Levítico
5 »›Eere wanee wayuu eʼrakai wane sünain aaʼinraa kasa mojusü jee nütüjaale saaʼu tü kasa mojusü naaʼinrakat, naapüle süchiki suunejinnüin wayuu süpüla süküjain süchiki tü kasa mojusü naaʼinrakat chia wayuukai, nnojoire nuʼunuin sünain aküjaa süchiki tia, wanaaweechi nia nümaa sünain kaainjalaa jee asoutajachi nia saaʼu.
2 »›Chi wayuu epettakai wanee kasa yarüttüsü* eekai outuin maʼaka saaʼin wüchii wünaʼapüjatü, mürüʼlü, wüchii eekai tünnatüin sooʼopünaa tü mmakat, yarütteerü nukuwaʼipa toʼupala tayakai Maleiwa jee kaainjaleechi nia sünainjee tia jaʼitasü nnojolin naaʼinjeein shia. 3 Nipettüle wanee wayuu wanee kasa yarüttaka tamüin, shiale kasa yarüttüsü sünainjeejatka wayuu jee shiale wanee kasa yarütteechika atuma nia toʼupala tayakai Maleiwa, kaainjaleechi nia jaʼitasü niyaawatüin saaʼu mapa mojuin tü naainjalakat.
4 »›Nüshapajaale wanee wayuu sümaa naapüin nünüiki jaʼitasü anain jee mojuin shia jee niyaawatüle saaʼu mapa nüshapajaajain neʼe, kaainjaleechi* nia.
5 »›Eere wanee wayuu makai aainjala, nüküjamaatüinjatü süchiki kasain kaainjalain aaʼujee nia. 6 Asülajüinjachi nia wanee kaaʼula jee shiale wanee anneerü tamüin tayakai Jehová saaʼu tü naainjalakat, müinjatü sukuwaʼipa nutuma saaʼu kaainjalain nia. Naapaajeetkalaka chi sacerdotekai tü nüsülajakat chi wayuukai süpüla sülatinnajatüin naainjala.
7 »›Nnojorüle nümaʼana süpüla nüsülajüinjachin wanee anneerü, asülajüinjachi nia tamüin tayakai Jehová piamasü wawaachi jee shiale piamasü toomasüchein, shia nüsülajüinjatka tia saaʼu naainjala, aapünajatü wanee wüchii saaʼu tü naainjalakat otta tü wane wüchiikat oʼutunajatü aaʼin sümaa saʼajünüin tamüin tayakai Maleiwa. 8 Niʼikajaajeetkalaka tü wüchiikalüirua nümüin chi sacerdotekai, nuʼuteetkalaka saaʼin chi sacerdotekai tü palajatkat wüchii süpüla naapüin shia saaʼu naainjala chi wayuukai. Naaʼüteetka chi sacerdotekai shikii tü wüchiikat, nnojotpejeʼe nüsüʼütaleeinjatüin shia. 9 Sütülüittinneetka sünain wanee saʼata tü aʼajüleekat mürüt süpüshi süsha tü wüchii asülajünakat saaʼu saainjala wayuu. Shiasaʼa tü apütaakalü oʼyotunajatü shia saʼatoʼu tü aʼajüleekat mürüt, shia wanee kasa asülajünakajatka saaʼu saainjala wayuu. 10 Naapeetkalaka tü wane wüchiikat sümaa nuʼutuin saaʼin jee naʼajüin shia maʼakaapuʼu saainjünüin. Naapeetkalaka chi sacerdotekai tamüin tayakai Maleiwa tü nüsülajakat chia wayuukai süpüla sülatinnajatüin naainjala, moteetkalaka taaʼin naainjala chia wayuukai.
11 »›Nnojorüle nümaʼana süpüla naapajachin piamasü wawaachi jee shiale piamasü toomasüchein, aapajachi nia saaʼu naainjala wanee kilo* ariina yütchonka, nnojotsü niʼyotuinjatüin seita saaʼu jee nnojotsü nijitajatüin ‹olíbano› saaʼu süka nüsülajalain shia wanee wayuu saaʼu naainjala. 12 Niʼikajaajeetka tü nüsülajüinjatkat nümüin chi sacerdotekai, najapateetka chi sacerdotekai wanee najapü ariina süpüla naʼajüinjatüin shia jee kaittüinjatüin tü sümüsainkat saaʼu tü aʼajüleekat, niʼitaajeerü shia saaʼu tü aʼajünakat paala tamüin tayakai Jehová saaʼu tü siki chuwatakat maʼin. Tia shia tü naapajatkat wanee wayuu saaʼu naainjala. 13 Naaʼinreerü tia chi sacerdotekai nüpüleerua chi wayuu kaainjalakai süpüla sülatinnüin naainjala. Nümüinjatü chi sacerdotekai süpüshi tü asülajuushi aʼajünajatkat maʼaka sukuwaʼipa tü eküülü asülajünakat›».
14 Ayatakalaka naashajaain Jehová nümaa Moisés sünain maa: 15 «Eere wanee wayuu aaʼinrakai kasa mojusü süka mojutuin nümüin tü kasa aʼwaajünakalü akajee tayakai Jehová sümaa nnojolin naaʼinjeein shia, naapajatü tamüin tayakai Jehová saaʼu tü naainjalakat wanee anneerü nnojotka ayuulin jee nnojotka kamojulain. Nuwalaajüinjatü tü süliapalakat suluʼu nneerü pülaata* wanaapünaa sümaa shipesajia wanee kasa suluʼu tü miichi aʼwaajüleekat. 16 Awalaajüinjachi nia wanaapünaa sümaa tü naainjalakat saaʼujee mojutuin nümüin tü miichi aʼwaajüleekat, sünainjee jaʼraisü shiʼipa sülia tü nuwalaajüinjatkat naapüinjatü wane shiʼipa sooʼomüin. Naapeetkalaka süpüshuaʼa tia sümaʼaleeya tü anneerü aapünajatkat saaʼu naainjala nümüin chi sacerdotekai süpüla sülatinnüinjatüin naainjala chi wayuukai, moteetkalaka taaʼin tayakai Maleiwa naainjala chi wayuukai.
17 »Kaainjalashi wanee wayuu aaʼinrakai wanee kasa tapülajaka tayakai Jehová sümaa nnojolin niyaawatüin saaʼu, asoutajachi saaʼu tü naainjalakat. 18 Aapajachi nia nümüin chi sacerdotekai wanee anneerü eekai nnojoluin ayuulin jee eekai nnojoluin kamojulain wanaapünaa sümaa sülia tü aapünajatkat saaʼu naainjala. Naapeetkalaka chi sacerdotekai tia tamüin tayakai Maleiwa süpüla talatirüin naainjala chia wayuukai, jaʼitairü nnojoluin naaʼinjeein shia jee nnojolin nütüjaain saaʼu, moteetkalaka taaʼin naainjala chia wayuukai. 19 Tia shia tü naapajatkat wanee wayuu saaʼu naainjala. Shia aaʼinnajatkat tia kaainjarale wanee wayuu toulia tayakai Jehová».