Éxodo
15 Niiʼirajakalaka Moisés namaa na israelitakana nümüin Jehová, anuu tü neeʼirainkat:
«Eeʼirajüshi taya nümüin Jehová süka kojutuin nia atumawaa.
Nujutirüin chi amaajuchikai sümaa tü naʼamainkat shirokumüin tü palaakat.
2 Nia Jah* katchinka atuma taya, niaʼaya oʼtteʼeraka taya.
Niaʼaya chi Tamaleiwasekai jee taʼwaajeechi nia. Nümaleiwase nia chi tashikai jee kojuteechi nia tatuma.
3 Atüjashi atkawaa Jehová sümaa pülashin maʼin nia. Jehová nünülia.
4 Nujutuin shiroku palaa neʼejena faraón namaʼaleeya na nusurulaatsekana,
wüinsitshii nutuma shiroku tü palaa Ishosükat na surulaat atüjakana maʼin atkawaa.
5 Alatüsü palaa nooʼopünaa sümaa jashichin maʼin shia, emerotushii naya shiinaluʼu maʼaka saaʼin wanee ipa.
6 Jehovákalee, pülasü maʼin tü pajapü pikiakat.
Jehovákalee, ajaʼttaleeshii na püʼünüükana putuma süka tü pajapü pikiakat.
7 Pajaʼttirüin na ashutakana paaʼu süka miyoʼu maʼin pia.
Tü paashichinkat müsü aka saaʼin sikoʼu, ajaʼttüshii na püʼünüükana sutuma maʼaka sajaʼttüin alama sutuma sikoʼu.
8 Ashaʼwalaasü tü wüinkat iipünaamüin sutuma sujuula piʼichi,
jimajimatsü neʼe, nnojotka süsetüin wüin.
Akojojoosü pasanain sünain tü palaakat tü wüin jashichikat maʼin.
9 Anuu nünüiki chi waʼünüükai: ‹¡Teipiijeena naya! ¡Tasaʼwajeena naya!
Tasüteerü tü nawashirüinkat, taapaajeetkalaka wanee kasa eekai taapaweein amüin.
Ayuʼleechi taya tachajaruutse, ayamüleena naya tachiki›.
10 Ajuʼutshi pia sükajee püsanalüin aaʼin, sülataka tü palaakat nooʼopünaa na püʼünüükana.
Emerojooshii naya maʼaka saaʼin ‹plomo› shiinaluʼu tü palaa jashichikat maʼin.
11 Jehovákalee, nnojoishi eein wanee maleiwa müin aka paaʼin.
Nnojoishi eekai miyoʼuin maʼin maʼaka paaʼin piakai sümaa wulein nukuwaʼipa.
Pia chi kojutuinjachikai maʼin atumawaa jee aʼwaajünüinjachi pia sükajee piiʼirajünüin amüin, piaʼaya chi aaʼinrakai kasa ponokot maʼin saaʼin wayuu.
12 Piyuruluin tü pajapü pikiakat, shimirajaakalaka naya tü mmakat.
13 Puʼunirüin na israelitakana saaʼujee pümülialaain naalin, taashishii naya putuma.
Puʼunireena naya sükajee tü püpülainkat eemüin tü pipia kojutukat maʼin.
14 Saapeerü achiki tia wayuu. Ainkuujeerü saaʼin saapapa shia.
Jiwaʼateerü naaʼin na wayuu chakana Filistea.
15 Eimmolojoojeerü naaʼin na shikiipüʼükana wayuu chaa Edom soʼunnaa tia.
Apatanajaajeerü naaʼin na aluwataashii kaawainkana maʼin chaa Moab.
Ooʼulaajeena suulia yalayalain naaʼin na wayuu chakana kepiain Canaán.
16 Ainkuujeerü naaʼin jee apatanajaajeerü naaʼin.
Jehovákalee, jimateena neʼe naya maʼaka saaʼin wanee ipa sükajee paaʼinrüin kasa pülasü
waneʼereeya nalatapa na israelitakana,
waneʼereeya nalatapa na israelita püneekajalakana.
17 Jehovákalee, püntireena naya jee piʼitaajeena naya saaʼu tü uuchi paapüinjatkat namüin,
tü yapajakat putuma süpüla pipiainjatüin,
Jehovákalee, shiaʼaya tü miichi püshaʼwaleʼerakat.
18 Aluwataajeechi Jehová süpüla kaʼikat süpüshuaʼa.
19 Niiteʼerakalaka Jehová süchikuaʼa tü palaakat eejatüle paala shia, sülataka sooʼopünaa tü amakalüirua,
alatüsü shia sooʼopünaa tü kareeta atkaayakat jee nooʼopünaa na amaajuna nümaajanakana faraón wanaa sümaa nalatüin pasanainpünaa sünain tü palaakat.
Alatapejeʼe na israelitakana süpaʼapünaa mma jososhiika pasanainpünaa sünain tü palaakat».
20 Shiasaʼa Míriam tü nünüikimaajatkat Maleiwa, tü nuwalakalü Aarón, saapaakalaka wanee «pandereta», natamaayaa namaka napüshuaʼa na jieyuukana süchiirua, natalejaka tü panderetakat sümaa nayonnojuin. 21 Susoutaka Míriam neʼipajee na tooloyuukana sümaa müin sünüiki shiiʼirainruʼu:
«Jiiʼiraja nümüin Jehová süka kojutuin nia atumawaa.
Nujutirüin chi amaajuchikai sümaa tü naʼamainkat shirokumüin tü palaakat».
22 Nümaakalaka Moisés mapa na israelitakana sotpaʼajee tü palaa Ishosükat. Oʼunushii naya eemüin tü isashiipaʼa chakat Sur, waraittüshii naya soʼu apünüin kaʼi isashiipaʼapünaa sümaa nnojoluin wüin napüla. 23 Nantakalaka na israelitakana eemüin tü mma kanüliakat Mará nnojotpejeʼe nasüin tü wüin chajatkat Mará süka ishin shia. Müsüjeseʼe Mará müin sünülia tia mmakat nutuma Moisés. 24 Naʼyounalaaka na israelitakana nüchiki Moisés sümaa müin nanüiki: «¿Kaseetkalaka joo wasüin?». 25 Nuchuntakalaka maʼin Moisés kaalinwaa nümüin Jehová, nuʼunirüinjeseʼe nia Jehová eemüin wanee wunuʼu joʼuuchon. Nutuʼutaka Moisés tia wunuʼukot sümaa nujutuin shia shirokumüin tü wüinkat, wüinjaakalaka jemetüsü shia.
Nüikaleʼerüin Maleiwa chayaa shikii wanee pütchi jee niʼitaain Maleiwa napüleerua na israelitakana tü sukuwaʼipainjatkat, nuuʼulaka aaʼinchii Maleiwa na israelitakana chayaa. 26 Anuu nünüiki Maleiwa namüin: «Kacheʼejüle maʼin jia sümüin tanüiki tayakai Jehová chi Jümaleiwasekai jee jaaʼinrüle wanee kasa eekai anain tamüin sümaa jüüjüüin jia sümüin tü taluwataakalü anain jee joonoole sümüin tü tachuntakat jümüin, nnojoleerü oʼotuin jünainmüin tü ayuulii oʼotokot nanain na egipciokana, süka jamüin, tayakai Jehová taya chi anakai atuma jia».
27 Nantakalaka na israelitakana süchikijee tia eemüin tü mma kanüliakalü Elim, eejatüle poloo piamamüin shikii wüin eejeere süparalüin sümaʼaleeya akaratshi shikii suuʼulia alana. Nooʼonookalaka chayaa sotpaʼa tü wüinkat.