Génesis

2 Shia sukuwaʼipaka tia nutuma Maleiwa süpüla keraainjatüin tü sirumatuʼukat, tü mmakat jee müsia süpüshuaʼa tü kasa chakalü iipünaa jee tü yaakat saaʼu tü mmakat. 2 Keraakalaka nutuma Maleiwa tü kasa nukumajakat soʼu tü akaratshikat kaʼi. Neemeraaka soʼu tia akaratshikat kaʼi süchikijee tü kasa nukumajakat. 3 Nüküjakalaka Maleiwa eejeerüin kasa anasü soʼu tü akaratshikat kaʼi. Nükatalüin tia kaʼikat, jama shiain neemeraain oʼu maaʼulu yaa süchikijee süpüshuaʼa tü kasa nukumajeetüjütkalia amüin paala.

4 Müsü sukuwaʼipa tü sirumatuʼukat jee tü mmakat soʼu tü kaʼi nukumajakalü oʼu shia Jehová, chi Maleiwakai.

5 Nnojotsü eejatüin mojuui saaʼu tü mmakat, wunuʼulia eekai iyotuin süka nnojoluin süʼitüin juya nutuma Jehová otta nnojotsü wayuu apünajüinjatka. 6 Shia neʼe eejatka wanee mannuuya kamütaka sooʼopünaa tü mmakat chüʼtka atuma shia.

7 Nütükaka joo Jehová chi wayuukai süka pootshi jee nujuʼulaka niiʼiruʼupünaa süpüla katüinjachin noʼu, wayuuichikalaka nia. 8 Nukumajakalaka Jehová wanee yüüja chaa Edén, wüinpümüinsü tia. Niʼitaakalaka suluʼu chi wayuu nukumalakai. 9 Niweetiraka Jehová wunuʼulia anakat maʼin ayolojo jee anakat süpüla ekünaa achon. Nukumajüinña Maleiwa tü wunuʼu katakalü atuma soʼu wayuu, niʼitaain shia pasanain sünain tü yüüjakat. Otta müsia tü wunuʼu shiyaawataka atuma wayuu mojule jee anale wanee kasa.

10 Eejatkalaka wanee süchi aparatka eejee tü mmakalü Edén, iyotoko atuma tü yüüjakat. Süpaajaaka tia süchikat suluʼu pienchin süʼülia. 11 Pisón sünülia tü palajatkat süchi, alatüsü tia süchikat sotpünaa tü mmakat Havilá eere jouluin ooro. 12 Saʼanasia ooro tü ayuʼnnawaikat suluʼujee tia mmakat. Eesia suluʼu tia mmakat tü kanüliakat bedelio otta tü ipa kanüliakalü ónice. 13 Guihon sünülia tü wane süchikat. Alatüsü shia sotpünaa tü mmakat Cus. 14 Hidequel sünülia tü wane süchikat. Alatüsü shia wüinpümüin saaʼujee tü mmakalü Asiria. Éufrates sünülia tü chiiruaajatkat süchi.

15 Niʼitaakalaka Jehová suluʼu tü yüüjakalü Edén chi wayuu nukumajakai. Niʼitaain nia suluʼu süpüla nüpünajüinjachin jee naaʼinmajüinjatüin tia mmakat. 16 Anuukalaka tü nuluwataakalü anain Jehová chi wayuu nukumajakai: «Eeshi süpüla piküin süchon süpüshuaʼa tü wunuʼulia eekat suluʼu tü yüüjakat, emiraleepaʼaya pia. 17 Nnojotpejeʼe piküinjatüin süchon tü wunuʼu shiyaawatakalü atuma wayuu anale jee mojule wanee kasa. Outeechi pia soʼu tü kaʼi pikakalü oʼu shia».

18 «Nnojotsü anain nümüiwaʼale chi wayuukai, anainjaʼa takumajüle wanee wayuu naʼatajanainjatka akaalinjainjachika nia», nümakalaka Jehová. 19 Nütükaka Jehová süka pootshi tü wüchii wünaʼapüjatkat otta tü wüchii waawatakalü iipünaapünaa. Nüntiraka shia nümaʼanamüin chi wayuukai süpüla niʼitaainjatüin sünülia waneʼewai sukua. Shiakaʼa sünüliain tü niʼitaakat sünain. 20 Kanüliaka tü mürütkat nutuma chi wayuukai, niʼitaainña sünülia tü wüchii waawatakalü iipünaapünaa otta tü wüchii wünaʼapüjatkat. Nnojotpejeʼe naʼatajana chi wayuukai akaalinjainjachika nia. 21 Kaʼlekalaka maʼin lapü naaʼu chi wayuukai nutuma Jehová, niyuʼtka wanee nuwatse nooʼopünaa jee nüsürütka tü nülioʼukot. 22 Nukumajakalaka Jehová wanee jiet sükajee nuwatse chi wayuukai, nüntiraka shia nümaʼanamüin chi wayuukai.

23 Anuukalaka nünüiki chi wayuukai:

24 Ojuʼitüinjachijeseʼe wanee wayuu nümaʼanajee nüshi jee sümaʼanajee nii süpüla saʼaniraain nukuwaʼipa sümaa nuʼwayuuse. Nnojoleenaka naya katataʼawain. 25 Ayatüshia masheʼin chi wayuukai sümaa nuʼwayuuse nnojoliipejeʼe japülin naya.