Karaloʼuta namüinjatka na chajanakana Roma
9 Taküjain tü shiimainkat süka toushikajaain süchiirua nukuwaʼipa Cristo, nnojoishi taya aküjain taʼalain. Jee süka tayaawatüin saaʼu tü kasa eekai anain otta eekai mojuin,* nuʼunirüin takuwaʼipa Maleiwa sükajee tü nüpülainkat 2 süpüla taküjainjachin süchiki mojuin maʼin taaʼin jee shapaain maʼin taaʼin. 3 Anashi tayale kaliain tü naliajatiaakat na tawalayuu judíokana, na nnojoliikana oushikajaain süchiirua nukuwaʼipa Cristo. Taainjeeriaʼaya tia shialejeʼe aneerüin atuma nakuwaʼipa na tawalayuu judíokana. 4 Israelita naya jee nüneeküin naya Maleiwa süpüla nüchooinjanain naya, kojutushii naya nümüin, nüpansaajüin nünüiki namüin, naya kamüinjanakana tü Pütchi Aapünakat nümüin Moisés,* nüneeküin naya süpüla naʼyataainjanain nümüin otta nüküjain namüin neʼreenain kasa anasü mapeena. 5 Naikeyuu naya na watuushinuukana jee wayuushi Cristo nanainjee. Kasataalejeseʼe nuʼwaajünüin waneepia chi Maleiwa alanaʼaleekai saaʼu kasa süpüshuaʼa. Amén.*
6 Ekeraajüsü nünüiki Maleiwa. Napüshuaʼa na wayuu joʼuukana Israel, nnojoishii israelitain. 7 Mayaainjeʼe nüikeyuuin naya Abrahán, noʼuluʼu Maleiwa nnojoishii naya nüchooin Abrahán napüshuaʼa. Anuu nünüiki Maleiwa nümüin Abrahán: «Nieechi kalüinka atuma pia Isaac». 8 Nnojoishii nüchooin Maleiwa napüshuaʼa na nüchooinkana Abrahán. Aluʼu nayainjaʼa nüchooin Abrahán na joʼuukana sünainjee tü pütchi nüpansaajakat Maleiwa. 9 Anuu tü pütchi nüpansaajakat Maleiwa: «Seechi taya juyakat tüseena jee kachonjeetkalaka Sara». 10 Shiaʼaya nüpansaajaka tia wanaa sümaa senkeyuuin nüchon chi watuushikai Isaac sümüin Rebeca. 11 Süpülapünaa joʼuuin naya tepichikana jee süpülapünaa naaʼinrüin wanee kasa eekai anain jee eekai mojuin, nüküjatüjülia Maleiwa jaralinjachin nüneeküin naʼakajee. Nüneeküin Maleiwa chi anakai saaʼin nümüin, nnojotsü sünainjeejatüin tü naaʼinrakat wanee wayuu. 12 Anuujeseʼe nünüiki Maleiwa sümüin Rebeca: «Achepchieeinjachi chi epayaakai nutuma chi emülieekai». 13 Shiaʼaya ashajünakat tia suluʼu tü Karaloʼuta Nüchikimaajatkat Maleiwa, eere sümüin: «Aishi tapüla Jacob, taʼürülapejeʼe Esaú».
14 ¿Jamüsüche paala wanüiki? ¿Nnojotsüche lotuin nukuwaʼipa Maleiwa? Lotusü nukuwaʼipa Maleiwa. 15 Anuu tü nümakat nümüin Moisés: «Aijeechi tapüla chi eekai taneeküin jee amülialaajeerü taaʼin naalin chi eekai tamülialaweein aalin». 16 Nüneeküin Maleiwa wanee wayuu sünainjee nümülialaain naalin, nnojotsü shiain sünainjee tü suchuntaakat naaʼin wanee wayuu jee niʼyataale maʼin süchiirua. 17 Anuu wanee pütchi nümüinjatka faraón suluʼu tü Karaloʼuta Nüchikimaajatkat Maleiwa, tü makat mayaa: «Katayülia poʼu tatuma süpüla pütüjaain saaʼu pülashin maʼin taya jee süpüla saapüinjatüin wayuu tachiki sainküin mmakat». 18 Amülialaasü naaʼin Maleiwa naalin chi wayuu eekai nümülialaweein aalin, nuuʼulaapejeʼe ichein naaʼin chi eekai icheein aaʼin.
19 Eeshijaʼa nüsakireechire taya wanee wayuu sünain maa: «¿Jamüsü nnojotka anain wakuwaʼipa noʼuluʼu Maleiwa? ¿Eeshiche wanee wayuu ataʼülakai nukuwaʼipa Maleiwa suulia aaʼinraa tü nüchekakat?». 20 ¿Jamüshi piyoujaka Maleiwa sümaa wayuuin neʼe pia? «¿Jamüsü makaʼa takumajia putuma?», ¿müsüche sünüiki wanee kasa eekai sukumajuushin nümüin chi kakumalakai shia? 21 ¿Aashin niain aneeküin chi atüküikai tü naaʼinrajatkat süka wanee pootshi? Naainjeerejeʼeya wanee iita eekai anain maʼin otta eekai sumojulain iita. 22 Müsia neʼe tü naaʼinrakat Maleiwa, aashichijaweeshi nia nooʼomüin na mojulaashiikana jee niiʼiyateein namüin pülain maʼin nia, achechetpejeʼe nia naaʼin noulia na jashichikana amüin* nia jee noulia na keraakana süpüla ajaʼttinnaa. 23 Naainjain tia süpüla niiʼiyatajatüin namüin na nümülialaakana aalin, pülain maʼin nia. 24 Wayaʼaya nüneekaka naʼakajee na judíokana jee naʼakajee na nnojoliikana judíoin. 25 Ekeraajüsiaʼaya tü nümakat Maleiwa nükajee Oseas wanaa sümaa nümüin: «‹Tapüshi› tameena amüin na wayuu nnojoliipuʼukana tapüshin jee na maalinpuʼukana tapüla, ‹aishii jia tapüla› tameena amüin. 26 ‹Nnojoishii tapüshin jia› eere namünapuʼuin amüin, ‹nüchooin chi Maleiwa matüjainkai outaa›, müneena amüin».
27 Müsüjeseʼe müin nünüiki Isaías nachiki na israelitakana sünain maa: «Mayaainjeʼe wattain maʼin naalii na israelitakana maʼaka wattain saalii tü jasai sotpaʼakat palaa, paliʼireena neʼe na oʼttaakana. 28 Süsaleena naainjala nutuma Jehová* na yaakana saaʼu tü mmakat, naaʼinramaateerü tia». 29 Ekeraajüsia tü nümatüjütkalia Isaías sünain maa: «Nia laülaashikai Jehová* naaʼu na aapiee chakana iipünaa. Nnojoliire nüpüteʼerüin napüshi naikeyuu na watuushinuukana, ajaʼttüshiije waya maʼaka naaʼin na wayuu chajanakana Sodoma sümaa Gomorra».
30 ¿Jamüinjatü wanüiki shiʼipajee tüü? Lotusü nakuwaʼipa noʼuluʼu Maleiwa na wayuu nnojoliikana judíoin mayaainjeʼe nnojoliin naʼyataain süchiirua tia, lotusü nakuwaʼipa sünainjee kanoulain naya. 31 Mayaainjeʼe loteein nakuwaʼipa na israelitakana wanaapünaa sümaa tü pütchi aluwataanakalü anain naya, nnojotsü nountuin lotuin nakuwaʼipa. 32 ¿Jamüsü nnojotka nountuin tia? Shia süka loteein neʼe nakuwaʼipa sünainjee tü kasa naainjakat, nnojotsü shiain sünainjee kanoulain naya. Ashanaashii naya saaʼujee tü «ipa süshanaakalü aaʼujee wayuu». 33 Ekeraajüsü tü pütchi ashajünakat suluʼu tü Karaloʼuta Nüchikimaajatkat Maleiwa, eere sümüin: «Teʼitaajeechi chaa Sion wanee wayuu makai aka saaʼin wanee ipa süshanaajeechikai aaʼujee wayuu jee meechi nia maʼaka saaʼin wanee wutai airuʼutka sümüin wayuu. Nnojoleechi amülain neʼe chi wayuu kanoulakai nünain».