Palajatka karaloʼuta Samuel
2 Anuukalaka sünüiki Ana soʼu suʼuraajüin nümüin Maleiwa:
«Talatüsü taaʼin nutuma Jehová,
nia katchinka atuma taya Jehová.
Asoutusü taya neʼipajee na taʼünüükana
jee talatüsü taaʼin süka nükaalinjain taya Maleiwa.
2 Jehovákalee, pia neʼe wuleka akuwaʼipa pümüiwaʼa.
Nnojoishi eein wanee makai aka paaʼin.
Müshi pia maʼaka wanee ipa miyoʼu icheka maʼin.
3 Nnojo yaletüin jaaʼin sükajee jünüiki.
Nnojo juʼwaataain suluʼu jukuwaʼipa,
jama nütüjaain saaʼu Jehová kasa süpüshuaʼa
jee nüküjain lotule jee nnojorüle lotuin nukuwaʼipa wanee wayuu sükajee tü kasa naaʼinrakat.
4 Nüshanaajüin Maleiwa najatüin na wayuu katchinjakana maʼin,
katchinpejeʼe nutuma na wayuu matchinkana.
5 Aʼyataainjana maʼin na wayuu jouutpuʼukana amaʼana eküülü süpüla neküinjanain,
emireenapejeʼe maʼin na wayuu alatitpuʼukana jamü.
Akaratshishii süchon tü wayuu maratpuʼukat,
apütüüjeetpejeʼe sümüiwaʼa tü wayuu wainmapuʼukalü achon.
6 Nuuntuin Jehová nuʼutuin naaʼin wanee wayuu jee nuuntuin katüinjatüin noʼu nutuma.
Müshijaʼa nüshakatirakai naaʼin wanee wayuu Amuuyuupaʼamüin* jee nuuntuin nüsoʼireʼerüin naaʼin nüchikuaʼa.
7 Nuuntuin Jehová maʼletseinjachin wanee wayuu nutuma jee nuuntuin washirüinjachin nia nutuma.
Nuuntuin niʼrüinjachin japülii wanee wayuu nutuma jee nuuntuinña kojutuinjachin nia atumawaa.
8 Nütameʼerüin saʼakajee sümamüla mma chi wayuu eekai müliain
jee nütameʼerüin saʼakajee paliʼi chi wayuu maʼletsekai
süpüla nüikaleʼerüinjanain naya naʼaka na aluwataashiikana.
Naaʼinrüin tia süpüla kojutuinjanain naya atumawaa.
Nia aikaleʼeraka Jehová suuʼui tü mmakat
jee kachonkalaka pünajüt saaʼu nutuma.
9 Naaʼinmajüin na wayuu oonookana sümaa nünüiki,
nuʼutapejeʼe naaʼin saʼaka piʼyuushi na wayuu mojulaakana,
jama nnojoluin nükanajüin wanee wayuu wanee kasa süka nütchin nümüiwaʼa.
10 Najaʼttireena Jehová na wayuu atkaajiraakana nümaa
jee atütteerü sirumatuʼujee jashichipa nia namüin.
Süsaleerü nutuma Jehová wayuu sainküinpünaa tü mmakat.
Naapeerü pülaa nümüin chi aluwataainjachikai
jee katchinjeechi nutuma chi nüneekakai».
11 Nuʼunakalaka Elcaná nipialuʼumüin, chaa suluʼumüin tü mmakat Ramá. Makatapejeʼe chi joʼuukai nümaa Elí sünain aʼyatawaa nümüin Jehová.
12 Wayuu mojulaashii na nüchonniikana Elí jee mojutusai Jehová namüin. 13 Nnojotsü anain naaʼin sümaa tü kasa naapawaikat na wayuukana namüin. Jamüshijaʼa nüntüle wanee wayuu sünain asülajaa wanee kasa nümüin Maleiwa, antüshi chi niʼipajanakai chi sacerdotekai sümaa wanee tenedor miyoʼu sümaʼainruʼu sushuujunuin tü asalaakat, 14 naapaʼawalin tia asalaakat sümaa niʼitaain shia suluʼu wanee iita, suluʼu wanee wayeeta piamakalü acheʼe, suluʼu wanee siʼwarai jee shiale suluʼu wanee wayeeta waneesükalü atüna. Aapünawaisü nümüin chi sacerdotekai süpüshuaʼa tü asalaa ayuʼnnakat süka tü tenedorkat. Aainjünawaisü tia süka tü nasülajakat na israelita oʼunakana suluʼumüin tü pueulokot Siló. 15 «Paapa nümüin chi sacerdotekai wanee asalaa süpüla nüsijaainjatüin shia, nnojoleetsa naapaain wanee asalaa eekai ashuujuushin», maʼwaisü nünüiki chi niʼipajanakai chi sacerdotekai nümüin chi wayuu antakai sünain asülajaa wanee kasa nümüin Maleiwa. Naaʼinrüin tia chi niʼipajanakai chi sacerdotekai süpülapünaa süsijaanüin saüsü mürüt. 16 Shiasaʼa «anakajaʼa süsijaanüle tü saüsükat mürüt palajana, jaʼitakaʼa paapaain tü paapaweekalü amüin», nümapa chi wayuu asülajakai wanee kasa nümüin Maleiwa, asounajaʼawaishi chi niʼipajanakai chi sacerdotekai sünain maa: «Nnojottaa, paapa tamüin tü asalaakat jooluʼuleʼeya, tasünaweetsa shia puulia». 17 Mojusü maʼin nümüin Jehová tü kasa naainjakat na neʼipajanakana na sacerdotekana süka mojutuin namüin tü kasa asülajünakat nümüin Jehová.
18 Mayaainjeʼe jintülin Samuel, aʼyataashi nia nümüin Jehová jee naʼatapuʼuin nünain wanee kuluulu kanüliakat efod, aainjuushikat süka lino. 19 Saainjawalüin tü niikat juyawai wanee saajuna nüsheʼin matünasat jee shiʼikajaʼawalin shia nümüin suʼunawaipa nümaa chi suʼwayuusekai sünain asülajaa wanee kasa nümüin Maleiwa juyawai. 20 Nüküjakalaka Elí wanee pütchi analuʼut nümüin Elcaná jee sümüin tü nuʼwayuusekat, anuu nünüiki namüin: «Kasataalejeseʼe anakuwaʼipalüin nutuma Jehová tü puʼwayuusekat süpüla kachoinjatüin shia süchikuaʼa, niiʼirakaluʼu chi jintüi süsülajakai nümüin Jehová». Naleʼejakalaka nachikuaʼa nepialuʼumüin. 21 Sümülialaaka naaʼin Jehová saalin Ana, ipuotkalaka shia süchikuaʼa. Apünüinshii süchon tooloyuu jee piamashii jieyuu. Ayatakalaka nimiyoʼulaain Samuel sümaa talatüin Jehová nümaa.
22 Mayaainjeʼe laülaain maʼin Elí nütüjaa aaʼu süpüshuaʼa tü kasa mojusü aaʼinnakat namüin na israelitakana natuma na nüchonniikana. Nütüjaa aaʼuliaʼaya nainkaʼawaliin na nüchonniikana namaa na jieyuu aʼyataakana soʼuluʼu tü miichi aainjuushikat süka loona.* 23 Anuujeseʼe tü nüküjawaikat Elí namüin na nüchonniikana: «¿Jamüsükai makaʼa jaainjala sümüin wayuu? Aküjünüsü tamüin süchiki tü kasa mojusü jaainjakat sümüin wayuu. 24 Nnojotsüsa anain tü jaainjakat tachonniwaa, nnojotsü anain tü aküjünakat jüchiki natuma na aʼwaajakana Jehová. 25 Kaainjarale wanee wayuu nuulia wanee wayuu yalejee, eeshijaʼa nuchunteechire wanee wayuu nüpüleerua nümüin Jehová süpüla motuinjatüin naaʼin naainjala. Eekajasaʼa kaainjarale wanee wayuu nuulia Jehová, nnojoleechi eein wanee wayuu achuntakai nüpüleerua». Macheʼepejeʼe na nüchonniikana Elí sümüin tü nüküjakat namüin, jama noʼutuneetüjüliin aaʼin nutuma Jehová. 26 Ayatüshia emiyoʼulaain Samuel, aishi maʼin nia nüpüla Jehová jee süpüla wayuu.
27 Anuukalaka tü nümakat wanee nünüikimaajachi Maleiwa nümüin Elí: «Anuu tü nüküjirakat Jehová pümüin: ‹Neʼraajüin taya na nüpüshikana chi putuushikai wanaa sümaa chajanain naya Egipto jee wanaa sümaa nüchepchiapuʼuin* naya faraón. 28 Naʼakajee napüshuaʼa na israelitakana, nia taneekaka chi putuushikai süpüla sacerdoteinjachin nia, nia taneekaka süpüla niainjachin eʼikajaʼawalin wanee kasa aʼajünajatkat tamüin. Taneeküinña nia süpüla naʼajüinjatüin wunuʼu jemeta eejuut tamüin jee süpüla naʼatüinjatüin nünain tü kuluulu kanüliakat efod nüntapa tamaʼanamüin. Müsüjeseʼe taapüin shikii namüin nüpüshi chi putuushikai süpüla naapaainjatüin süpüshi tü asalaa nalüʼüjawaikat tamüin na israelitakana, tü asijaanawaikat tamüin. 29 Taluwataain jia süpüla juʼutuinjatüin saaʼin mürüt tamüin jee jüsülajüinjatüin wanee kasa tamüin eere taʼwaajünüin. ¿Jamüshii nayakaʼa kojutuleein pümüin na püchonniikana toulia? Kaüsüshii jia sutuma tü asalaa nasülajakat na israelitakana tamüin.
30 »›Anuukalaka nünüiki Jehová, chi Namaleiwasekai na israelitakana: «Shiimainña taneeküin na püpüshikana jee na nüpüshikana chi putuushikai süpüla naʼyataainjanain tamüin». Anuupejeʼe nünüiki Jehová süka suʼwanajaain naaʼin süchiki tia: «Tooʼuleereena jia suulia ayatüin jiʼyataain tamüin, kojuteena tamüin, na kojutukana amüin taya. Eekajasaʼa na mojutukana amüin taya, mojuteena naya tamüinña». 31 Alüʼütsü tü kaʼi tasütüinjatkalü oʼu puulia tü laülawaa taapakat pümüin jee tü laülawaa taapakat namüin nüpüshi chi putuushikai. Nnojoleena eʼrüin laülawaa nüpüshi chi putuushikai. 32 Sümaʼainruʼu neʼrüin kasa anasü na israelitakana, eejeechi wanee püʼünüü eere taʼwaajünüin jee nnojoleena eʼrüin laülawaa nüpüshi chi putuushikai. 33 Chi püpüshi taneekakai süpüla niʼyataainjachin tamüin eere taʼwaajünüin, meerü maʼülakai saaʼin poʼu nutuma jee shapaajeerü paaʼin nutuma. Watteenapejeʼe naalii na püpüshi oʼutuneenakana aaʼin süka chajaruuta. 34 Outeena soʼu wanee kaʼi na piamashiikana püchonnii, outeechi Hofní nümaa Finehás. Piyaawateetkalaka sükajee tia shiimain tü taküjakat pümüin. 35 Taneekeechi wanee sacerdote oonookai waneepia sümüin tanüiki, naaʼinreerü süpüshuaʼa tü suchuntaakat taaʼin. Taainjeetkalaka wanee nipia eejeetkat waneepia jee aʼyataajeechi nia waneepia nümüin chi taneekakai süpüla aluwatawaa. 36 Na püpüshi isajakana suulia outaa, nasapainkeena naya nümülatuʼu chi taneekakai süpüla aluwatawaa jee achunteena naya aʼyatawaa nümüin sümaa eküüt. «Paapa maa tamüin wanee aʼyatawaa, naʼyataakat anain na sacerdotekana, tekataajeechika wanee kasa saaʼu», nameenakalaka nümüin›».