Palajatka karaloʼuta Samuel
19 Nüküjakalaka Saúl nümüin Jonatán jee namüin na wayuu aʼyataakana nümüin, nuʼutajachin naaʼin David. 2 Anuujeseʼe nünüiki Jonatán nümüin David sutuma alin maʼin nia nüpüla: «Nuʼutee aaʼinchi pia chi tashikai. Anasü eejüle paaʼin wattaʼa, wattaʼa maalü. Anashi püchajaale eeinjachire puunjulaain, makateechika pia chayaa. 3 Oʼuneechi taya nümaa chi tashikai anuuipaʼamüin sünain tü pueulokot, peje sünain eeinjachire pia, yootoyoojeechi taya nümaa püchiki. Nüküjale tamüin wanee kasa, taküjamaateerü shia pümüin».
4 Anakalaka nünüiki Jonatán nüchiki David nümüin Saúl, anuu nünüiki: «Laülaashikalee, jalia jamajayaai putuma David, nnojoishi nia aainjain kasa mojusü pümüin. Anasü süpüshuaʼaleeya tü kasa naainjaka püpüleerua. 5 Soto paaʼin outataaichinjeʼe David soʼu nütkaain nümaa Goliat. Nakanajaka na israelitakana nutuma Jehová suluʼujee tia, piʼraja akuat tia jee talatakalaka paaʼin sünainjee. ¿Jamakaʼa puʼutajatka naaʼin David sümaa maainjalain nia puulia? Kaainjaleechi pia paainjale tia». 6 Naapaakalaka Saúl sümaa nünüiki Jonatán, nüpansaajakalaka nünüiki sünain maa: «Nnojoleechi toʼutüin aaʼin David, shiimain maʼin tanüiki pümüin nuʼupala Jehová, chi Maleiwa matüjainkai outaa». 7 Asaajinnüshijeseʼe David nutuma Jonatán jee nüküjakalaka nümüin süpüshuaʼa tü nüküjakat Saúl nümüin. Nümaashijeseʼe nia eemüin Saúl jee ayatakalaka niʼyataain David nümüin Saúl maʼakaapuʼu.
8 Natkaakalaka nachikuaʼa na israelitakana namaa na filisteokana. Watta naalii na nuʼutakana aaʼin David, napantajaaka na filisteokana nüpüleerua.
9 Soʼu wanee kaʼi, nüntirüin Jehová nikiiruʼumüin Saúl wanee kasa mmotkat eema nia, alatüsü tia nümüin soʼu chajachin nia joyotuin nipialuʼu sümaa najapuluʼujuin tü kanüliakat lanza, yalajachika David atalejüin tü kanüliakat arpa. 10 Nujutaka Saúl nooʼomüin David tü lanzakat, nülatirüinjeseʼe shia David, juʼttaleesia tü lanzakat sünain süsepü tü miichikat. Nüpantajaakalaka David jee nuʼluwataaka soʼuleʼeya aikat tia. 11 Nünajira aaʼu Saúl nipia David süpüla nuʼutirüinjatüin naaʼin wattaʼa maalü. Anuupejeʼe sünüiki Mical nümüin David: «Nnojoire puʼluwataain soʼu aikat tüü, oʼutuneechi aaʼin pia wattaʼa». 12 Akaalinjünüshijeseʼe David sutuma Mical süpüla süshakatirüinjachin nia suluʼupünaa tü wentaanakat. 13 Shiʼitaain Mical saaʼu tü camakat wanee shiyaakua maleiwayaasü, shiʼitaakalaka shikiinain tü camakat wanee kuluulu aainjuushi süka soi kaaʼula, sükooʼoyoloko shia süka wanee kuluulu.
14 «Ayuuishisa nia», sümakalaka Mical namüin na wayuu nuluwataakana Saúl süpüla nataʼülajachin David. 15 Nüjütüinjeseʼe Saúl nachikuaʼa naya wayuukana nipialuʼumüin David jee nümakalaka namüin: «Jüntira nia tamüin sümaʼaleeya tü nücamainkat toʼutaiwa naaʼin». 16 Nekerotopa naya wayuukana nipialuʼumüin David, neʼrakalaka wanee shiyaakua maleiwayaasü saaʼu tü camakat, eejatiaʼaya saaʼu wanee kuluulu aainjuushi süka soi kaaʼula eeinjatüle nikii David. 17 Anuujeseʼe nünüiki Saúl sümüin Mical: «¿Jamüshi paʼalainpalakaʼa taya? ¿Jamüshi puuʼulaaka nuʼunuin chi taʼünüükai?». Anuujeseʼe sünüiki Mical nümüin Saúl: «‹Puuʼulaa toʼunaiwa, toʼuteetsa aaʼin pia›, müshireʼe nia tamüin».
18 Süchikijee nuʼluwataain David, nuʼunakalaka eemüin Samuel, chaa suluʼumüin tü mmakat Ramá. Nüküjainjeseʼe nümüin Samuel tü kasa naainjakat Saúl nümüin. Oʼunushijeseʼe Samuel nümaa David suluʼumüin tü mmakat Nayot, makatakalaka naya chayaa. 19 Anuuka mapa sünüiki wayuu nümüin Saúl: «Ichaasa David suluʼu tü mmakat Nayot, tü chakat Ramá». 20 Nuluwataakalaka Saúl waneinnua wayuu süpüla nütaʼülirüinjachin David. Nantapa chamüin, neʼrakalaka na nünüikimaajana Maleiwa laülaayuuinnakana, aküjashii naya süchiki tü kasa alatajatkat naashin Maleiwa, nia nekiipüʼüka Samuel. Süntaka tü nüpülainkat Maleiwa naaʼu na wayuu ataʼülüinjanakana David, naküjaka süchiki tü kasa alatüinjatkat naashin Maleiwa.
21 Süküjünapa nümüin Saúl tü kasa alatakat, nuluwataaka waneinnua wayuu süpüla nataʼülajachin David, naküjakalaka naya wayuukana tü kasa alatajatkat naashin Maleiwa. Nüjütaka joo Saúl waneinnua wayuʼuya süpüla nataʼülajachin David, akaataajaʼa neʼe naya wayuukana naküjain tü kasa alatajatkat naashin Maleiwa. 22 Niakalaka oʼunuin mapa Saúl sünain ataʼülaa David, anuukalaka nünüiki nüntapa eemüin tü ishi chajatkat suluʼu tü mmakat Secú: «¿Jalashi Samuel nümaa David?». «Ichaa suluʼu tü mmakat Nayot, tü chakat Ramá», sümakalaka wayuu nümüin. 23 Süntakalaka tü nüpülainkat Maleiwa naaʼu Saúl wanaa sümaa nuʼunuin suluʼupünaa tü wopu chaʼwatkat Nayot, tü chakat Ramá. Nüküjain tü kasa alatajatkat naashin Maleiwa, nüküjain tia nüntaleepaʼaya suluʼumüin tü mmakat Nayot, tü chakat Ramá. 24 Nümasheʼinjaakalaka Saúl jee nüküjakalaka nuʼupala Samuel tü kasa alatüinjatkat naashin Maleiwa. Palasütüshi nia sümaa masheʼin nia, siraasü kaʼi naaʼu jee siraasü aikat naaʼu. «¿Nünüikimaajachi joo Saúl Maleiwaya?», müsüjeseʼe sümüin wayuu sünainjee tia.