupala, wanoujeenaka sünain saapünüin laülawaa pümüin». 19 Nusoutakalaka Jesús namüin: «Jujuttira tü aʼwaajüleekat, tashaʼwaleʼereetka shia soʼu apünüin kaʼi». 20 Anuujeseʼe nanüiki na judíokana nümüin: «Akumajünüsü tü aʼwaajüleekat soʼu pienchi shikii aipiruamüin juya, ¿püshaʼwaleʼereetka neʼe shia paashin soʼu apünüin kaʼi?». 21 Shiapejeʼe naashajaain achiki Jesús tü niʼirukukat, shiyaawasesü nutuma tü aʼwaajüleekat. 22 Soʼu nüsoʼireʼennüin aaʼin Jesús süchikijee outaa, sotusü naaʼin na nikirajüinkana shiain naashajaapuʼuin achiki tia. Nanoujaka sünain tü ashajünakat sünain tü Karaloʼuta Nüchikimaajatkat Maleiwa otta sünain tü nümapuʼukat Jesús.
23 Wanaa sümaa chajachin Jesús Jerusalén sünain tü miʼiraa kanüliakat Pascua, watta naalii na wayuu anoujakana nünain süka neʼrüin tü kasa pülasü naaʼinrakat. 24 Wainmajapejeʼe naaʼin Jesús noulia, jama niʼraajüin naya napüshuaʼa. 25 Jee nnojotsü choʼujaain süküjünüin nümüin Jesús jamüin maʼin nukuwaʼipa wanee wayuu süka nütüjaain saaʼu kasain suluʼuin naaʼin wanee wayuu.