Levítico

8 Ayatakalaka yootuin Jehová nümaa Moisés sümaa müin nünüiki nümüin: 2 «Puunejira Aarón namaa na nüchonniikana jee püsaajira tü nasheʼinkat sümaʼaleeya tü seita oʼyotunakat naaʼu wanee wayuu eekai nüneekünüin, chi paaʼa toolo aapünakai saaʼu naainjala wanee wayuu sümaa nnojolin naaʼinjeein shia, na piamashiikana anneerü otta tü kanaasüta kaluʼukat pan maʼakaka soolojia. 3 Juutkajeʼera napüshuaʼa na israelitakana soʼuluʼu tü miichi aʼwaajüleekat».

4 Naainjaka Moisés wanaapünaa sümaa tü nümakat Jehová, noutkajaaka na israelitakana soʼuluʼu tü miichi aʼwaajüleekat. 5 Anuukalaka nünüiki Moisés namüin na israelitakana: «Anuu tü waaʼinrüinjatkat naashin Jehová». 6 Nürütkeʼeraka Moisés Aarón namaa na nüchonniikana jee nuluwataaka naya sünain oʼoojoo. 7 Naʼatakalaka nünain Aarón tü nüsheʼinkat, tü kuluulu niyatapünaakat, naʼatüin nünain tü kuluulu matünasatkat otta tü kuluulu kanüliakalü efod jee nüchecheraka nünain tia kuluutkat süka tü kuluulu eʼinuushi niyatapünaakat. 8 Naʼatakalaka nünain tü naaʼintoʼupünaainjatkat jee niʼitaain suluʼu tü kanüliakalü «Urim» jee tü kanüliakat «Tumim». 9 Naʼatakalaka Moisés sünain nikii Aarón tü ekiaalaja anakat maʼin otta niʼitaain sünain tia ekiaalajakat tü saʼata ooro anakat maʼin maʼaka nuluwataain nia Jehová.

10 Nushuleraka Moisés seita saaʼu tü miichi aʼwaajüleekat jee saaʼu süpüshuaʼa tü kasa eekat suluʼu jee nükatalüin shia süpüla aʼyatawaa nümüin Maleiwa. 11 Naapaakalaka mapa tü seitakat jee nütülüittiraka shia akaratshitua saaʼu tü aʼajüleekat jee saaʼu süpüshuaʼa tü kasa eekat sünain, nütülüittirüin shia saaʼu tü süpülajanakat wüin sümaa tü süsaʼakat, nükatalüin shia süpüla aʼyatawaa nümüin Maleiwa. 12 Niʼyotokoloko saaʼu nikii Aarón tü seita oʼyotunakat naaʼu wanee wayuu eekai nüneekünüin, nüneekakalaka nia süpüla aʼyatawaa nümüin Maleiwa.

13 Nürütkeʼeraka Moisés na nüchonniikana Aarón, naʼatakalaka nanain tü kuluulu nasheʼinjatkat, tü kuluulu nayatapünaainjatkat jee naʼatüin nanain nekiaalaja maʼaka nuluwataanüin nutuma Jehová.

14 Nüsaajiraka chi paaʼa toolo aapünakai saaʼu naainjala wanee wayuu sümaa nnojolin naaʼinjeein shia, niʼitaakalaka Aarón najapü namaa na nüchonniikana saaʼu nikii chi paaʼa toolo aapünakai saaʼu naainjala wanee wayuu sümaa nnojolin naaʼinjeein shia. 15 Nuʼutakalaka naaʼin Moisés chi paaʼakai jee nushuleraka süka tü najapirakat süpüshi tü ishakat sünain tü shiyaakuakat suʼuwa mürüt sünainka tü aʼajüleekat, kojutukalaka tü aʼajüleekat sutuma. Tü isha apütaakat, niʼyotuin shia saʼatoʼu tü aʼajüleekat süpüla sütüjaanüin aaʼu sükatannüin tia aʼajüleekat süpüla saʼajünüin saaʼu tü aapünakat nümüin Maleiwa süpüla motuinjatüin naaʼin saainjala wayuu. 16 Naapaakalaka mapa tü saüsü sünainkat tü niyüülainkat, tü saüsü sünainkat nüpana jee tü piamasükat nüchüʼü sümaʼaleeya tü saüsükat, naʼajakalaka shia Moisés süpüla kaittüinjatüin sümüsain. 17 Shiasaʼa tü apütaakat nünainjee chi paaʼakai, tü nütakat, tü niʼirukukat, tü nüchaʼakat, naʼajirüin shia Moisés wattamüin suulia nepia na israelitakana maʼaka nuluwataanüin nutuma Jehová.

18 Nürütkeʼeraka chi anneerü aapünakai süpüla naʼajünüin nümüin Maleiwa, niʼitaakalaka Aarón najapü namaa na nüchonniikana saaʼu nikii chi anneetkai. 19 Nuʼutakalaka naaʼin Moisés chi anneetkai jee nütülüittiraka tü nüshakat sutoutajee tü aʼajüleekat. 20 Niʼyalüjakalaka Moisés niʼiruku chi anneetkai jee naʼajakalaka tü nikiikat, tü asalaa nüchonoojokot jee tü saüsü sutoutajeekat nüchüʼü süpüla kaittüinjatüin sümüsain. 21 Nuʼlojookalaka süka wüin niyüülain chia anneetkai sümaa tü nüsaʼakat. Naʼajakalaka Moisés saaʼu tü aʼajüleekat chi anneerü oʼutunakai aaʼin. Shia wanee kasa aʼajünaka nümüin Maleiwa jemetaka maʼin eejuu nümüin, aʼajünüsü shia soʼu siki nümüin Jehová. Naainjain Moisés wanaapünaa sümaa tü nuluwataakalü anain nia Jehová.

22 Nüsaajirakalaka Moisés chi wane anneetkai, chi anneerü aapünakai saaʼu nüneekünüin wanee sacerdote, niʼitaakalaka Aarón najapü namaa na nüchonniikana saaʼu nikii chi anneetkai. 23 Nuʼutakalaka naaʼin Moisés chi anneetkai jee niʼitaakalaka süpüshi tü nüshakat sünain tü nücheʼe nikialuʼujeekalü Aarón, sünain shii najapü nikiaka jee sünain shii nuuʼui nikialuʼujeeka. 24 Nürütkeʼeramaataka Moisés na nüchonniikana Aarón jee nushuleraka saaʼu tü nacheʼe nekialuʼujeekat süpüshi tü ishakat, nushulerüin shiaya sünain shii najapü nekiaka jee sünain shii nooʼui nekialuʼujeeka. Nütülüittirüin Moisés tü isha apütaakat sutoutajee tü aʼajüleekat.

25 Naapaakalaka tü saüsükat, tü süsi kaüsükat maʼin, tü saüsü sünainkat tü niyüülainkat, tü saüsü sünainkat tü nüpanakat, tü piamasükat nüchüʼü sümaʼaleeya tü saüsükat otta tü nüsaʼa nikialuʼujeekat. 26 Niyuʼlaka suluʼujee tü canasta kaluʼukat pan maʼakaka soolojia yalaka nümülatuʼu Jehová, wanee pan lakayaasü maʼakaka soolojia, wanee pan lakayaasü seitamaajatka otta wanee galleta arülachonsü. Niʼitaakalaka shia saaʼu naüsü chi anneetchonkai jee saaʼu tü nüsaʼa nikialuʼujeekat. 27 Niʼitaaka süpüshuaʼa tia najapuluʼu Aarón jee najapuluʼu na nüchonniikana, niʼyuunatkalaka shia süka shiain wanee kasa aʼyuunaluushi asülajünaka nümüin Jehová. 28 Naapaakalaka shia Moisés najapuluʼujee jee naʼajakalaka shia saaʼu tü aʼajüleekat süpüla kaittüin sümüsain, niʼitaain shia saaʼu tü aʼajünakat paala. Shia wanee kasa aʼajünaka jemetaka eejuu nümüin Maleiwa süpüla nüneekünüin wanee sacerdote, shia wanee kasa aʼajünaka soʼu siki nümüin Jehová.

29 Naapaakalaka mapa Moisés nuʼluuwain chi anneetkai jee niʼyuunatka shia süka shiain wanee kasa aʼyuunaluushi asülajünaka nümüin Jehová. Tü nuʼluuwainkat chi anneerü aapünakai süpüla nüneekünüin wanee sacerdote, nümüinjatü shia Moisés maʼaka nuluwataanüin nutuma Jehová.

30 Nütülüittiraka Moisés naaʼu Aarón, saaʼu tü nüsheʼinkat jee naaʼu na nüchonniikana sümaʼaleeya tü nasheʼinkat süpüshi tü seita ashulennakat naaʼu wanee wayuu eekai nüneekünüin otta süpüshi tü isha saaʼujatkat tü aʼajüleekat. Müsü sukuwaʼipa süpüla nüneekünüin Aarón namaa na nüchonniikana süpüla naʼyataain nümüin Maleiwa jee keraain tü nasheʼinkat süpüla tü aʼyatawaa naaʼinrüinjatkat.

31 Anuujeseʼe nünüiki Moisés nümüin Aarón jee namüin na nüchonniikana: «Jüʼlakajaa niʼiruku chi anneetkai soʼuluʼu tü miichi aʼwaajüleekat, jikeetkalaka shia chayaa sümaa tü pan suluʼukat tü kanaasüta aapünakat süpüla nüneekünüin wanee sacerdote, müinjatü sukuwaʼipa maʼaka süküjünüin tamüin: ‹Niküinjatü shia Aarón namaa na nüchonniikana›. 32 Aʼajünajatü soʼu siki tü asalaa apütaakat jee tü pan apütaakat. 33 Nnojo juʼunuin wattamüin suulia soʼu tü miichi aʼwaajüleekat soʼu akaratshi kaʼi sajaʼttaleepaʼaya tü kaʼi jüneekünakalü oʼu süpüla sacerdotein jia, süka sülatüinjatüin akaratshi kaʼi jüneekünakalü oʼu süpüla sacerdoteinjanain jia. 34 Tü waaʼinrakat soʼukai, shia waaʼinrüinjatka naashin Jehová süpüla sülatinnüinjatüin jaainjala juulia. 35 Makateenaka jia soʼuluʼu tü miichi aʼwaajüleekat soʼukai jee saʼwai soʼu akaratshi kaʼi jee jikeraajeetka jiʼyataain nümüin Jehová, suulia outajüin jia, shia sukuwaʼipainjatka tia süka shiain tü aluwataanakalü anain taya».

36 Naainjakalaka Aarón namaa na nüchonniikana süpüshuaʼa tü nuluwataakalü anain Jehová nükajee Moisés.