Levítico

7 »›Anuusa tü aluwataanakalü anain süchiki tü naapüinjatkat wanee wayuu tamüin tayakai Maleiwa kaainjarale nia. Shia wanee kasa kojutuka maʼin. 2 Oʼutunajatü aaʼin tü mürüt naapakat wanee wayuu saaʼu naainjala eere suʼutunuin aaʼin tü mürüt oʼutunakalü aaʼin tamüin süpüla saʼajünüin otta atülüittinnüinjatü tü süshakat sutoutajee tü aʼajüleekat mürüt. 3 Naʼajeetka süpüshuaʼa saüsü tü mürütkat, tü süsi kaüsükat maʼin, tü saüsü süsapuutajeekat tü süleʼekat, 4 tü piamasükat süchüʼü sümaa tü saüsü sünainkat sümaʼaleeya tü saüsü sünainkat süpana. 5 Nüsijeetkalaka chi sacerdotekai süpüshuaʼa tia saaʼu tü aʼajüleekat süpüla kaittüinjatüin sümüsain tamüin tayakai Jehová. Shia naapajatka tia wanee wayuu tamüin saaʼu naainjala kaainjarale nia. 6 Nia neʼe eküinjachika tia chi sacerdotekai, ekünajatü shia suluʼu wanee miichi aʼwaajülee. Shia wanee kasa kojutuka maʼin. 7 Tü aluwataanakalü anain wanee wayuu süchiki naapajatüin wanee kasa saaʼu tü kasa mojusü naaʼinrakat sümaa nnojolin naaʼinjeein shia, shia neʼe tü naapajatkat wanee wayuu saaʼu naainjala, nümüinjatü chi sacerdotekai tü asalaa aapünakat süpüla motuin taaʼin naainjala wanee wayuu.

8 »›Naʼajüinjatpa wanee sacerdote tü mürüt aapünakat tamüin tayakai Maleiwa nüpüleerua wanee wayuu, naapaajeerü süta tü mürüt antinnakat nümüin.

9 »›Süpüshuaʼa tü eküülü asülajünakat tamüin tayakai Maleiwa aʼlakajaanaka suluʼu ‹horno› jee süʼlakajaanüle suluʼu wanee siʼwarai jee shiale suluʼu wanee ‹sartén›, nümüinjatü shia chi sacerdote aapakai shia tamüin, nia kamüinjachikai niakai. 10 Akaajasaʼa tü eküülü asülajünakat ojuruttünaka sümaa seita jee nnojorüle kaʼakaain shia seita aapünajatü shia namüin napüshuaʼa na nüchonniikana Aarón, wanaawainjatü tü eitajünakat namüin.

11 »›Anuu tü aluwataanakalü anain süchiki tü naapüinjatkat wanee wayuu tamüin tayakai Jehová süpüla anajiraainjachin nia tamaa. 12 Naapüinjatüle tia süpüla naapüinjatüin analuʼut tamüin, naapüinjatü shia sümaa pan lakayaasü maʼakaka soolojia seitamaajatka, galleta arülachonka maʼakaka soolojia ashulennaka aaʼu seita otta sümaa pan lakayaasü aainjuushika süka ariina yütchonka, anainjatü maʼin sujuruttia otta ashulennüinjatü aaʼu seita. 13 Naapüinjatiaʼaya tia pankat sümaa pan lakayaasü kaʼakaka soolojia otta tü mürüt oʼutunakalü aaʼin tamüin tayakai Maleiwa süpüla saapünüinjatüin analuʼut tamüin. 14 Sünainjee süpüshuaʼa tü aapünakat tamüin tayakai Jehová, aapünajatü waneʼewai sukua tü pankat süka shiain wanee kasa kojutuka maʼin tamüin. Nümüinjatü tia chi sacerdote atülüittitkai süsha tü mürüt naapakat wanee wayuu süpüla anajiraainjachin nia tamaa. 15 Tü asalaa naapakat wanee wayuu saaʼu naapüin analuʼut tamüin, süpüshi tü aapünakat tamüin süpüla anajiraainjachin nia tamaa, ekünajatü shia soʼuleʼeya tü kaʼi saapünakalü oʼu, nnojotsü anaajaanüinjatüin süpüshi süpüla waneemüin kaʼi.

16 »›Nüsülajüle wanee wayuu tamüin tayakai Maleiwa saaʼu naapüin nünüiki tamüin jee shiale nüsülajüin neʼe süka naaʼin nümüiwaʼa, ekünajatü tü nüsülajakat soʼuleʼeya tü kaʼi naapakalü oʼu shia. Süpütaale süpüshi eesü süpüla shikünüin waneemüin kaʼi. 17 Soʼu tü apünüinkat kaʼi, aʼajünajatü soʼu siki tü apütaakat sünainjee tü asülajünakat tamüin. 18 Eekajasaʼa shikünüle sülatapa apünüin kaʼi shiʼiruku tü nüsülajakat wanee wayuu süpüla anajiraain nia tamaa tayakai Maleiwa, nnojoleechi talatüin taya nümaa chi wayuukai jee sümaa tü nüsülajakat. Yarütteerü tamüin tü naaʼinrakat chia wayuukai otta asouteechi saaʼu tia chi wayuu ekakai shia. 19 Tü asalaa epettuukat sünain kasa yarüttüsü nnojotsü ekünajatüin, aʼajünajatü shia soʼu siki. Chi wayuu eekai wulein akuwaʼipa eeshi süpüla niküin asalaa eekai wulein.

20 »›Oʼutunajatü aaʼin tü wayuu eekai yarüttüin akuwaʼipa ekaka tü asalaa tamüinjatkat tayakai Jehová, tü aapünakat tamüin süpüla anajiraain wayuu tamaa. 21 Tü wayuu eekai shipettüin kasa eekai yarüttüin, maʼaka saaʼin shipettüle wayuu eekai yarüttüin, shiale wanee mürüt eekai yarüttüin jee wanee kasa yarüttaka maʼin jee shiküle mapa tü asalaa tamüinjatkat tayakai Jehová, tü aapünakat tamüin süpüla anajiraainjatüin wayuu tamaa, oʼutunajatü aaʼin tia wayuukot›».

22 Ayatakalaka Jehová sünain aashajawaa nümaa Moisés sümaa nümüin nümüin: 23 «Anuu tü pünüikinjatkat namüin na israelitakana: ‹Nnojoishii jia eküinjanain saüsü paaʼa toolo, naüsü wanee anneetchon jee müsia saüsü kaaʼula. 24 Tü saüsükat mürüt jüntaka anain sünain mürüt oʼutuushika aaʼin jee shiale suʼutunuin aaʼin sutuma wanee wüchii, eesü süpüla jaapaain shia süpüla tü kasa choʼujaakat jümüin, nnojotpejeʼe süpüla jiküinjatüin shia. 25 Oʼutunajachi aaʼin chi wayuu ekakai saüsü mürüt naapaka tamüin tayakai Jehová süpüla suʼutunuin saaʼin jee saʼajünüin tamüin.

26 »›Nnojoishii eküinjanain jia isha jaʼitashii jalain kepiain jia, nnojoishii eküinjanain jia süsha wüchii jee süsha mürüt eekai eein. 27 Oʼutunajatü aaʼin tü wayuu eekai shiküin isha›».

28 Ayatakalaka naashajaain Jehová nümaa Moisés sümaa nümüin nümüin: 29 «Anuu tü püküjainjatkat namüin na israelitakana: ‹Chi aapakai mürüt tamüin tayakai Jehová süpüla anajiraainjachin nia tamaa, nükatalüinjatü süpüshi tü naapakat tamüin tayakai Jehová, niʼikajaajeetka shia tamüin. 30 Nülüʼüjeetka najapuluʼu saüsü tü mürütkat sümaʼaleeya tü suʼluuwainkat süpüla süsijünajatüin soʼu siki tamüin tayakai Jehová, niʼyuunaleetka tü nüsijakat toʼupala tayakai Jehová. 31 Nüsijeetkalaka chi sacerdotekai saüsü tü mürütkat saaʼu tü aʼajüleekat süpüla kaittüinjatüin sümüsain, eekajasaʼa tü suʼluuwainkalü aapünajatü shia nümüin Aarón jee müsia namüin na nüchonniikana.

32 »›Jaapeerü nümüin chi sacerdotekai tü süsaʼa shikialuʼujeekat tü mürüt aapünakat tamüin tayakai Maleiwa süpüla anajiraainjachin wanee wayuu tamaa. Shia wanee kasa aapünajatka namüin na sacerdotekana. 33 Chi nüchon Aarón aapakai tü saüsükat sümaa tü süsha mürüt aapünakat tamüin süpüla anajiraain wanee wayuu tamaa, nia kamüinjachika tü süsaʼa shikialuʼujeekat tü mürütkat. 34 Taya kamüinjachika tü suʼluuwain aʼyuunannakat tamüin jee müsia süsaʼa tü mürüt naapakat na israelitakana namüin na sacerdotekana süpüla anajiraainjanain naya tamaa tayakai Maleiwa. Taapüin shia nümüin Aarón jee namüin na nüchonniikana, shia wanee kasa taluwataaka anain na israelitakana waneepia.

35 »›Müinjatü sukuwaʼipa tü akatannakat tamüin tayakai Jehová süpüla saʼajünajatüin tamüin, tü akatannakat nümüin Aarón jee namüin na nüchonniikana saaʼu sacerdotein naya soʼu tü kaʼi naneekünakalü oʼu süpüla sacerdotein naya tamüin tayakai Jehová. 36 Taluwataain tayakai Jehová na israelitakana naapajatüin tia namüin na sacerdotekana soʼu tü kaʼi taneekakalü oʼu naya. Naaʼinrajatü tia naikeyuu na israelitakana süpüla kaʼikat süpüshuaʼa›».

37 Shia nüsülajüinjatka tia wanee wayuu naapajachipa wanee kasa süpüla saʼajünüin nümüin Maleiwa, saapünajatpa eküülü nümüin Maleiwa, tü naapajatkat wanee wayuu naainjale kasa mojusü sümaa nnojolin naaʼinjeein shia, tü naapajatkat saaʼu naainjala, tü aapünajatkat nüneekünapa wanee sacerdote jee müsia tü aapünajatkat süpüla anajiraainjachin wanee wayuu nümaa Maleiwa. 38 Shia aluwataanaka anain tia Moisés nutuma Jehová saaʼu tü uuchikat Sinaí soʼu tü kaʼi naluwataanakalü oʼu na israelitakana naapüinjatüin tü nasülajüinjatkat nümüin Jehová chaa eekai tü ishashiipaʼa chakat Sinaí.