Jueces

4 Naainjakalaka süchikuaʼa na israelitakana tü kasa mojukat nümüin Jehová süchikijee outuin Ehúd. 2 Naapakalaka Jehová nekii na israelitakana nümüin Jabín, chi aluwataashikai saaʼu tü mmakat Canaán, chajachi nia aluwataain suluʼu tü pueulokot Hazor. Sísara nünülia nekiipüʼü na nusurulaatsekana, kepiapuʼushi nia suluʼu tü pueulokot Haróset.* 3 Eejatü 900 kareeta atkaaya nümaʼana Jabín, kasajüsü maʼin tü kachueera sünainkat suuʼui. Müliasü maʼin naaʼin na israelitakana nutuma soʼu piama shikii juya. Nachuntaka kaalinwaa na israelitakana nümüin Jehová.

4 Soʼu tia eejatü wanee nünüikimaajatü Maleiwa, Débora sünülia, nuʼwayuuse shia Lapidot. Nekiipüʼü shia na israelitakana. 5 Aikalaʼawaisü shia suupünaa wanee suuʼulia alana* eejatka sümaʼana, pasanainka sünain tü mmakat Ramá otta Betel, eere tü uuchi eejanale kepiain na nüikeyuukana Efraín. Oʼunawaishii na israelitakana sümaʼanamüin süpüla naapajüin jamüin nünüiki Maleiwa süchiki wanee kasa alataka namüin. 6 Suunejitkalaka Barac suluʼujee tü mmakat Quedes, eere kepiain na nüikeyuukana Neftalí. Barac nüchon Abinoam. Anuukalaka sünüiki Débora nümüin: «Anuu tü nümakat Jehová, chi Namaleiwasekai na israelitakana: ‹Pümaa na nüikeyuukana Neftalí otta na nüikeyuukana Zabulón saaʼumüin tü uuchikat Tabor, 10.000 na wayuu pümaainjanakana. 7 Tantireechi piʼipamüin Sísara eemüin tü luwopu kanüliakat Cisón, nekiipüʼü nia na nusurulaatsekana Jabín, tantireechi nia piʼipamüin namaʼaleeya na oʼunirakana tü kareeta atkaayakat jee na nusurulaatsekana, taapeetkalaka nikii pümüin›».

8 Anuuka nünüiki Barac sümüin Débora naapaiwaʼaya tia: «Oʼuneechi taya puʼunule tamaa, nnojorüle puʼunuin tamaa makateechija’amata taya». 9 Anuukalaka sünüiki nümüin: «Oʼuneerü taya pümaa, nnojoleechipejeʼe pia kojutuin atumawaa sünainjee atkawaakat tüü, jama shiain nüneeküin Jehová wanee wayuu süpüla naapüinjatüin sümüin nikii Sísara». Sütamaakalaka Débora jee suʼunakalaka nümaa Barac suluʼumüin tü mmakat Quedes. 10 Nuunejitkalaka Barac na nüikeyuukana Zabulón otta na nüikeyuukana Neftalí suluʼumüin tü mmakat Quedes, noʼunakalaka nümaa 10.000 wayuu, oʼunusiaʼaya Débora nümaa.

11 Nükatalaaka Héber, chi quenitakai, noulia na wane quenitakana, na nüikeyuukana Hobab, chi nüshimiakai Moisés. Nüshaʼwaleʼeraka wanee miichi aainjuushi süka loona süʼütpaʼa tü wunuʼu miyoʼu chajatkat suluʼu tü mmakat Zaananim, pejeka sünain tü mmakat Quedes.

12 Süküjünaka nümüin Sísara chajachin Barac, chi nüchonkai Abinoam, saaʼu tü uuchikat Tabor. 13 Nüsaajiramaataka Sísara süpüshuaʼa tü neʼejena nütkaayakat, 900 kareeta eejatka nümaʼana, kasajüsü maʼin tü kachueera sünainjatkat suuʼui jee nuutkajeʼerüin napüshuaʼa na surulaat nümaajanakana suluʼujee tü pueulokot Haróset jee chaʼwalii naya eemüin tü luwopu kanüliakat Cisón. 14 Anuukalaka sünüiki Débora nümüin Barac: «Anashi puʼunule sünain atkawaa, jama naapeerüin pümüin Jehová soʼukai nikii Sísara. Niainjachi Jehová atkaaka püpüleerua». Nüshakatakalaka Barac saaʼujee tü uuchikat Tabor namaa 10.000 wayuu. 15 Müsü jalapaʼakai naaʼin Sísara nushutapa Barac naaʼu, müshiʼiya neʼe na wayuu oʼunirakana tü kareeta atkaayakat jee na surulaatkana, jama niain Jehová müin atuma nakuwaʼipa. Nüshakatakalaka Sísara suluʼujee neʼejena jee nüpantajaakalaka. 16 Nuushikajaaka Barac nachiirua na nusurulaatsekana Sísara jee na oʼunirakana tü kareeta atkaayakat. Antaleeshiʼiya naya suluʼumüin tü pueulokot Haróset, outakalaka napüshuaʼa na nusurulaatsekana Sísara, nnojoishi apütaain waneeshiakaijeʼe.

17 Nüpantajaaka Sísara shipialuʼumüin Jael, tü nuʼwayuusekat Héber, chi quenitakai. Anajiraashii na nipialujunakana Héber nümaa Jabín, chi aluwataashikai saaʼu tü mmakat Hazor. 18 Süpanapajaka Jael Sísara jee sümaka nümüin: «Pikerota yaamüin aluwataashikalee, nnojo mmoluin pia». Nikerotkalaka Sísara suluʼumüin tü miichi aainjuushikat süka loona, sukoʼoyoloko nia süka wanee kuluulu. 19 Anuukalaka nünüiki sümüin: «Tasa maa wüin, wüinñaasüshi maʼin taya». Süla’alaka nüsüin leechi sulujutka wanee paaʼata, sukoʼoyoloko nia nüchikuaʼa. 20 Anuukalaka nünüiki Sísara sümüin Jael: «Anasü yalale pia soʼuluʼu miichika, ‹achajaashii waya nüchiki wanee wayuu, ¿yaataaka nia pipialuʼu?›, nümüle pümüin wanee wayuu, ‹nnojotsü wayuu yaʼaya›, meerü pia nümüin».

21 Shiasaʼa Jael, tü nuʼwayuusekat Héber, saapaakalaka wanee wunuʼu kasa eʼichit sümaa wanee mattiia. Sürütkaakalaka Jael jiatta nünainmüin Sísara sujuunaluʼu nutunkuin maʼin, jama mapüsain maʼin nia, sütkaka suwalapaʼa nikii, juʼttaleesia tü wunuʼukat sünain tü mmakat, outakalaka nia.

22 Nüntakalaka Barac shipialuʼumüin Jael sünain achajawaa nüchiki Sísara, anuujeseʼe sünüiki nümüin: «Jalaichi yaamüin teeʼiyataiwa pümüin chi wayuu püchajaakai achiki». Nikerotkalaka paülüʼümüin jee niʼrakalaka outuin Sísara, susonojoʼoleein nikii tü wunuʼukot.

23 Soʼu kaʼikat tia akanajuushi Jabín natuma na israelitakana, jama nakaalinjünüin nutuma Maleiwa, aluwataashi Jabín naaʼu na wayuu kepiakana suluʼu tü mmakat Canaán. 24 Nashutakalaka maʼin na israelitakana naaʼu Jabín, noʼutaleepaʼaya naaʼin.