Palajatka karaloʼuta Samuel
25 Outaka mapa Samuel, noutkajaayaa namaka napüshuaʼa na israelitakana sünain alapajawaa naaʼu. Niʼikünaka suluʼu tü mmakat Ramá, eejachire kepiain nia. Nuʼunakalaka David suluʼumüin tü isashii chajatkat Parán.
2 Eejachikalaka wanee wayuu washit maʼin suluʼu tü mmakat Maón, chajatkalaka tü nümülüinkat suluʼu tü mmakat Carmelo. Eejatü nümaʼana 3.000 anneerü otta 1.000 kaaʼula. Chajachi nia sünain aüjiraa soi tü naʼanneetsekat suluʼu tü mmakat Carmelo. 3 Nabal nünülia chia wayuukai otta nülüin nia Caleb, Abigaíl sünülia tü nuʼwayuusekat. Abigaíl shia wanee wayuu kekiikat maʼin otta anachonsü maʼin, eʼrüitpejeʼe maʼin wayumüin chi suʼwayuusekai otta aaʼinrüshi kasa mojusü. 4 Soʼu chajachin David isashiipaʼa, naapakalaka süchiki nüüjirüin Nabal soi tü naʼanneetsekat. 5 Nüneeküinjeseʼe David polooshii wayuu naʼakajee na nümaajanakana jee nümakalaka namüin: «Anashii juʼunule suluʼumüin tü mmakat Carmelo, jünteenaka nümaʼanamüin Nabal jee jüsakireechikalaka nia tamüin anale nia. 6 Jümeenakalaka nümüin jüntapa nümaʼanamüin: ‹Kasataalejeseʼe katüin poʼu soʼu wainma juya, kasataalejeseʼe anakuwaʼipalin pia, anakuwaʼipalin na wayuu kepiakana pümaa jee anakuwaʼipalin süpüshuaʼa tü kasa eekat pümaʼana. 7 Taapa achikit püüjirüin soi paʼanneetse, nnojoishii jamajüin watuma na wayuu arüleejakana pümüin wanaa sümaa chajanain waya namaa. Nnojotsü jaralin asütüin wanee kasa noulia wanaa sümaa chajanain naya suluʼu tü mmakat Carmelo. 8 Anashii püsakirüle süchiirua tia na wayuu aʼyataakana pümüin naküjeetkalaka pümüin shiimain tü taküjakat pümüin. Tachuntuinjeseʼe kamaneeinjachin pia namüin na wayuu tajütakana pümaʼanamüin, jama tajütüin naya pümaʼanamüin soʼu wanee kaʼi talatakalü oʼu maʼin saaʼin wayuu. Paapaʼaya pümaala tü süpütaalakat piküin namüin na wayuu tajütakana pümaʼanamüin jee paapaʼaya shia tamüin tayakai David, jama püchooinchin taya›».
9 Oʼunushiijeseʼe na wayuu nüjütakana David jee naküjakalaka nümüin Nabal tü nünüikikat David. Shiasaʼa kettaapa nanüiki, 10 anuukalaka nünüiki Nabal namüin: «¿Jaraikai maʼin chi kanüliakai David? ¿Kasashikai maʼin naajüin chi nüchonkai Jesé? Wattasa maʼin naalii na achepchiee aʼluwataakana maaʼulu yaa noulia na nalaamainkana. 11 Nnojorüleejaʼa süpüla taapüin sümüin wayuu nnojotka teʼraajüin, tü pan, tü wüin jee tü asalaa nayaalujutuinjatkat tatuma na wayuu aüjüinjanakana soi taʼanneetse».
12 Aleʼejüshiijeseʼe nachikuaʼa na wayuu nüjünalakana David jee naküjakalaka nümüin süpüshuaʼaleeya tü nümakat Nabal namüin. 13 «Anashii jaapaayaa jümüle tü chajaruuta eekat jümaʼana», nümakalaka David namüin na wayuu eejanakana nümaa. Neʼitaakalaka nayatapünaa tü chajaruutakat suluʼu tü sütakat jee müsüjaʼaya neʼe nutuma David. Noʼunakalaka nümaa David 400 wayuu, makataka 200 sünain anajaa saaʼu tü kasa eejatkat namaʼana.
14 Saapinnakalaka Abigaíl, tü nuʼwayuusekat Nabal nutuma wanee süchepchia jee nümakalaka sümüin: «Yaajeeshiisa waneinnua wayuu nuluwataala David isashiipaʼajee süpüla nasaküinjachin chi walaamainkai jee süpüla naküjainjanain nümüin kasa anasü, aʼwoolojoopejeʼe neʼe chi walaamainkai namüin jee airuʼutsü nünüiki namüin. 15 Kamaneeshii maʼin naya wayuukana wamüin, nnojoishii waya jamajüin natuma otta nnojotsü jaralin asütüin wanee kasa woulia wanaa sümaa wekajirüin tü warüleejüinkat süka chajanain naya wamaa. 16 Müshii naya wamüin maʼaka saaʼin wanee süsepü miichi, naaʼinmajüin waya saʼwai jee soʼukai wanaa sümaa wekajirüin tü warüleejüinkat. 17 Nnaweerüjaʼa putuma sukuwaʼipa tia, eʼreechisa kasa mojusü chi walaamainkai suluʼujee tia otta eʼreena kasa mojusü na wayuu nipialujunakana. Nnojoishi kasain anain apüla chi walaamainkai otta nnojotsü anain aashajawaa nümaa».
18 Yapajamaatakalaka Abigaíl, sünaajaaka 200 pan, piama jaara miyoʼuyuu kaluʼusü wiino, jaʼraisü anneerü aüjaaushi, jaʼrai toleeka trigo eʼitujuushi,* poloo shikii saʼatachein uva pasa achuwerajuushi otta 200 saʼatachein higo achuwerajuushi, soʼotokoloko shia saaʼu waneirua püliikü. 19 «Anashii juʼunule tapüleerua, oʼuneerü taya jüchiirua», sümakalaka namüin na süchepchiakana, nnojotpejeʼe süküjain nümüin chi suʼwayuusekai tü saaʼinrajatkat.
20 Püliikoʼukalaka Abigaíl süsapoʼupünaa tü uuchikat, eekajaʼa David namaa na wayuu nümaajanakana sejena süpanapajee Abigaíl, nantiraaka sümaa. 21 Anuujeseʼe tü nüküjakuʼu nümakat David: «Taaʼinmajüin süpüshuaʼaleeya tü kasa eejatkat nümaʼana chaa isashiipaʼa. Nnojotpejeʼe kojutuin nümüin tü taaʼinrakat, eetaayaai jaralin asütüin nuulia wanee kasa, mojupejeʼe neʼe tü kasa naaʼinrakat tamüin. 22 Anashi niale Maleiwa kasalajanain atuma tü kasa mojusü naaʼinrakat tamüin na taʼünüükana nnojorüle toʼutüin naaʼin Nabal namaʼaleeya na wayuu nipialujunakana wattaʼa wattaʼa maalü».
23 Süshakatamaataka Abigaíl naaʼujee chi püliikükai shiʼraiwaʼaya David, süsapainkaka shia mmoluʼu sümaa sejepülaain. 24 Ejepülaasü shia wanaa maʼin sümaa tü nuuʼuikat jee sümakalaka nümüin: «Señotkalee, anasü tayale piʼitaain aaʼu tü kasa mojusü aaʼinnakat pümüin. Paapajaʼaya maa tanüiki, kasataalejeseʼe jülüjain paaʼin sünüiki tü püchepchiakat. 25 Señotkalee, nnojo jaa pümüin sümüin tü nümakat Nabal süka niain wanee wayuu nnojoikai kasain anain apüla, müshijeseʼe Nabal nümünüin otta nia wanee wayuu mayaawatüinka saaʼu nukuwaʼipa. Nnojoishii teʼrüin na wayuu püjünalakana. 26 Shiimain maʼin tanüiki pümüin Señotkalee, tü taküjakat pümüin nuʼupala Jehová, chi Maleiwa matüjainkai outaa. Nia Jehová ataʼülaka pukuwaʼipa suulia punoutuin sukuwaʼipa tü kasa aaʼinnakat pümüin jee suulia kaainjalajüin pia saaʼujee puʼutuin saaʼin wayuu. Kasataalejeseʼe müin naaʼin Nabal na wayuu aʼürülaakana pünain otta na aaʼinreekana kasa mojusü pümüin. 27 Señotkalee, anashii puluwataale na wayuu pümaajanakana süpüla naapaainjanain tü kasa takolojokot pümüin. 28 Moto paaʼin saainjala tü püchepchiakat kaainjalalejeʼeya taya puulia. Señotkalee, tatüjaa aaʼulu kakalieenain sünain aluwatawaa nutuma Jehová na püikeyuukana, jama piain atkaʼawalin namaa na nüʼünüükana Jehová otta nnojoishi aaʼinrüichin pia wanee kasa eekai mojuin. 29 Señotkalee, süchajaale püchiki wayuu shiiʼiree suʼuteein paaʼin, naaʼinmajeechi pia Jehová maʼaka saaʼinmajüin wayuu tü kasa kojutukat maʼin sümüin, sukoʼoluin sümaa sünaajaain shia suluʼu kattoʼui. Eekajasaʼa na wayuu kaʼürülakana pia meena nojunaanakai aaʼin wattamüin maʼaka sujutunuin wanee ipa süka junaaya. 30 Nüneekapeena pia Jehová süpüla piainjachin aluwataain naaʼu na israelitakana jee nikeraajapa süpüshuaʼaleeya tü kasa anasü nüküjakalü achiki pümüin, 31 nnojoleerü mojuin paaʼin saalinjee punoutuin sukuwaʼipa tü kasa aaʼinnakat pümüin jee saaʼujee puʼutuin saaʼin wayuu. Sotoiwa taya paaʼin señotkalee piʼrapeena kasa anasü nutuma Jehová».
32 Anuujeseʼe nünüiki David sümüin Abigaíl: «Kasataalejeseʼe nuʼwaajünüin Jehová, chi Namaleiwasekai na israelitakana, chi ajütakai pia noʼu kaʼikai chii tapanapa. 33 Kasataalejeseʼe anakuwaʼipalin pia nutuma Maleiwa saaʼujee kekiin maʼin pia, jama pütaʼülüitpain takuwaʼipa suulia tanoutuin sukuwaʼipa tü kasa aaʼinnakat tamüin jee suulia toʼutüin saaʼin wayuu. 34 Shiimain maʼin tanüiki pümüin nuʼupala Jehová chi Maleiwa matüjainkai outaa, chi Namaleiwasekai na israelitakana, chi ataʼülakai takuwaʼipa suulia taaʼinrüin kasa mojusü pümüin. Nnojorüle püntamaatüin sünain aashajawaa tamaa, toʼuta aaʼinchiije napüshuaʼaleʼeya na tooloyuu nipialujunakana Nabal süpülapünaa niweetaain chi kaʼikai». 35 Naapaakalaka David tü sukoloinkot Abigaíl nümüin jee nümakalaka sümüin: «Nnojo shapaain paaʼin, anasü puʼunule pipialuʼumüin. Shiimain tü pümakat tamüin otta taaʼinreerü tü puchuntakat tamüin».
36 Süntakalaka Abigaíl shipialuʼumüin, naainjitkajasa Nabal wanee ekawaa maʼaka naaʼinrüin shia wanee aluwataashi. Talatüsü maʼin naaʼin otta epeʼtshi maʼin nia. Nnojotkalaka süküjain nümüin süchiki tü alatakat, süküjaleeinña shia nümüin waneemüin kaʼi. 37 Shiasaʼa waneemüin kaʼi wattaʼa maalü anapa naaʼin Nabal, süküjakalaka Abigaíl nümüin süpüshuaʼaleeya tü kasa alatakat. Ashaʼwalaataairejeʼe naaʼin naapapa tia, ichereeka nia maʼaka ichein wanee ipa. 38 Outakalaka Nabal nutuma Jehová poloo kaʼi süchikijee tia.
39 Anuukalaka nünüiki David nütüjaapa saaʼu outuin Nabal: «Kasataalejeseʼe nuʼwaajünüin Jehová. Naapülijüin taya Nabal, nükaalinjapejeʼe taya Jehová nuulia. Nütaʼülüin takuwaʼipa Maleiwa suulia taaʼinrüin kasa mojusü jee süsalakalaka naainjala Nabal nutuma». Nüküjirakalaka David sümüin Abigaíl kasaalüinjatüin shia nümaa. 40 Nantaka na wayuu nümaajanakana David suluʼumüin tü mmakat Carmelo jee namakalaka sümüin Abigaíl: «Asaajinnüsü pia nutuma David süka kasaaleein nia pümaa». 41 Süsapainkakalaka shia mmoluʼu sümaa sejepülaain jee sümakalaka: «Tacheka achikirü nüchepchiainjatüin taya chi taseñotsekai süpüla toʼlojuin nooʼui na nümaajanakana». 42 Sütamaamaataka Abigaíl, soʼotooka naaʼu chi süpüliiküsekai otta eejana sümaa jaʼraishii süchepchia oʼunakana nooʼuika süchiiruajee. Oʼunusü shia namaa na wayuu nuluwataalakana David, kasaatkalaka shia nümaa David.
43 Ahinoam sünülia tü wane nuʼwayuusekat David, chejeʼewat shia suluʼujee tü mmakat Jezreel, piamasüleeka nuʼwayuuse David.
44 Saapünakalaka nutuma Saúl, Mical tü nuʼwayuusekat David nümüin Paltí chi nüchonkai Lais, chi chejeʼewaikai suluʼujee tü mmakat Galim.